36

Xenakhawli tuaj ntaus Yeluxalee

(2Vntx. 18:13,17-37; 2VKk. 32:9-19)

¹Xyoo kaum plaub kws Hexekhiya ua vaajntxwv kaav mas Axilia tug vaajntxwv Xenakhawli tuaj ntaus Yuta txhua lub moos kws muaj ntsaa loog ruaj khov mas txeeb tau huvsw. ²Axilia tug vaajntxwv khaiv Lasakhe⚓ coj ib paab tub rog coob tawm ntawm lub moos Lakhi moog rua ntawm vaajntxwv Hexekhiya huv Yeluxalee. Mas nwg moog sawv ntawm tug cav dej kws tso dej tawm ntawm lub paag saab peg lug, yog ntawm txujkev kws moog rua daim teb Ntxhua Xuv. ³Hikhiya tug tub Eliyakhi kws yog tug saib vaajntxwv lub tsev hab Sena kws yog tug tub sau ntawv hab Axas tug tub Yau‑av kws yog tug kws sau ntaub ntawv keeb kwm, mas puab tuaj cuag Lasakhe.
⁴Lasakhe has rua puab tas, “Ca le has rua Hexekhiya tas, ‘Tug fuabtais luj kws yog Axilia tug vaajntxwv has tas, Koj tso sab rua daabtsw le kod? ⁵Koj xaav tas mej tej nyuas lug sablaaj xwb yog daim phaj hab fwjchim ua tau rog nua lov? Nwgnuav koj vaam leejtwg es koj txhad faav xeeb rua kuv? ⁶Koj swm xaav saib, nwgnuav koj vaam khom Iyi kws yog tug paas nreg lojkov kws luv lawm, yog leejtwg nreg yuav chob nwg txhais teg. Iyi tug vaajntxwv Falau zoo yaam nkaus le hov rua txhua tug kws vaam khom nwg. ⁷Tassws yog koj has rua kuv tas, “Peb tso sab rua Yawmsaub kws yog peb tug Vaajtswv,” mas tug Vaajtswv hov puas yog tug kws Hexekhiya muab tej chaw sab kws pe hawm nwg hab nwg tej thaaj xyeem rhuav pov tseg, hab has rua Yuta hab Yeluxalee tas, “Mej yuav tsum pe Vaajtswv ntawm lub thaaj nuav xwb?”
⁸“ ‘Ca le tuaj nrug kuv tug tswv kws yog Axilia tug vaajntxwv cog lug tseg. Kuv yuav muab ob txheeb tug neeg rua koj yog tas koj nrhav tau tuabneeg caij cov neeg hov. ⁹Koj yuav ua le caag lawv tau kuv tug tswv le ib tug thawj rog kws miv dhau tej rua thaus koj tseed vaam khom Iyi hab puab tej tsheb ua rog hab tej tub rog caij neeg? ¹⁰Tsw yog le ntawd xwb, qhov kws kuv tuaj ntaus lub tebchaws nuav ua kuas puam tsuaj tsw yog Yawmsaub nrug nraim lov? Yawmsaub has rua kuv tas, Ca le moog ntaus lub tebchaws nuav hab ua kuas puam tsuaj.’ ”
¹¹Mas Eliyakhi hab Sena hab Yau‑av has rua Lasakhe tas, “Thov koj has ua lug Alaa rua peb kws yog koj le tub qhe, peb yeej paub tej lug hov. Thov tsw xob has ua lug Yuta rua cov tuabneeg kws nyob sau tej ntsaa loog tau nov.” ¹²Tassws Lasakhe has tas, “Tsw yog kuv tug vaajntxwv khaiv kuv tuaj has tej lug nuav rua mej hab mej tug vaajntxwv xwb. Yeej yog has rua cov kws nyob sau tej ntsaa loog kws puab tub yuav noj puab tej quav hab haus puab tej zwg hab ntaag.”
¹³Mas Lasakhe sawv ntsug qw ua lug Yuta nrov nrov has tas, “Ca le noog tug fuabtais luj kws yog Axilia tug vaajntxwv tej lug. ¹⁴Vaajntxwv has le nuav tas, Tsw xob ca Hexekhiya daag ntxag mej, vem nwg tsw muaj peevxwm paab tau mej dim. ¹⁵Tsw xob ca Hexekhiya ua rua mej vaam khom Yawmsaub rua tej lug kws has tas ‘Yawmsaub yuav paab peb dim tag tag le. Lub nroog nuav yuav tsw poob rua huv Axilia tug vaajntxwv txhais teg.’ ¹⁶Tsw xob noog Hexekhiya has. Axilia tug vaajntxwv has le nuav tas, Ca le nrug kuv sws raug zoo hab tawm tuaj cuag kuv, mas mej txhua tug nyag yuav tau noj nyag tej txwv maab txwv cua hab txhua tug nyag yuav tau haus nyag tej qhov dej, ¹⁷moog txug thaus kuv rov tuaj coj mej moog rua lub tebchaws kws zoo ib yaam le mej lub tebchaws, yog lub tebchaws kws muaj qoob loos hab cawv txwv maab, yog lub tebchaws kws muaj mov noj hab muaj vaaj txwv maab. ¹⁸Ca le ceev faaj tsaam tes Hexekhiya yuav coj mej yuam kev hab has tas, ‘Yawmsaub yuav cawm peb dim.’ Puas muaj ib tug daab twg huv ib tsoom tebchaws kws paab tau nwg lub tebchaws dim huv Axilia tug vaajntxwv txhais teg? ¹⁹Lub moos Hama hab lub moos Apa tej daab dua twg taag lawm? Lub moos Xefava‑i tej daab dua twg lawm? Tej daab hov paab tau Xamali dim huv kuv txhais teg hab lov? ²⁰Tej tebchaws nuav tej daab huvsw tsw muaj ib tug daab twg kws paab tau nwg lub tebchaws dim huv kuv txhais teg, mas Yawmsaub yuav cawm Yeluxalee dim huv kuv txhais teg hab lov?”
²¹Tassws puab ntsag tuabywv tsw teb ib lus le tsua qhov vaajntxwv Hexekhiya tub qha has tas, “Tsw xob teb ib lus le.” ²²Hikhiya tug tub Eliyakhi kws yog tug saib vaajntxwv lub tsev hab Sena kws yog tug tub sau ntawv hab Axas tug tub Yau‑av kws yog tug kws sau ntawv keeb kwm, puab rov lug cuag Hexekhiya ua rwg tsho nduag taag, hab qha Lasakhe tej lug rua vaajntxwv.

