2Kuv cov menyuam, nej cia li thov nej niam; txawm hais tias nws tsis yog kuv tus pojniam thiab kuv tsis yog nws tus txiv los nej thov kom nws tso txojkev ua nkauj ua nraug thiab ua niamntiav tseg. 3Yog nws tsis tso tej ntawd tseg, kuv yuav muab nws tej ris tsho hle kom nws nyob liabqab ploog ib yam li hnub uas nws yug los. Kuv yuav ua kom nws qhuav ib yam li lub tebchaws uas qhuav nkig nkuav, thiab nws yuav nqhis dej tuag. 4-5Kuv yuav tsis hlub nws cov menyuam, rau qhov lawv yog tus niamntiav uas tsis paub txajmuag cov menyuam. Nws tseem hais tias, “Kuv yuav raws kuv cov hluas nraug mus, lawv mam muab zaub mov, dej haus, ntaub plaub yaj, ntaubmag, roj txiv ntoo thiab cawv txiv hmab rau kuv.” 6Yog li ntawd, kuv yuav muab pos los xov vaj ncig nws thiab xov lajkab thaiv nws txoj haukev. 7Nws yuav caum nws cov hluas nraug qab tiamsis nws raws tsis cuag lawv. Nws yuav mus nrhiav lawv tiamsis nrhiav tsis tau. Ces nws yuav hais tias, “Kuv yuav rov mus nrog kuv thawj tug txiv nyob, yav tas los kuv lub neej yeej zoo tshaj tamsim no lawm ntau.” 8Nws yuav tsis kam lees hais tias tej nplej, cawv txiv hmab, roj txiv ntoo thiab tagnrho tej nyiaj tej kub uas nws pheej coj mus fij rau Npa-as ntawd yog kuv muab rau nws. 9Yog li ntawd, thaum txog lub caij sau qoob kuv yuav muab tej nplej thiab tej cawv txiv hmab uas kuv muab pub nws lawm coj rov los, thiab kuv yuav muab tej ntaub plaub yaj thiab tej ntaubmag uas kuv muab rau nws xaws ua ris tsho hnav coj rov los huv tibsi. 10Kuv yuav muab nws hle liabqab tabmeeg nws tej hluas nraug, thiab yuav tsis muaj leejtwg muaj cuabkav cawm tau nws kom dim ntawm kuv txhais tes. 11Kuv yuav ua kom nws tej rooj noj rooj haus uas niaj xyoo thiab niaj hli ua, tej kevcai hnub Xanpataus thiab tej rooj noj haus uas nws teem tseg ntawd kom tu nrho mus. 12Kuv yuav muab tej txiv hmab thiab txiv ncuavpias uas nws khav hais tias yog nws cov hluas nraug muab them nws, rau qhov nws nrog lawv ua nkauj ua nraug, ua kom puastsuaj tas huv tibsi. Kuv yuav muab nws tej vaj txiv hmab thiab txiv cev ua kom qhuav qhawv ib yam li mojsab qhua; tej tsiaj qus yuav los muab ua kom puastsuaj tas. 13Kuv yuav rau txim rau nws vim nws tsis nco qab kuv lawm; nws tau mus hlawv tshuaj tsw qab rau Npa-as, thiab coj saw nyiaj saw kub mus caum nws cov hluas nraug qab. Tus TSWV yog tus uas hais li ntawd.
