10

¹Cov Yixalayees zoo ib yam li tsob txiv hmab uas txi txiv ncw heev. Lawv vammeej npaum twg, lawv yimhuab teeb thaj ntau npaum ntawd. Lawv lub tebchaws ua tau qoobloo ntau npaum twg, lawv yimhuab teeb ncej zeb ntau npaum ntawd rau lawv pe. ²Cov neeg uas muaj lub siab dag ntxias yuav raug kev txomnyem vim lawv tej kev txhaum ntawd. Vajtswv yuav rhuav lawv tej thaj thiab tsoo lawv tej ncej zeb kom puastsuaj tas.
³Tsis ntev cov neeg no yuav hais tias, “Peb tsis muaj vajntxwv, rau qhov peb tsis hwm tus TSWV. Txawm yog peb muaj vajntxwv los nws yuav ua tau dabtsi pab peb?” ⁴Lawv hais lus ua dog ua dig tsis muaj hauvpaus hauvntsis lawv coglus dag. Lawv muab kev ncaj ncees hloov ua kev tsis ncaj ncees ib yam li tsob tshuaj kuab taw hnyuv uas loj hlob hauv daim teb uas luag laij cia lawm.
⁵Cov neeg uas nyob hauv lub nroog Xamalis yuav ntshai thiab quaj ntsuag tus mlom heev nyuj uas yog muab kub nchuav ua nyob hauv lub nroog Npethees. Lawv thiab cov povthawj uas pe tus mlom ntawd yuav quaj ntsuag. Lawv yuav tsa suab quaj thaum luag muab tej kub uas vuam tus mlom ntawd tev tas lawm. ⁶Luag yuav coj tus mlom ntawd mus pub rau cov Axilias tus vajntxwv uas muaj hwjchim loj. Yixalayees yuav poob ntsejmuag thiab txajmuag vim nws ua raws li luag tej lus haub ntxias. ⁷Yixalayees tus vajntxwv yuav raug luag cab mus ib yam li daim nplais ntoo uas dej tshoob lawm. ⁸Tej tsev teev mlom uas nyob saum roob hauv lub nroog Avees uas cov Yixalayees pheej mus pe mlom yuav raug puastsuaj tas. Pos thiab nroj yuav tuaj laum lawv tej thaj. Tej neeg yuav thov tej roob hais tias, “Thov npog peb lauj!” thiab thov tej pov roob hais tias, “Thov txhub peb lauj!”.

Tus TSWV Txiav Txim rau Cov Yixalayees

⁹Tus TSWV hais tias, “Txij thaum cov Yixalayees ua txhaum rau kuv hauv lub nroog Nkinpe-as los, lawv yeej tsis tso txojkev txhaum uas lawv ua ntawd tseg li. Yog li ntawd, yuav muaj kev tsov kev rog tuaj tua lawv hauv lub nroog Nkinpe-as. ¹⁰Kuv yuav tawmtsam cov neeg ua txhaum no thiab rau txim rau lawv. Ntau haivneeg yuav sib sau ua ke tuaj tua lawv, thiab lawv yuav raug txim rau qhov lawv tau ua txhaum ntau heev.
¹¹“Yav tas los cov Yixalayees zoo ib yam li tus xyuas nyuj uas twb cob tau thiab tos rawv coj mus tsuj nplej lawm xwb. Tiamsis kuv npaj siab muab tus quab khuam rau nws lub cajdab uas ntug ntoob kom nws ua haujlwm hnyav dua qhov qub. Kuv kom Yudas cab rab khais thiab kom Yixalayees cab lub zuag. ¹²Kuv hais tias, ‘Nej cia li mus laij dua daim teb tshiab rau nej cog kev ncaj ncees thiab sau tej koob hmoov uas kuv muab rau txhua tus uas muab siab npuab kuv. Twb txog lub sijhawm uas nej los cuag kuv uas yog nej tus TSWV lawm, kuv yuav los thiab nchuav koob hmoov rau nej.’ ¹³Tiamsis nej tsis ua li ntawd; nej tseb kev phem thiab sau kev tsis ncaj ncees nkaus xwb. Nej tej kev dag twb tawg paj txi txiv rau nej noj lawm.
“Vim nej cia siab rau nej tej tsheb nees thiab nej cov tubrog uas coob heev, ¹⁴thiaj yuav muaj tsov muaj rog tuaj tua nej haivneeg, thiab tagnrho nej tej chaw fajxwm yuav puastsuaj tas. Mas yuav zoo ib yam li hnub uas Vajntxwv Salemas tuaj tua lub nroog Npethanpees; tej pojniam thiab cov menyuam raug luag muab tsuj tuag tas. ¹⁵Tej xwm zoo li ntawd yuav los raug nej cov neeg uas nyob hauv lub nroog Npethees vim tej kev phem kev qias uas nej ua tas los lawm. Thaum pib sib tua xwb cov Yixalayees tus vajntxwv twb raug tua tuag lawm.”

