1Tus TSWV hais rau Mauxes hais tias, 2“Nej yuav tsum muab nej cov Yixalayees tej tub hlob fij rau kuv mus ibtxhis, thiab nej yuav tsum muab tej tsiaj thawj tug menyuam uas yog tus txiv fij rau kuv ua kuv tug.”
Ua Kevcai Noj Ncuav Tsis Xyaw Keeb
3Mauxes hais rau cov Yixalayees hais tias, “Nej yuav tsum nco ntsoov hnub ntawd, rau qhov hnub ntawd tus TSWV uas muaj hwjchim loj kawg nkaus tau coj nej tawm hauv tebchaws Iziv qhov chaw uas nej ua luag qhev los. Hnub ntawd nej tsis txhob noj tej ncuav uas xyaw keeb li. 4Hnub ntawd yog lub ib hlis ntuj uas yog lub hli Anpis uas nej khiav tawm hauv lub tebchaws Iziv los. 5Tus TSWV tau coglus tseg rau nej cov yawgkoob hais tias nws yuav muab cov Kana-as, cov Hitis, cov Amoos, cov Hivis thiab cov Yenpus lub tebchaws rau nej nyob. Thaum Vajtswv coj nej mus txog rau hauv lub tebchaws vammeej uas av rog thiab zoo qoob, txhua xyoo thaum lub ib hlis ntuj nej yuav tsum ua kevcai noj ncuav tsis xyaw keeb li no. 6Xya hnub ntawd nej yuav tsum noj cov ncuav tsis xyaw keeb nkaus xwb, mas hnub xya nej yuav tsum ua rooj mov noj ua tus TSWV tsaug. 7Nej yuav tsum noj ncuav tsis xyaw keeb kom txwm nkaus xya hnub; tsis pub kom muaj keeb lossis ncuav xyaw keeb nyob hauv nej lub tebchaws li. 8Hnub uas pib ua kevcai ntawd, koj yuav tsum qhia txhua yam rau koj cov menyuam hais tias, ‘Kuv ua li no, rau qhov tus TSWV tau ua rau kuv thaum kuv khiav tawm hauv tebchaws Iziv los.’ 9Txoj kevcai no yuav ua rau nej nco ntsoov kawm thiab nco tus TSWV tej lus, ib yam li tej uas nej coj rawv ntawm nej tes lossis coj rawv saum nej hauvpliaj, ua rau nej nco ntsoov tus TSWV tej lus, rau qhov tus TSWV tus uas muaj hwjchim tau coj nej tawm nram tebchaws Iziv los. 10Nej yuav tsum ua txoj kevcai no txhua xyoo thaum txog lub caij no, tsis txhob tso tseg li.
Tus Tub Hlob thiab Thawj Tug Tsiaj uas Yog Tus Txiv
11“Tus TSWV yuav coj nej mus nyob hauv cov Kana-as lub tebchaws uas nws twb coglus rau nej thiab nej cov yawgkoob lawm. Thaum nws muab lub tebchaws ntawd pub rau nej, 12nej yuav tsum muab nej tej tub hlob fij rau tus TSWV. Nej tej tsiaj thawj tus menyuam uas yog tus txiv puavleej yog tus TSWV tug, 13tiamsis txhua tus menyuam txiv neesluav, nej yuav tsum coj ib tug menyuam yaj mus hloov chaw txhiv ntawm tus TSWV rov qab. Yog nej tsis xav txhiv tus menyuam neesluav rov qab, nej cia li muab lov cajdab kom tuag. Nej yuav tsum txhiv nej tej tub hlob txhua tus rov qab huv tibsi thiab. 14Lwm hnub, thaum koj tus tub nug koj hais tias, ‘Ua li no, lub ntsiab yog li cas?’ Koj qhia rau nws hais tias, ‘Tus TSWV tau siv nws lub hwjchim uas loj kawg nkaus coj peb tawm nram tebchaws Iziv qhov chaw uas peb ua luag qhev los. 15Thaum Falaus muaj lub siab tawv tsis kam tso peb tawm, tus TSWV thiaj li tua cov Iziv tej tub hlob hauv lub tebchaws ntawd thiab tej tsiaj thawj tug menyuam uas yog tus txiv tuag tas huv tibsi. Vim li no peb thiaj li muab peb tej tsiaj thawj tus menyuam uas yog tus txiv tua fij rau tus TSWV, thiab txhiv peb tej tub hlob rov qab.’ 16Txoj kevcai no, yog ua ib qho rau nej nco ntsoov rau nruab siab ib yam li tej uas peb coj ntawm peb txhais tes lossis saum peb hauvpliaj, ua rau peb nco ntsoov hnub uas tus TSWV uas muaj hwjchim loj kawg nkaus tau coj peb tawm hauv lub tebchaws Iziv los.”