Tus TSWV Hlub Nws Haivneeg
14Yog li ntawd, kuv yuav coj nws mus tso rau tom tiaj suabpuam dua; kuv yuav hais lus mos lus muag rau nws thiaj coj tau nws rov los. 15Kuv yuav muab nws tej vaj txiv hmab rov qab rau nws thiab muab lub Hav Covnyom hloov ua lub rooj loog uas cia siab tau. Nws yuav teb kuv tej lus ib yam li thaum nws tseem hluas uas nws nyuam qhuav los nram tebchaws Iziv los. 16Nws yuav rov hu kuv ua nws tus txiv, nws yuav tsis hu kuv ua nws tus Npa-as ntxiv lawm. 17Kuv yuav tsis pub nws hais txog Npa-as lub npe ib zaug li lawm. 18Lub sijhawm ntawd kuv yuav coglus rau tej tsiaj qus thiab tej noog kom tsis txhob los tom kuv haivneeg. Kuv yuav tshem tej cuabyeej ua rog tawm hauv lub tebchaws mus kom tas, tsis hais tej ntaj thiab tej hneevnti; kuv yuav cia kuv haivneeg nyob kaj siab lug thiab muaj kev thajyeeb.
19Yixalayees, kuv yuav yuav koj ua kuv tus pojniam; kuv yuav ua ncaj thiab muab siab npuab koj; kuv yuav hlub thiab hmov tshua koj, thiab yuav koj ua kuv tug mus ibtxhis li. 20Kuv yuav ua raws li kuv tej lus cog tseg thiab yuav koj ua kuv tug, thiab koj yuav lees yuav kuv ua koj tus TSWV. 21-22Lub sijhawm ntawd kuv yuav teb kuv haivneeg Yixalayees tej lus thov. Kuv yuav tso nag los rau hauv lub ntiajteb no, ces lub ntiajteb yuav tuaj qoobloo, txiv hmab thiab txiv ntoo roj. 23Kuv yuav tsa kuv haivneeg rau hauv lub tebchaws ntawd thiab ua kom lawv vammeej. Kuv yuav hlub cov neeg uas muaj lub npe hu hais tias “Tsis Hlub,” thiab hlub cov neeg uas hu hais tias “Tsis Yog Kuv Haivneeg” Kuv yuav hais tias, “Nej yog kuv haivneeg,” thiab lawv yuav teb hais tias, “Koj yog peb tus Vajtswv.”
2
Yawmsaub txav txem hab rov hlub
1“Ca le has rua koj cov kwv tas, ‘Ami,’⚓ hab has rua koj cov muam tas, ‘Luhama.’⚓ 2“Ca le tshev mej nam, ca le tshev los maj, tsua qhov nwg tsw yog kuv quaspuj hab kuv tsw yog nwg quasyawg. Thov nwg tso qhov kws deev hluas nraug huv nwg xubndag tseg, hab tseg qhov kws nwg nrug luas pw ntawm nwg lub mig. 3Tsw ua le ntawd, kuv yuav muab nwg tsoog tsho hle ca nwg lab qaab, ua kuas nwg zoo yaam le nub kws yug lug. Kuv yuav ua kuas nwg zoo yaam le tebchaws moj saab qhua, hab ua rua nwg zoo le lub tebchaws qhuav nkig nkuav, hab ua rua nwg nqhes dej tuag. 4Kuv yuav tsw khuvleej nwg cov mivnyuas, vem puab yog mivnyuas hluas nraug. 5Puab nam moog deev hluas nraug, tug kws xeeb puab ua tej kws txaaj muag kawg. Nwg has tas, ‘Kuv yuav lawv cov kws kuv nyam qaab moog, puab yog cov kws pub zaub mov hab dej, pub plaub yaaj hab maaj, pub roj hab cawv txwv maab rua kuv.’ 6Vem le hov kuv yuav muab xuav paug thaiv nwg kev, kuv yuav xov laj kaab kaw nwg ca, sub nwg txhad nrhav tsw tau kev moog. 7Nwg yuav lawv cov kws nwg nyam, tassws yuav lawv tsw cuag, nwg yuav nrhav puab tassws yuav nrhav tsw ntswb. Tes nwg yuav has tas, ‘Kuv yuav rov qaab moog rua kuv thawj tug quasyawg, tsua qhov yaav thau u kuv lub neej zoo dua le nwgnuav.’ 8Nwg tsw leeg paub tas kuv yog tug kws pub qoob loos, cawv txwv maab hab roj rua nwg, hab yog tug kws pub nyaj pub kub ntau nplua mag rua nwg, mas puab txhad swv tej nyaj kub hov teev daab Npa‑aa.