10

¹Yixayee yog tsob txwv maab kws hlub zoo hab txw txwv ncw.
Yimfuab txw txwv ntau kuj yimfuab ua thaaj teev daab ntau.
Thaus puab lub tebchaws vaam meej tuaj,
puab yimfuab ua tej ncej teev daab zoo nkauj tuaj.
²Puab lub sab daag,
nwgnuav puab txhad yuav tsum rws puab lub txem.
Yawmsaub yuav tsoo puab tej thaaj pov tseg,
hab muab puab tej ncej teev daab ua kuas puam tsuaj.
³Thaus hov puab yuav has tas,
“Peb tsw muaj vaajntxwv
vem peb tsw paub ntshai Yawmsaub.
Yog peb muaj vaajntxwv
nwg yuav paab tau peb le caag?”
⁴Puab has lug do do xwb,
puab laam cog lug twv qhuav qhuav xwb.
Vem le nuav kev ua plaub ua ntug yuav hlaav tuaj
yaam nkaus le tej nroj tsuag muaj taug
tuaj lawv kwj nav khais huv daim teb.
⁵Cov Xamali tshee quas nyo vem txhawj
txug tug txoov daab thaav nyuj ntawm Npe‑avee.
Puab yuav quaj ntsuag hab cov pov thawj kws teev daab
yuav quaj nyav tug txoov daab,
vem tug txoov daab hov lub koob meej pluj lawm.
⁶Tug txoov daab hov yuav raug coj moog rua Axilia tebchaws
pub ua tshaav ntuj rua tug vaajntxwv kws luj kawg.
Efa‑i yuav raug poob ntsej muag,
Yixayee yuav txaaj muag
vem yog qhov kws ua txoov daab.⚓
⁷Xamali tug vaajntxwv yuav puam tsuaj,
yaam nkaus le tej nplais ntoo
ntaab sau nplaim dej moog.
⁸Tej chaw sab teev daab huv lub moos Avee,
kws yog Yixayee lub txem,
yuav raug puam tsuaj taag.
Tej xuav paug hab nroj tsuag
yuav tuaj rua sau puab tej thaaj xyeem.
Puab yuav has rua tej roob tas,
“Ca le txhub hlo peb lauj,”
hab has rua tej pov roob tas,
“Ca le nphau lug tsuam peb.”

⁹“Cov Yixayee 'e, mej yeej ua txhum
txwj thaus ua huv lub moos Kinpe‑a.
Puab tseed ua quj qeeg ntawm lub chaw hov lug le.
Kev ua rog tseed yuav tsw lug raug puab
ntawm Kinpe‑a lov?
¹⁰Kuv yuav tuaj rau txem rua cov tuabneeg tawv ncauj hov.
Ib tsoom tebchaws yuav sau zog tuaj ua ke
tawm tsaam puab,
mas puab yuav raug khi
vem muaj ob npaug kev txhum.
¹¹Efa‑i yog tug xyuas nyuj kws cob tau,
nwg nyam tsuj qoob huv lub tshaav,
kuv tsw tau yuam nwg lub cej daab zoo nkauj
ua num nyaav.
Tassws kuv yuav muab Efa‑i hai tug quab,
Yuta yuav tsum laij,
Yakhauj yuav tsum muab lob phuaj sua.
¹²Ca le tseb txujkev ncaaj nceeg rua mej tug kheej,
ca le sau tej kws tau ntawm qhov kws hlub kuv,
ca le laij daim teb kws muab tso tseg lawm,
tsua qhov txug swjhawm kws yuav moog nrhav Yawmsaub,
sub nwg txhad lug tso txujkev dim rua mej.
¹³Mej tub cog txujkev limham lawm,
mej tub sau txujkev phem,
mej tub saws tej kws mej daag tau lug noj.
Vem mej tso sab rua mej tej tsheb neeg ua rog
hab tso sab rua mej cov tub rog kws coob coob,
¹⁴lub suab ua rog txhad yuav nrov tshwm
rua huv mej haiv tuabneeg,
mej tej chaw ruaj khov huvsw
yuav raug muab ua puam tsuaj,
ib yaam le Samaa muab lub moos Npe Anpee
ua puam tsuaj rua nub kws ua rog.
Leej nam raug muab ntsawm nduag ua tej dwb daim
nrug nwg cov mivnyuas ua ke.
¹⁵Cov tuabneeg huv Npe‑ee 'e,
mej yuav raug le nuav ntaag lauj,
tsua qhov mej txujkev limham luj kawg le.
Thaus kaaj ntug Yixayee tug vaajntxwv
yuav raug muab txav tu nrho.”