Tauv Huab Thiab Tus Nplaim Hluavtaws
17Thaum Falaus tso cov Yixalayees lawm, Vajtswv tsis coj lawv taug txojkev uas raws ntug hiavtxwv ncaj nraim mus rau pem tebchaws Filitees, txawm yog txoj kev ntawd ze los nws tsis coj lawv mus txoj ntawd. Vajtswv xav hais tias, “Kuv tsis xav kom cov Yixalayees hloov siab khiav rov qab mus rau nram lub tebchaws Iziv thaum muaj kev sib ntaus siab tua ntawm kev.” 18Yog li ntawd, Vajtswv thiaj coj lawv taug kev raws tiaj suabpuam mus rau tom Hiavtxwv Liab. Thaum cov Yixalayees taug kev tawm hauv lub tebchaws Iziv los, lawv yeej npaj cuabyeej ua rog nrog ncig tos sib tua thiab xwb. 19Mauxes coj Yauxej cov pobtxha nrog nws los, raws li Yauxej kom cov Yixalayees coglus rau Yauxej hais tias, “Thaum Vajtswv los pab nej dim lawm, nej yuav tsum coj kuv tej pobtxha tawm hauv lub tebchaws Iziv no nrog nej mus.” 20Cov Yixalayees khiav tawm hauv Xukaus mus tsuam chaw so rau ntawm Ethas uas nyob ntawm ntug tiaj suabpuam. 21Nruab hnub tus TSWV ua ib tauv huab mus ua lawv ntej coj lawv kev, thiab hmo ntuj nws ua ib tug nplaim hluavtaws cig lamlug mus ua lawv ntej kom lawv pom kev, lawv taug kev mus nruab hnub hmo ntuj los tau huv tibsi. 22Nruab hnub tauv huab coj lawv kev mus tas hnub, thiab hmo ntuj tus nplaim hluavtaws cig lamlug coj lawv kev mus tas hmo.
13
Pub cov tub hlub ua Yawmsaub tug
1Yawmsaub has rua Mauxe tas, 2“Ca le muab txhua tug tub hlub pub ua kuv tug. Txhua tug Yixayee thawj plaab mivnyuas tsw has tuabneeg lossws tsaj txhu los yog puavleej yog kuv le.” 3Mauxe has rua cov pejxeem tas, “Ca le ncu txug nub nua kws mej tawm huv Iyi tebchaws huv txujkev ua qhev lug, tsua qhov Yawmsaub swv nwg txhais teg kws muaj fwjchim coj mej tawm lug. Mas tsw xob noj tej ncuav xyaw keeb. 4Nub nua mej yuav tawm moog, yog lub hli Anpis. 5Thaus Yawmsaub coj mej moog txug cov Khana‑aa, cov Hithai, cov Amaulai, cov Hivai hab cov Yenpu lub tebchaws, yog lub tebchaws kws Yawmsaub cog lug ruaj rua mej tej laug tas yuav muab rua mej, yog lub tebchaws kws muaj kua mig hab zwb ntaab ndwg ndo, mas mej yuav coj txuj kevcai nuav rua lub hli Anpis nuav. 6Yuav tsum noj ncuav tsw xyaw keeb xyaa nub, mas nub kws xyaa yuav ua kevcai noj haus xyeem rua Yawmsaub. 7Yuav noj ncuav tsw xyaw keeb kuas puv xyaa nub. Tsw xob kheev kuas muaj ib qho ncuav xyaw keeb nyob huv mej lossws muaj ib qho keeb nyob huv mej lub tebchaws hlo le. 8Nub ntawd mej yuav tsum has rua mej tej tub tas, ‘Qhov kws kuv ua le nuav yog vem tej xwm txheej kws Yawmsaub ua paab kuv rua thaus kuv tawm huv Iyi tebchaws.’ 