9“Vem le nuav kuv yuav thim kuv tej qoob lawv le lub caij lub nyoog, hab thim kuv tej cawv txwv maab lawv le lub caij, hab yuav thim kuv tej plaub yaaj hab tej maaj kws swv npug nwg lub cev lab qaab rov lug. 10Nwgnuav kuv yuav thws qhov kws nwg ua dev taab meeg cov kws nwg nyam, hab yuav tsw muaj leejtwg cawm nwg dim huv kuv txhais teg. 11Kuv yuav ua rua nwg tej kev xyiv faab huvsw pluj plag, tsw has kevcai paam noj paam haus, kevcai nub hli xab,nub Xanpatau⚓ hab nwg tej kevcai kws teem ca huvsw. 12Kuv yuav ua rua nwg tej txwv maab txwv cua puam tsuaj taag, yog tej kws nwg has tas, ‘Nuav yog tej nqe ndav kws cov kws kuv nyam pub rua kuv.’ Kuv yuav rov muab tej hov ua haav zoov, hab tsaj qus yuav muab noj taag. 13Kuv yuav rau txem rua nwg vem txhua nub kws nwg ua kevcai hlawv moov xyaab xyeem rua tej daab Npa‑aa, hab nwg ua zaam coj nplhaib coj npauj nyaj npauj kub lawv qaab cov kws nwg nyam moog hab nov qaab kuv lawm.” Yawmsaub has le nuav ntaag.
14“Vem le nuav kuv yuav ntxag nwg, coj nwg moog rua tebchaws moj saab qhua hab has lug mog lug muas rua nwg. 15Kuv yuav rov pub nwg muaj vaaj txwv maab rua hov ntawd, hab muab lub haav Akhauj⚓ hloov ua lub qhov rooj kws nwg muaj vaam. Qhov ntawd nwg yuav teb kuv ib yaam le thaus nwg tseed hluas nkauj, hab yaam le thaus nwg tawm huv Iyi tebchaws lug.” 16Yawmsaub has tas, “Nub hov koj yuav hu kuv ua koj tug quasyawg, koj yuav tsw hu kuv ua koj tug daab Npa‑aa⚓ dua le lawm. 17Kuv yuav muab tej daab Npa‑aa lub npe rhu tawm huv nwg lub qhov ncauj, mas nwg yuav tsw has txug puab lub npe dua le lawm. 18Nub ntawd kuv yuav cog lug rua tej tsaj qus hab tej noog sau nruab ntug hab tej tsaj kws nkaag huv aav kuas tsw xob txuv koj. Kuv yuav rhuav tshem tej neev, tej ntaaj rag hab tej kev ua rog tawm huv lub tebchaws. Kuv yuav pub koj pw tso sab plhuav. 19Kuv yuav qhab koj rua kuv moog ib txhws, kuv yuav qhab koj huv txujkev ncaaj nceeg hab kev ua ncaaj, hab huv txujkev hlub ruaj khov hab txujkev khuvleej. 20Kuv yuav qhab koj rua kuv, tsw tso koj tseg hlo le, mas koj yuav leeg paub Yawmsaub.” 21Yawmsaub has tas, “Nub ntawd kuv yuav teb, kuv yuav teb lub ntuj, hab lub ntuj yuav teb lub nplajteb, 22mas lub nplajteb yuav teb tej qoob loos, tej cawv txwv maab hab tej roj, hab tej nuav yuav teb Yile‑ee.⚓ 23Kuv yuav tseb nwg rua huv lub tebchaws rua kuv. Kuv yuav khuvleej tug kws tsw txais kev khuvleej,⚓ kuv yuav has rua tug kws tsw yog kuv haiv tuabneeg⚓ tas, ‘Koj yog kuv haiv tuabneeg,’ mas nwg yuav has tas, ‘Koj yog kuv tug Vaajtswv.’ ”