12

¹Tus uas nyiam tej lus qhuab qhia
kuj yog nyiam kev txawj ntse,
tus uas ntxub tej lus qhuab ntuas
yog tus ruam.
²Yawmsaub txaus siab rau tus neeg zoo,
tiamsis tus uas ntaus tswvyim phem
mas Yawmsaub yuav rau txim.
³Txojkev limhiam ua tsis tau
rau neeg nyob ruaj nreeg,
tiamsis cov uas ncaj ncees
yuav cog cag tob dob tsis tau li.
⁴Pojniam zoo
mas yog tus txiv lub mom kub,
tiamsis tus pojniam rhuav plhu
zoo yam li tus kab mob
uas ua rau nws txiv tej pob txha lwj.
⁵Tus neeg ncaj ncees tej kev xav kuj ncaj,
tiamsis tus neeg limhiam tej lus taw qhia
yog lus ntxeev ntxias.
⁶Tus neeg limhiam tej lus nyas nrhw
ua kom los ntshav,
tiamsis tus uas ncaj ncees lub qhov ncauj
pab neeg dim.
⁷Tus neeg limhiam raug rhuav tshem
ploj tag lawm,
tiamsis tus neeg ncaj ncees lub tsev
yuav nyob ruaj.
⁸Neeg yuav raug luag qhuas
npaum li uas nws muaj tab fab,
tiamsis tus neeg siab nkhaus
yuav raug luag saib tsis taus.
⁹Tus uas luag saib tsis taus
los tseem muaj tub qhe,
kuj zoo dua tus uas tsab ua loj
tiamsis tsis muaj noj.
¹⁰Tus neeg ncaj ncees
yeej hlub nws cov tsiaj txhu,
tiamsis tus neeg limhiam kev khuvleej
yog ua nyaum heev.
¹¹Tus neeg uas laij teb
yuav muaj mov noj ntau,
tiamsis tus uas ua tej haujlwm tsis muaj qabhau
yeej yog tsis thoob tsib.
¹²Tus neeg limhiam ntshaw
tej uas ua phem es tau los,
tiamsis tus neeg ncaj ncees
yuav cog cag ruaj khov.
¹³Tus neeg phem rov mag tej lus txhaum
uas nws daim tawv ncauj hais,
tiamsis tus neeg ncaj ncees
khiav dim tej kev ceeblaj.
¹⁴Tej lus uas yus hais
ua rau yus tau tej yam zoo tsau npo,
thiab tej haujlwm uas yus txhais tes ua
rov los pauj rau yus.
¹⁵Tus neeg ruam pom tias
nws txojkev raug cai lawm,
tiamsis tus uas txawj ntse
mloog tej lus taw qhia.
¹⁶Yuav paub tus neeg ruam
kev chim siab tamsid,
tiamsis tus neeg ntse mas tsis quav ntsej
qhov uas luag saib tsis taus nws.
¹⁷Tus uas hais tseeb nws ua timkhawv ncaj,
tiamsis tus cuav timkhawv
mas hais lus dag ntxias.
¹⁸Tus neeg ncauj sai tej lus
mas zoo yam nkaus li rab ntaj chob,
tiamsis tus neeg ntse tus nplaig
yog tshuaj kho zoo.
¹⁹Daim tawv ncauj uas hais tseeb
yuav nyob ib txhis,
tus nplaig txawj dag
nyob ib ntsais muag xwb.
²⁰Txojkev dag ntxias nyob hauv cov neeg
uas ntaus tswvyim ua phem lub siab,
tiamsis cov uas npaj kom
sawvdaws nyob sib hum tau siab xyiv fab.
²¹Tsis muaj vij sub vij sw dabtsi
poob rau saum cov neeg ncaj ncees,
tiamsis cov neeg limhiam
tsuas saws tej kev ceeblaj pov khawv nkaus xwb.
²²Yawmsaub ntxub
daim tawv ncauj txawj dag kawg li,
tiamsis cov uas xyaum ua ncaj
ua rau nws zoo siab.
²³Tus uas paub tab
yeej muab nws kev txawj ntse npog cia,
tiamsis tus uas ruam
tshaj tawm nws txojkev ruam.
²⁴Txhais tes nquag yuav tau kav,
tiamsis tus tub nkeeg yuav
raug muab quab yuam ua haujlwm.
²⁵Kev ntxhov siab ua rau neeg poob siab,
tiamsis lo lus zoo ua rau nws xyiv fab.
²⁶Tus neeg ncaj ncees tig ntawm txojkev phem,⚓
tiamsis cov neeg limhiam txojkev
coj lawv mus yuam kev.
²⁷Tus tub nkeeg yuav cev tes
muab tsis tau los noj,⚓
tiamsis tus neeg nquag
yuav tau tej nyiaj txiag uas muaj nqes.
²⁸Txojkev ncaj ncees yog txojkev tau txojsia,
tiamsis txojkev txhaum coj mus txog qhov tuag.⚓

