13

Ua rog rau cov Filixatee

¹Thaum Xa‑u pib ua vajntxwv nws hnub nyoog muaj … xyoo, thiab nws kav cov Yixayee tau … xyoo.⚓ ²Xa‑u xaiv cov txivneej Yixayee tau peb txhiab leej, faib ob txhiab leej nrog nws nyob ntawm Mimaj thiab nyob pem toj siab ntawm Npe‑ee, ib txhiab leej nrog Yaunathas nyob ntawm lub moos Kinpe‑a hauv Npeeyamee tebchaws. Dua li ntawd nws kom cov pejxeem txhua tus nyias rov mus rau nyias vaj nyias tsev. ³Yaunathas ntaus yeej cov Filixatee pab tub rog uas zov hauv lub moos Kenpa swb lawm, mas cov Filixatee kuj hnov txog zaj ntawd. Ces Xa‑u txawm kom tshuab raj kub yaj thoob lub tebchaws thiab hais tias, “Cia cov Henplais sawvdaws tau hnov.” ⁴Cov Yixayee sawvdaws tau hnov xov tias Xa‑u twb ntaus yeej Filixatee ib pab tub rog lawm thiab hnov tias cov Filixatee ntxub cov Yixayee heev kawg li. Cov pejxeem thiaj raug hu tawm mus cuag Xa‑u rau ntawm Kilakas.
⁵Cov Filixatee kuj txhij tub rog tuaj ua rog rau cov Yixayee. Lawv muaj peb vam lub tsheb ua rog thiab rau txhiab tus tub rog caij nees thiab cov tub rog coob npaum li tej xuab zeb ntawm ntug hiavtxwv. Lawv tuaj ua yeej nyob rau ntawm Mimaj uas nyob Npe‑avee sab hnub tuaj. ⁶Thaum cov Yixayee pom tias lawv poob rau qhov chaw ti lawm, vim cov Filixatee ntaus lawv heev, lawv thiaj tsiv nraim rau hauv tej qhov tsua, hauv tej kem zeb, hauv tej qhov ntxa thiab hauv tej qhov dej, ⁷thiab muaj qee leej hla tus dej Yaladee khiav mus rau hauv Kas thiab Kile‑a tebchaws. Xa‑u tseem nyob hauv lub moos Kilakas thiab cov pejxeem sawvdaws kuj nrog nws nyob ua tshee hnyo.
⁸Xa‑u nyob tos xya hnub raws li lub sijhawm uas Xamuyee teem tseg, tiamsis Xamuyee tsis tuaj rau ntawm Kilakas, mas cov pejxeem tso Xa‑u tseg khiav ua sab ua sua tag lawm. ⁹Yog li ntawd Xa‑u thiaj hais tias, “Cia li coj tej tsiaj uas muab ua kevcai hlawv xyeem thiab tej uas ua kevcai xyeem sib raug zoo tuaj rau kuv.” Nws thiaj muab ua kevcai hlawv xyeem. ¹⁰Thaum nws muab ua kevcai hlawv xyeem tag lawd, ua ciav Xamuyee txawm tuaj txog. Xa‑u tawm mus tos thiab hu Xamuyee. ¹¹Xamuyee nug tias, “Koj twb ua dabtsi lawm?” Xa‑u teb tias, “Thaum kuv pom cov pejxeem tso kuv tseg khiav ri sua mus lawm thiab koj kuj tsis tuaj raws li lub sijhawm uas teem cia, thiab cov Filixatee los twb txhij tub rog tuaj rau ntawm Mimaj lawm, ¹²mas kuv thiaj hais tias, ‘Nimno cov Filixatee yuav tuaj ntaus kuv ntawm Kilakas, thiab kuv twb tsis tau thov kom Yawmsaub hlub peb,’ kuv thiaj rov yuam kuv mus muab tej tsiaj ua kevcai hlawv xyeem.” ¹³Ces Xamuyee hais rau Xa‑u tias, “Koj ua tej uas ruam kawg li. Koj twb tsis ua raws tej lus uas koj tus Vajtswv Yawmsaub hais kom koj ua. Yog koj tau ua raws li mas Yawmsaub yeej yuav tsa koj thiab koj caj ces ua vajntxwv kav cov Yixayee mus ib txhis li. ¹⁴Tiamsis nimno koj thiab koj caj ces yuav tsis ua vajntxwv kav mus li. Yawmsaub twb nrhiav dua ib tug txivneej uas hum Yawmsaub lub siab lawm. Thiab Yawmsaub twb tsa tus ntawd ua thawj kav nws haiv neeg rau qhov koj tsis ua raws li Yawmsaub hais rau koj.” ¹⁵Ces Xamuyee txawm sawv tsees tawm ntawm Kilakas mus txog lub moos Kinpe‑a hauv Npeeyamee tebchaws.
Mas Xa‑u suav cov neeg uas nrog nws ua ke muaj kwvlam rau pua leej. ¹⁶Xa‑u thiab nws tus tub Yaunathas thiab cov neeg uas nrog ob tug kuj nyob hauv lub moos Kenpa hauv Npeeyamee tebchaws. Tiamsis cov Filixatee tseem ua yeej nyob ntawm Mimaj. ¹⁷Muaj peb pab tub rog tawm hauv cov Filixatee lub yeej mus lws tebchaws, ib pab mus rau ntawm lub moos Aufa uas yog Su‑as tebchaws, ¹⁸ib pab mus rau lub moos Npe Hauloo, thiab ib pab mus rau ciam teb uas saib rau nram hav Xenpau‑i uas ncaj tebchaws moj sab qhua.
¹⁹Thaum ntawd lawv nrhiav thoob plaws hauv Yixayee tebchaws tsis muaj ib tug Kws hlau kiag li, rau qhov cov Filixatee hais tias, “Ntshai tsam cov Henplais yuav ntaus tau ntaj tau hmuv los siv.” ²⁰Cov Yixayee sawvdaws mus ntiav cov Filixatee hov khais hov hlau hov taus hov liag. ²¹Nqe hov khais thiab hov hlau ib rab yog ib phee⚓ nqe hov taus thiab hov hmuv ib rab yog ib feem peb hauv ib sekhee.⚓ ²²Vim li no thaum txog hnub ua rog thiaj nrhiav tsis tau ib rab ntaj ib rab hmuv hauv Xa‑u thiab Yaunathas cov tub rog txhais tes kiag li. Tsuas yog Xa‑u thiab nws tus tub Yaunathas thiaj muaj xwb.
²³Mas cov Filixatee ib pab tub rog mus zov lub dawm uas hla mus rau lub moos Mimaj.

