14

Yaunathas Tua Cov Filitees

¹Muaj ib hnub Yaunathas hais rau tus tub hluas uas nqa nws rab ntaj thiab rab hmuv hais tias, “Wb mus hauv cov Filitees lub yeej.” Tiamsis Yaunathas tsis qhia rau Xa-ules tus uas yog nws txiv paub ²ntawm tsob qab ntoo txiv ntsiavkws ntawm lub nroog Minkeloos uas nyob tsis deb ntawm lub nroog Nkinpe-as; Xa-ules cov tubrog muaj kwvlam li rau pua leej. ( ³Tus povthawj uas hnav lub tsho efaus yog Ahiyas uas yog Ahitus tus tijlaug Ikhanpaus tus tub, Ikhanpaus thiab Ahitus yog Finehas tub thiab yog Elis xeebntxwv, Elis yog tus povthawj uas ua tus TSWV tes haujlwm nyob hauv lub nroog Silaus.) Cov tubrog tsis paub hais tias, Yaunathas twb mus lawm.
⁴Ntawm lub Dawm Mikemas uas Yaunathas nkawd hla mus rau ntawm cov Filitees lub yeej muaj ob tug ncej zeb loj ntse zuag plias, ib tug nyob ib sab kev: ib tug hu ua Npauxes thiab ib tug hu ua Xenes. ⁵Tus uas nyob sab ped tig mus rau lub nroog Mikemas thiab tus uas nyob sab nrad tig mus rau nram lub nroog Nkenpas.
⁶Yaunathas hais rau tus tub hluas hais tias, “Wb cia li hla mus rau tom cov Filitees uas tsis ua kevcai txiav lub yeej. Tej zaum tus TSWV yuav pab wb; yog nws pab wb, yeej tsis muaj dabtsi yuav txwv tau nws kom tsis pub wb yeej li. Txawm yog wb ob leeg xwb los wb yuav kovyeej.”
⁷Tus tub hluas teb hais tias, “Koj ua dabtsi kuv nrog koj ua, koj mus qhov twg kuv nrog koj mus.”
⁸Yaunathas teb hais tias, “Zoo heev, wb cia li mus kom cov Filitees pom wb. ⁹Yog lawv hu kom wb tos lawv tuaj cuag wb, wb cia li nyob twjywm tos. ¹⁰Tiamsis yog lawv kom wb mus cuag lawv, wb cia li mus, rau qhov tej ntawd yuav yog lub cim qhia rau wb paub hais tias, tus TSWV twb muab lawv cob rau wb tes lawm.”
¹¹Yog li ntawd, Yaunathas thiab tus hluas txawm tawm mus rau cov Filitees pom, thiab cov Filitees hais tias, “Nej ntsia tid saib! Cov Henplais muaj qee leej tawm hauv tej qhov av uas lawv nkaum los lawm tiag!” ¹²Cov Filitees txawm hu Yaunathas thiab tus tub hluas hais tias, “Neb cia li los ntawm no! Peb yuav qhia dabtsi rau neb!”
Yaunathas hais rau tus tub hluas tias, “Koj cia li raws kuv qab. Tus TSWV twb pub peb cov Yixalayees kovyeej lawv lawm.” ¹³Yaunathas txawm nkag ua ntej thiab tus tub hluas nkag raws nws qab. Yaunathas ntaus cov Filitees ntog rau hauv av, ces tus tub hluas cia li khaws tua xwb. ¹⁴Thawj zaug no Yaunathas thiab tus tub hluas tua cov Filitees tuag kwvlam li nees nkaum leej. Thaj chaw uas lawv sib ntaus sib tua lwj ntsuav ntawd dav li ob zeg liaj, ¹⁵Cov Filitees, tsis hais cov uas nyob hauv tiaj, cov tubrog uas nyob hauv yeej, thiab cov tubrog uas pheej nyas tuaj tua cov Yixalayees, puavleej ntshai kawg li; av txawm qeeg ua zog koog ua rau cov Filitees ntshai thiab yoob tas.