36

Cov Axilias Thiab Lub Nroog Yeluxalees

(2 Vajntxwv 18.13-27; 2 Xwmtxheej Vajntxwv 32.1-19)

¹Thaum Hexekiyas ua vajntxwv kav lub tebchaws Yudas tau kaum plaub xyoos lawm, Xenakhelis uas ua vajntxwv kav lub tebchaws Axilias tau tuaj tua cov Yudas tej nroog uas txhim ntsa loog ruaj khov kho thiab txeeb tau tej nroog ntawd huv tibsi lawm. ²Cov Axilias tus vajntxwv tso Lasakes uas yog ib tug thawj tubrog coj ib pab tubrog coob coob tawm hauv lub nroog Lakhis tuaj rau hauv lub nroog Yeluxalees thiab nug Vajntxwv Hexekiyas saib puas zeem. Lasakes tuaj sawv rau ntawm ntu kev uas cov neeg mus ua haujlwm raus ntaub ntawm tus kwjdeg uas ntws pem lub pasdej theem saud los. ³Muaj peb tug neeg Yudas uas yog Hexekiyas tus tub Eliyakees uas yog tus saib lub loog, Senpanas uas yog tus teev ntawv thiab Asas tus tub Yau-as uas yog tus ceev tej ntaub ntawv thiaj tawm mus cuag Lasakes. ⁴Cos Axilias tus thawj tubrog Lasakes hais rau lawv hais tias huabtais xav paub saib Vajntxwv Hexekiyas cia siab rau dabtsi? ⁵Koj hais tias, “Koj muaj tswvyim zoo thiab tubrog coob, tiamsis tej lus uas koj hais ntawd tsis muaj qabhau. Koj cia siab rau leejtwg koj thiaj ntxeev siab rau kuv? ⁶Koj cia siab rau cov Iziv tuaj pab koj, tiamsis lawv yuav zoo li muab tus tauj iab los ua pas nrig, nws yuav lov thiab chob koj tes. Falaus uas yog cov Iziv tus vajntxwv zoo li ntawd rau txhua tus uas cia siab rau nws ntag.”
⁷Cov Axilias tus thawj tubrog nam zog mus hais ntxiv tias, “Puas yog nej hais rau kuv tias nej cia siab rau tus TSWV uas yog nej tus Vajtswv? Puas yog Hexekiyas muab tej chaw teev dab saum roob siab thiab tej thaj rhuav puastsuaj tas, nws thiaj hais kom cov Yudas thiab cov Yixalayees mus pehawm Vajtswv rau ntawm tib lub thaj nkaus xwb? ⁸Kuv yuav nrog nej sib coglus ntawm kuv tus tswv uas yog cov Axilias tus huabtais lub npe, kuv yuav muab ob txhiab tus nees rau nej, yog nej nrhiav tau neeg coob los caij cov nees ntawd. ⁹Nej twb tsis muaj peevxwm tawmtsam tau kuv tus tswv ib tug nyuag tubrog uas me tshaj plaws no, ua li cas nej lam mus cia siab rau cov Iziv tej tsheb nees thiab cov tubrog caij nees ua dabtsi? ¹⁰Nej xav hais tias kuv tuaj tua nej lub tebchaws thiab muab ua kom puastsuaj, tsis muaj tus TSWV pab kuv no los? Twb yog Vajtswv txib kuv tuaj tua thiab rhuav kom nej puastsuaj ntag!”