13

Ua Rog Rau Cov Filitees

¹Thaum Xa-ules ua vajntxwv nws hnubnyoog… xyoo thiab nws kav tebchaws Yixalayees tau ob xyoo. ²Xa-ules xaiv tau cov Yixalayees peb txhiab leej ua nws cov tubrog, nws tseg ob txhiab leej nrog nws nyob hauv lub nroog Mikemas thiab saum lub laj roob ntawm lub nroog Npethees, thiab tso ib txhiab leej nrog nws tus tub Yaunathas mus rau nram lub nroog Nkinpe-as, hauv xeem Npeenyamees cheebtsam av. Dua li cov, nws kom lawv rov mus tsev lawm.
³Yaunathas tua cov Filitees tus thawj tubrog tuag rau hauv Nkenpas, thiab cov Filitees puavleej hnov hais tias lawv tus thawj tubrog tuag lawm. Xa-ules txib neeg mus hu thiab tshuab raj tshuab xyu thoob tebchaws kom cov Henplais tuaj mus ua rog. ⁴Thaum cov Yixalayees hnov hais tias, Xa-ules tua cov Filitees tus thawj tubrog tuag thiab hnov hais tias cov Filitees ntxub cov Yixalayees heev. Yog li ntawd, cov Yixalayees thiaj tuaj ua tubrog ntxiv rau Xa-ules cov tubrog hauv lub nroog Nkilenkas.
⁵Cov Filitees txhij tubrog tuaj tua cov Yixalayees; cov Filitees muaj peb caug txhiab lub tsheb nees ua rog, rau txhiab leej tubrog caij nees, thiab muaj tubrog coob ib yam li tej suabzeb ntawm ntug hiavtxwv. Lawv tuaj tsuam yeej rau ntawm Mikemas uas nyob ntawm Npethavees sab hnubtuaj. ⁶Cov Filitees tua cov Yixalayees hnyav heev ua rau cov Yixalayees yuav luag swb. Cov Yixalayees ibtxhia twb khiav mus nkaum rau hauv tej qhov zeb qhov tsua, tej kis zeb kis tsua, lossis hauv tej qhov av thiab hauv tej qhovtshij; ⁷muaj ibtxhia twb khiav hla tus Dej Yauladees mus rau tim tebchaws Nkile-as thiab Khas cheebtsam av lawm.
Xa-ules tseem nyob hauv lub nroog Nkilenkas, thiab cov tubrog uas nrog nws ntshai tshee hnyo. ⁸Nws tos Xamuyees tau xya hnub, raws li Xamuyees hais rau nws, tiamsis Xamuyees tseem tuaj tsis tau txog hauv lub nroog Nkilenkas. Sawvdaws txawm khiav zom zaws tso Xa-ules tseg, ⁹yog li ntawd, Xa-ules thiaj hais rau lawv hais tias, “Nej cia li cab tej tsiaj uas nej coj tuaj tua hlawv fij thiab tej uas fij rau tus TSWV ua kev sib raug zoo los rau kuv.” Ces Xa-ules txawm muab tsiaj tua hlawv fij rau tus TSWV, ¹⁰thaum Xa-ules muab tsiaj tua hlawv fij tas, Xamuyees txawm tuaj txog ntua. Xa-ules tawm mus cuag Xamuyees thiab tos txais nws, ¹¹tiamsis Xamuyees nug hais tias, “Koj ua dabtsi tod?”