9Txuj kevcai nuav yuav zoo le lub hom thawj kws nyob huv mej txhais teg hab ua lub chaw ncu rua ntawm mej hauv plaj, sub Yawmsaub txuj kevcai txhad nyob huv mej qhov ncauj, tsua qhov Yawmsaub swv nwg txhais teg kws muaj fwjchim coj mej tawm huv Iyi tebchaws lug. 10Vem le nuav mej yuav tsum ua lawv le tej kaab ke nuav rua lub swjhawm kws teem ca rua txhua xyoo. 11“Thaus Yawmsaub coj mej moog txug cov Khana‑aa lub tebchaws hab muab lub tebchaws rua mej lawv le nwg cog lug tseg rua mej hab mej tej laug lawd, 12mas txhua tug kws yug thawj plaab lug yuav muab cais pub ua Yawmsaub tug. Mej tej tsaj txhu thawj tug mivnyuas kws yog txwv txhua tug yeej yog Yawmsaub le. 13Mas yuav muab ib tug mivnyuas yaaj txhwv thawj tug mivnyuas neeg luav. Yog tsw txhwv mas muab luv cej daab pov tseg. Mej yuav tsum txhwv tuabneeg thawj tug tub hlub huvsw hab. 14Yaav tom hauv ntej thaus mej tej tub nug mej tas, ‘Ua caag yuav ua le nuav?’ ca le has rua nwg tas, ‘Yawmsaub swv nwg txhais teg kws muaj fwjchim coj peb tawm huv Iyi tebchaws huv txujkev ua qhev lug. 15Thaus Falau ua lub sab tawv tsw kheev tso peb moog, Yawmsaub txhad tua txhua tug tub hlub huv Iyi tebchaws tsw has tuabneeg hab tsaj txhu. Vem le nuav kuv txhad muab thawj plaab mivnyuas tsaj kws yog txwv xyeem rua Yawmsaub tassws txhua tug tub hlub kuv muab txhwv ca.’ 16Txuj kevcai nuav yuav zoo le lub hom thawj kws nyob huv mej txhais teg hab ua lub chaw ncu rua ntawm mej hauv plaj, tsua qhov Yawmsaub swv nwg txhais teg kws muaj fwjchim coj peb tawm huv Iyi tebchaws lug.”
Ncej fuab hab ncej suavtawg
17Thaus Falau tso cov Yixayee tawm moog lawm, txawm yog txujkev huv Filixatee tebchaws ze dua los Vaajtswv tsw coj puab taug txujkev hov, tsua qhov Vaajtswv has tas, “Ntshai tsaam thaus kuv haiv tuabneeg ntswb kev ua rog puab yuav ntxeev sab thim rov qaab moog Iyi tebchaws.” 18Vaajtswv txhad coj puab zos moog huv tebchaws moj saab qhua rua Havtxwv Lab.⚓ Cov Yixayee tawm huv Iyi tebchaws muaj cuab yeej ua rog txhwj zog. 19Mauxe coj Yauxej cov pob txhaa moog hab, vem yog Yauxej kuas cov Yixayee cog lug ruaj has tas, “Vaajtswv yuav lug saib mej, mas mej yuav tsum coj kuv cov pob txhaa tawm ntawm nuav moog hab.”⚓ 20Puab tawm ntawm Xukhau moog tsuam chaw rua ntawm Ethaa kws npuas ntug tebchaws moj saab qhua. 21Thaus nruab nub Yawmsaub nyob huv ib tug ncej fuab coj puab kev, thaus mo ntuj Yawmsaub nyob huv ib tug ncej suavtawg ci rua puab pum kev, sub puab txhad moog tau kev nruab nub mo ntuj. 22Tug ncej fuab tuaj nruab nub hab tug ncej suavtawg tuaj mo ntuj tsw ncaim ntawm cov Yixayee hauv ntej hlo le.