¹¹Ces Eliyakees, Senpanas thiab Yau-as hais rau Lasakes hais tias, “Thov hais lus Alamais rau koj cov tubtxib, peb thiaj totaub; tsis txhob hais lus Henplais rau peb, rau qhov tagnrho cov neeg uas sawv saum tus ntsa yeej puavleej mloog koj hais huv tibsi.”
¹²Tiamsis Lasakes hais tias, “Nej xav hais tias kuv tus tswv tso kuv tuaj hais cov lus no rau nej tus tswv thiab nej xwb no los? Tsis yog li ntawd, kuv hais rau cov neeg zaum saum tus ntsayeej uas lawv yuav rov noj lawv cov quav thiab haus lawv cov zis kom hnov ib yam li nej thiab.”
¹³Ces Lasakes thiaj sawv tsees thiab hais ua lus Henplais nrov nrov hais tias, “Cia li mloog cov Axilias tus huabtais tej lus uas hais rau nej no! ¹⁴Huabtais hais tias: ‘Nej tsis txhob cia Hexekiyas ntxias tau nej, vim Hexekiyas yeej cawm tsis tau nej li.’ ¹⁵Thiab tsis txhob cia Hexekiyas ntxias nej cia siab rau tus TSWV uas pheej hais tias, ‘Tus TSWV yeej yuav cawm tau peb xwb; lub nroog no yuav tsis raug muab cob rau cov Axilias tus huabtais txhais tes ib zaug li.’ ¹⁶Tsis txhob mloog Hexekiyas tej lus hlo li! Cov Axilias tus huabtais hais tias, ‘Cia li ua phoojywg rau kuv thiab tawm tuaj cuag kuv. Nej txhua tus thiaj yuav tau noj nej tej txiv hmab, tej txiv ncuavpias thiab haus tej dej hauv nej tej qhovtshij ¹⁷mus txog thaum uas kuv tuaj coj nej mus nyob hauv lub tebchaws uas zoo li nej lub tebchaws uas muaj txiv hmab ntau ua cawv thiab muaj nplej ntau ua ncuav. ¹⁸Tsis txhob cia Hexekiyas dag nej hais tias tus TSWV yuav pab kom nej dim ntawm txojkev nyuaj siab. Luag lwm haivneeg tej vajtswv puas cawm tau kom lawv tej tebchaws dim ntawm cov Axilias tus huabtais txhais tes? ¹⁹Tamsim no Hamathas thiab Alepas tej vajtswv nyob qhov twg? Xefavais tej vajtswv nyob qhov twg? Lawv puas pab tau cov Xamalis dim ntawm kuv txhais tes? ²⁰Tagnrho cov vajtswv hauv tej tebchaws no, tus vajtswv twg cawm tau nws lub tebchaws dim ntawm kuv txhais tes? Tus TSWV yuav ua li cas thiaj cawm tau lub nroog Yeluxalees kom dim ntawm kuv txhais tes?’ ”
²¹Tiamsis cov pejxeem nyob ntsiag to thiab tsis hais ib lo lus li, rau qhov Vajntxwv Hexekiyas samhwm hais tias, “Tsis txhob teb nws hlo li.” ²²Ces Eliyakees uas yog Hilekiyas tus tub uas yog tus saib lub loog, Senpanas uas yog tus teev ntawv thiab Yau-as uas yog Axafes tus tub uas yog tus ceev ntaub ntawv dua rhe lawv tej tsho thiab khiav mus qhia tej lus uas Lasakes hais ntawd rau Vajntxwv Hexekiyas mloog.