Xa-ules teb hais tias, “Sawvdaws khiav zom zaws tso kuv tseg, thiab koj tsis tuaj raws li koj teem tseg; dua li ntawd, cov Filitees twb tuaj sib sau rau hauv lub nroog Mikemas lawm. ¹²Kuv thiaj xav hais tias, ‘Cov Filitees yeej yuav tuaj tua kuv hauv lub nroog Nkilenkas no, thiab kuv tseem tsis tau ua ib yam dabtsi kom tus TSWV pab kuv.’ Yog li ntawd, kuv thiaj xav hais tias cia kuv muab tsiaj tua fij rau tus TSWV.”
¹³Xamuyees teb hais tias, “Koj ruam kawg li koj thiaj ua tej no, koj yeej tsis mloog tus TSWV uas yog koj tus Vajtswv tej lus samhwm rau koj. Yog koj mloog tus TSWV lus, nws yuav cia koj thiab koj cov xeebntxwv ua vajntxwv kav cov Yixalayees mus li. ¹⁴Tiamsis, vim koj tsis mloog tus TSWV lus, nimno koj yuav tsis tau kav cov Yixalayees lawm. Tus TSWV yuav tsa dua ib tug uas ua haum nws siab los kav nws haivneeg.”
¹⁵Xamuyees txawm tawm hauv lub nroog Nkilenkas mus lawm. Cov neeg uas tseem nrog Xa-ules nyob thiaj nrog nws mus rau ntawm nws cov tubrog. Lawv tawm hauv lub nroog Nkilankas mus txog rau ntawm lub nroog Nkinpe-as hauv xeem Npeenyamees cheebtsam av. Xa-ules txheeb nws cov tubrog, tseem tshuav kwvlam li rau pua leej. ¹⁶Xa-ules thiab nws tus tub Yaunathas, thiab nkawd cov tubrog tsuam yeej rau ntawm lub nroog Nkenpas hauv xeem Npeenyamees cheebtsam av; cov Filitees tsuam yeej rau ntawm lub nroog Mikemas. ¹⁷Cov Filitees faib ua peb pab tawm hauv lawv lub yeej tuaj: ib pab mus rau ntawm Aufelas hauv Sualis cheebtsam av, ¹⁸ib pab mus rau ntawm Npethes Hauloos, thiab ib pab mus rau ntawm ciamteb uas ntsia pom lub Hav Xenpauyees thiab lub roob mojsab qhua.
¹⁹Lub sijhawm ntawd, nyob hauv tebchaws Yixalayees tsis muaj ib tug txawj ntaus hlau li, rau qhov cov Filitees tsis pub cov Henplais ntaus ntaj ntaus hmuv li. ( ²⁰Cov Yixalayees thiaj coj lawv tej khais, tej taumtxhob, tej taus thiab tej liag mus rau cov Filitees kho thiab hov xwb; ²¹hov ib rab taus thiab tawm tus ko yog ib npib, hov rab khais thiab rab taumtxhob yog ob npib.) ²²Yog li ntawd, thaum lawv sib tua, cov tubrog Yixalayees thiaj tsis muaj ntaj lossis hmuv li, tsuas yog Xa-ules thiab nws tus tub Yaunathas thiaj li muaj xwb.
²³Cov tubrog Filitees ib pab tuaj zov ntawm lub Dawm Mikemas.