12

¹Tus neeg uas nyiam kev txawj ntse nws xav kom luag qhia nws thaum nws ua txhaum. Tus neeg uas tsis nyiam kev qhuab ntuas yog neeg ruam.
²Tus TSWV txaus siab rau cov neeg ua zoo, tiamsis nws rau txim rau cov neeg uas nyiam ua phem ua qias.
³Cov neeg ua phem yeej nyob tsis muaj chaw, tiamsis cov neeg ncaj ncees nyob ruaj khov kho.
⁴Tus pojniam uas tsimtxiaj yog lub kaus mom yeebkoob rau nws tus txiv ntoo, tiamsis tus pojniam uas coj kev txajmuag los rau nws tus txiv zoo ib yam li cov kua paug uas nyob hauv tus txiv cov pobtxha.
⁵Cov neeg ncaj ncees yeej ua ncaj rau koj, tiamsis cov neeg siab phem xav dag ntxias koj xwb.
⁶Cov neeg siab phem tej lus tua neeg tuag, tiamsis cov neeg ncaj ncees tej lus pab tau lwm tus uas raug kev txomnyem nyuaj siab dim.
⁷Cov neeg siab phem ntog thiab puastsuaj mus, lawv yuav tsis muaj xeebntxwv tseg li, tiamsis cov neeg ncaj ncees tej xeebntxwv yuav nyob ruaj khov.
⁸Yog koj txawj ntse, luag yuav qhuas koj. Yog koj ruam, luag yuav saib tsis taus koj.
⁹Tus neeg uas luag saib tsis tseemceeb dabtsi, tiamsis nws muaj tubtxib, zoo dua tus neeg khavtheeb uas tsis muaj noj tsis muaj haus.
¹⁰Tus neeg siab zoo yeej tu nws tej tsiaj txhu zoo, tiamsis tus neeg siab phem yeej tsimtxom nws tej tsiaj txhu.
¹¹Tus neeg nquag ua liaj ua teb, muaj noj nplua mias, tiamsis tus neeg ruam muab nws lub sijhawm siv tsis muaj nqis.
¹²Txhua yam uas tus neeg siab phem xav tau, yog nrhiav kev ua phem ua qias xwb, tiamsis tus neeg ncaj ncees nyob ruaj khov.
¹³Tus neeg siab phem tej lus rov ua lub vojhlua soo nws, tiamsis tus neeg ncaj ncees yuav khiav dim ntawm tej teebmeem.
¹⁴Koj yuav tau txais nqi zog raws li tej lus uas koj hais thiab tej haujlwm uas koj ua. Koj yuav tau txais raws li koj tau ua los lawm.
¹⁵Cov neeg ruam xav hais tias, lawv yog cov uas hais yog, tiamsis cov neeg uas mloog luag tej lus qhuab ntuas yog neeg txawj ntse.
¹⁶Thaum tus neeg ruam chim, nws ua rau luag paub tamsim ntawd ntag, tus neeg ntse nyiaj tau tej uas luag ua saib tsis taus nws.
¹⁷Tus neeg ncaj ncees ua timkhawv tseeb, tiamsis tus neeg dag ua timkhawv tsis ncaj.
¹⁸Tej lus tsis zoo chob luag siab ib yam li rab ntaj, tiamsis lo lus zoo nplig tau luag lub siab.
¹⁹Tus neeg uas hais lus dag yuav ua neej nyob tsis ntev, tiamsis tus neeg uas hais lus tseeb yuav muaj sia nyob ntev.
²⁰Cov neeg uas tuav hauv ua kev phem lawv yog neeg dag ntxias, tiamsis cov neeg ua zoo yuav tau kev kaj siab lug.
²¹Tsis muaj kev phem los raug cov neeg ncaj ncees, tiamsis cov neeg siab phem yuav raug kev txomnyem.
²²Tus TSWV ntxub tej neeg uas hais lus dag, tiamsis nws txaus siab rau cov neeg uas hais lus tseeb.
²³Cov neeg txawj ntse muab tej uas lawv paub khaws cia rau nruab siab, tiamsis cov neeg ruam muab txojkev ruam qhia rau sawvdaws paub.
²⁴Kev nquag yuav ua rau koj muaj hwjchim; kev tubnkeeg yuav ua rau koj mus ua luag qhev.
²⁵Kev txhawjxeeb ua tau rau koj kev zoo siab ploj mus, tiamsis tej lus zoo yuav txhawb tau koj lub zog.
²⁶Tus neeg ncaj ncees coj nws tus phoojywg mus rau txojkev zoo, tiamsis tus neeg siab phem coj mus rau kev puastsuaj.
²⁷Yog koj ua neeg tubnkeeg, koj yuav tsis tau dabtsi, tiamsis yog koj nquag ua haujlwm, koj yuav tau txais koob hmoov.
²⁸Kev ncaj ncees yog txojkev uas tau txojsia; kev ua phem yog txojkev tuag.