27

Xelaufeha cov ntxhais thov qub txeeg qub teg

¹Xelaufeha cov ntxhais txav los. Xelaufeha yog Hefaw tus tub, Hefaw yog Kile‑a tus tub, Kile‑a yog Makhi tus tub, Makhi yog Manaxe tus tub, yog xeem Manaxe. Manaxe yog Yauxej tus tub. Cov ntxhais ntawd tej npe hu ua Malas, Nau‑a, Haula, Meekha thiab Thilaxa. ²Lawv tuaj sawv ntawm Mauxe thiab pov thawj Ele‑axa thiab cov uas ua hlob thiab cov pejxeem sawvdaws xubntiag rau ntawm lub qhov rooj tsev ntaub sib ntsib mas hais tias, ³“Peb txiv tuag hauv tebchaws moj sab qhua. Nws tsis yog nrog Khaula pab tawm tsam Yawmsaub, nws tuag nws lub txim xwb thiab nws tsis muaj tub. ⁴Ua cas nej yuav muab peb txiv lub npe rho tawm hauv nws cum lawm vim nws tsis muaj tub li? Thov pub peb nrog peb txiv tej kwvtij tau teb ua peb tug thiab.”
⁵Mauxe thiaj coj lawv zaj mus cuag Yawmsaub. ⁶Yawmsaub hais rau Mauxe tias, ⁷“Xelaufeha cov ntxhais hais raug lawm. Koj cia li pub kom lawv nrog lawv txiv tej kwvtij tau tebchaws ua qub txeeg qub teg ua lawv tug, thiab cia lawv txiv li qub txeeg qub teg poob ua lawv tug. ⁸Koj cia li hais rau cov Yixayee tias, ‘Yog ib tug txivneej twg tuag es nws tsis muaj tub kuj cia nws qub txeeg qub teg poob rau nws tus ntxhais. ⁹Yog nws tsis muaj ntxhais nej yuav muab nws qub txeeg qub teg rau nws tej txheeb kwvtij. ¹⁰Yog nws tsis muaj kwv tsis muaj tij thiab, kuj muab nws qub txeeg qub teg rau nws txiv tej kwvtij. ¹¹Yog nws txiv tsis muaj kwvtij thiab, kuj muab nws qub txeeg qub teg rau tus uas txheeb txheeb hauv nws cum, mas tus ntawd yuav saws tau ua nws teej nws tug. No yog ib txojkev li kev cai rau cov Yixayee coj raws li Yawmsaub hais rau Mauxe lawd.’ ”

Mauxe tsa Yausua sawv nws chaw

¹²Yawmsaub hais rau Mauxe tias, “Koj cia li nce mus saum lub roob Anpali no thiab saib mus rau lub tebchaws uas kuv muab rau cov Yixayee. ¹³Thaum koj pom lawd koj yuav tau mus nrog koj tej poj koob yawm txwv nyob yam nkaus li koj tus tijlaug Aloo twb mus lawm, ¹⁴rau qhov neb ob leeg tsis quav ntsej kuv tej lus hauv tebchaws moj sab qhua Xee rau thaum uas cov pejxeem cam thawj es neb twb tsis ua rau sawvdaws hwm kuv ua tus dawb huv rau ntawm dej txhawv tab meeg lawv.” (No yog cov dej Melinpa ntawm Khade hauv tebchaws moj sab qhua Xee.) ¹⁵Mauxe hais rau Yawmsaub tias, ¹⁶“Thov Yawmsaub uas yog Vajtswv uas kav neeg sawvdaws txojsia, tsa ib tug thawj los coj cov pejxeem no, ¹⁷yog ib tug uas yuav kav tau lawv thiab coj lawv tawm mus thiab nkag los, xwv Yawmsaub cov neeg thiaj li zoo tsis thooj li pab yaj uas tsis muaj tus tswv yug.” ¹⁸Yawmsaub hais rau Mauxe tias, “Cia li coj Noo tus tub Yausua uas muaj Vaj Ntsuj Plig nrog nraim nws tuaj thiab tsa tes npuab saum nws. ¹⁹Kom nws sawv ntawm pov thawj Ele‑axa thiab cov pejxeem sawvdaws xubntiag mas koj yuav ua kevcai tsa nws tab meeg sawvdaws. ²⁰Koj yuav muab koj lub hwjchim ib txhia rau nws kom ib tsoom pejxeem Yixayee sawvdaws thiaj li mloog nws lus. ²¹Nws yuav sawv ntawm pov thawj Ele‑axa xubntiag mas Ele‑axa yuav siv Uli thiab Thumi⚓ ntawm Yawmsaub xubntiag saib Yawmsaub lub siab nyiam li cas. Nws thiab ib tsoom Yixayee sawvdaws yuav tawm mus thiab nkag los raws li tus pov thawj hais.” ²²Mauxe ua raws nraim li uas Yawmsaub hais rau nws. Nws coj Yausua tuaj thiab kom nws sawv ntawm pov thawj Ele‑axa thiab cov pejxeem sawvdaws xubntiag, ²³mas Mauxe tsa tes npuab saum Yausua thiab ua kevcai tsa nws raws li Yawmsaub hais kom Mauxe ua.

27

Xelaufeha cov ntxhais thov qub txeeg qub teg

¹Xelaufeha cov ntxhais txaav lug. Xelaufeha yog Hefaw tug tub, Hefaw yog Kile‑a tug tub, Kile‑a yog Makhi tug tub, Makhi yog Manaxe tug tub, yog xeem Manaxe. Manaxe yog Yauxej tug tub. Cov ntxhais hov tej npe hu ua Malag, Nau‑a, Haula, Meekha hab Thilaxa. ²Puab tuaj sawv ntawm Mauxe hab pov thawj Ele‑axa hab cov kws ua hlub hab cov pejxeem suavdawg xubndag rua ntawm lub qhov rooj tsev ntaub sws ntswb mas has tas, ³“Peb txwv tuag huv tebchaws moj saab qhua. Nwg tsw yog nrug Khaula paab tawm tsaam Yawmsaub, nwg tuag nwg lub txem xwb hab nwg tsw muaj tub. ⁴Ua caag mej yuav muab peb txwv lub npe rhu tawm huv nwg cum lawm vem nwg tsw muaj tub le? Thov pub peb nrug peb txwv tej kwvtij tau teb ua peb tug hab.”
⁵Mauxe txhad coj puab zaaj moog cuag Yawmsaub. ⁶Yawmsaub has rua Mauxe tas, ⁷“Xelaufeha cov ntxhais has raug lawm. Koj ca le pub kuas puab nrug puab txwv tej kwvtij tau tebchaws ua qub txeeg qub teg ua puab tug, hab ca puab txwv le qub txeeg qub teg poob ua puab tug. ⁸Koj ca le has rua cov Yixayee tas, ‘Yog ib tug txwvneej twg tuag es nwg tsw muaj tub kuj ca nwg qub txeeg qub teg poob rua nwg tug ntxhais. ⁹Yog nwg tsw muaj ntxhais mej yuav muab nwg qub txeeg qub teg rua nwg tej txheeb kwvtij. ¹⁰Yog nwg tsw muaj kwv tsw muaj tij hab, kuj muab nwg qub txeeg qub teg rua nwg txwv tej kwvtij. ¹¹Yog nwg txwv tsw muaj kwvtij hab, kuj muab nwg qub txeeg qub teg rua tug kws txheeb txheeb huv nwg cum, mas tug hov yuav saws tau ua nwg teej nwg tug. Nuav yog ib txujkev lis kev cai rua cov Yixayee coj lawv le Yawmsaub has rua Mauxe lawd.’ ”

Mauxe tsaa Yausua nyob nwg chaw

¹²Yawmsaub has rua Mauxe tas, “Koj ca le nce moog sau lub roob Anpali nuav hab saib moog rua lub tebchaws kws kuv muab rua cov Yixayee. ¹³Thaus koj pum lawd koj yuav tau moog nrug koj tej laug nyob yaam nkaus le koj tug tijlaug Aloo tub moog lawm, ¹⁴tsua qhov meb ob leeg tsw quav ntsej kuv tej lug huv tebchaws moj saab qhua Xee rua thaus kws cov pejxeem caam thawj es meb tub tsw ua rua suavdawg fwm kuv ua tug dawb huv rua ntawm dej txhawv taab meeg puab.” (Nuav yog cov dej Melinpa ntawm Khante huv tebchaws moj saab qhua Xee.) ¹⁵Mauxe has rua Yawmsaub tas, ¹⁶“Thov Yawmsaub kws yog Vaajtswv kws kaav tuabneeg suavdawg txujsa, tsaa ib tug thawj lug coj cov pejxeem nuav, ¹⁷yog ib tug kws yuav kaav tau puab hab coj puab tawm moog hab nkaag lug, sub Yawmsaub cov tuabneeg txhad le zoo tsw thooj le paab yaaj kws tsw muaj tug tswv yug.” ¹⁸Yawmsaub has rua Mauxe tas, “Ca le coj Noo tug tub Yausua kws muaj Vaaj Ntsuj Plig nrug nraim nwg tuaj hab tsaa teg npuab sau nwg. ¹⁹Kuas nwg sawv ntawm pov thawj Ele‑axa hab cov pejxeem suavdawg xubndag mas koj yuav ua kevcai tsaa nwg taab meeg suavdawg. ²⁰Koj yuav muab koj tug fwjchim ib txha rua nwg sub ib tsoom pejxeem Yixayee suavdawg txhad le noog nwg lug. ²¹Nwg yuav sawv ntawm pov thawj Ele‑axa xubndag mas Ele‑axa yuav swv Uli hab Thumi⚓ ntawm Yawmsaub xubndag saib Yawmsaub lub sab nyam le caag. Nwg hab ib tsoom Yixayee suavdawg yuav tawm moog hab nkaag lug lawv le tug pov thawj has.” ²²Mauxe ua lawv nraim le kws Yawmsaub has rua nwg. Nwg coj Yausua tuaj hab kuas nwg sawv ntawm pov thawj Ele‑axa hab cov pejxeem suavdawg xubndag, ²³mas Mauxe tsaa teg npuab sau Yausua hab ua kevcai tsaa nwg lawv le Yawmsaub has kuas Mauxe ua.