Cov Filitees Swb

¹⁶Xa-ules cov tubrog uas zov lub nroog Nkinpe-as hauv xeem Npeenyamees cheebtsam av pom cov Filitees khiav zom zaws rau txhua qhov. ¹⁷Yog li ntawd, Xa-ules hais rau nws cov tubrog hais tias, “Nej cia li txheeb peb cov tubrog saib leejtwg tsis nyob hauv yeej lawm.” Thaum lawv txheeb, lawv tsis pom Yaunathas thiab tus tub hluas uas nqa Yaunathas rab ntaj thiab rab hmuv lawm. ¹⁸Xa-ules hais rau tus povthawj Ahiyas hais tias, “Koj cia li nqa lub efaus los ntawm no.” (Hnub ntawd Ahiyas yog tus nqa lub efaus ua cov Yixalayees ntej.) ¹⁹Thaum Xa-ules tseem hais rau tus povthawj, cov tubrog Filitees uas nyob hauv yeej yimhuab ua ntxhov quav niab. Yog li ntawd, Xa-ules thiaj hais rau tus povthawj Ahiyas hais tias, “Tsis muaj sijhawm nug tus TSWV lawm!” ²⁰Xa-ules thiab nws cov tubrog thiaj dhia mus tua cov Filitees uas lawv tabtom rov sib ntaus sib tua ntxhov hnyo ntawd. ²¹Cov Henplais qee leej uas tuaj cov Filitees tog thiab nrog cov Filitees nyob hauv lub yeej ntawd, lawv txawm hloov siab rov los tuaj Xa-ules thiab Yaunathas tog tua cov Filitees. ²²Cov Henplais uas khiav mus nkaum pem tej roob hauv tebchaws Efalayees hnov hais tias cov Filitees tabtom swb thiab khiav zom zaws lawm, lawv txawm sau nthwv tuaj pab Xa-ules tua cov Filitees ²³mus dhau plaws lub nroog Npethavees. Hnub ntawd tus TSWV pab cov Yixalayees dim.

Yaunathas Noj Zib Ntab

²⁴Hnub ntawd, cov Yixalayees tshaib plab thiab qaug zog heev, rau qhov Xa-ules coglus hais tias, “Hnub no, yog leejtwg noj mov ua ntej uas kuv ua pauj rau kuv cov yeebncuab, tus ntawd yuav raug foom tsis zoo.” Yog li ntawd, hnub ntawd ib hnub thiaj tsis muaj leej twg noj mov li. ²⁵Tagnrho cov tubrog los txog rau hauv ib thaj havzoov uas muaj zib ntab ntau heev. ²⁶Zib ntab nyob puv nrees txhua qhov, tiamsis tsis muaj leejtwg muaj cuabkav muab noj li, rau qhov lawv ntshai Xa-ules tej lus foom tsis zoo. ²⁷Tiamsis Yaunathas tsis hnov qhov uas nws txiv yuav foom tsis zoo rau tus uas tsis mloog lus; nws thiaj muab nws tus pa nrig tshum lub qia nas ntab los noj. Thaum Yaunathas noj tas, nws thiaj muaj zog mentsis tuaj. ²⁸Tiamsis muaj ib tug tubrog hais rau Yaunathas hais tias, “Peb sawvdaws tshaib plab thiab qaug zog heev, tiamsis koj txiv yuam kom peb coglus hais tias, ‘Tus uas noj mov hnub no, tus ntawd yuav raug foom tsis zoo.’ ”
²⁹Yaunathas teb hais tias, “Ua li cas kuv txiv yuav ua nruj ua luaj rau peb cov neeg! Nej saib kuv muaj zog mentsis tuaj, rau qhov kuv noj cov zib ntab ntawd! ³⁰Yog hnub no cov tubrog tseem tau noj tej mov uas txeeb tau ntawm cov yeebncuab los, mas sawvdaws hajyam muaj zog tua cov Filitees tuag coob dua thiab.”
³¹Hnub ntawd, cov Yixalayees tua yeej cov Filitees ntawm lub nroog Mikemas mus ti nkaus lub nroog Aiyaloos. Thaum ntawd cov Yixalayees tshaib plab thiab qaug zog heev, ³²lawv thiaj dhia mus muab tej yaj thiab tej nyuj uas lawv txeeb tau ntawm cov yeebncuab los tua thiab muab hlais noj nyoos ua ntshav liab vog. ³³Muaj neeg mus qhia rau Xa-ules hais tias, “Koj saib, muaj neeg noj tej nqaij nyoos uas tseem muaj ntshav. Lawv ua li ntawd, yog lawv ua txhaum rau tus TSWV lawm.”
Xa-ules nthe tawg ntho hais tias, “Cov nyuag neeg ntxeev siab ko, cia li mus dov ib lub pobzeb loj los rau kuv ntawm no.” ³⁴Tom qab ntawd, Xa-ules hais rau lawv hais tias, “Nej cia li mus hais kom lawv cab lawv tej nyuj thiab tej yaj tuaj tua noj rau ntawm no. Lawv tsis txhob noj tej nqaij nyoos uas muaj ntshav, yuav ua txhaum rau tus TXWV.” Yog li hmo ntawd, lawv thiaj cab lawv tej nyuj los tua qhov ntawd. ³⁵Xa-ules teeb tau ib lub thaj fij khoom rau tus TSWV, lub thaj ntawd yog thawj lub uas Xa-ules teeb.
³⁶Xa-ules hais rau nws cov tubrog hais tias, “Hmo no peb yuav mus tua cov Filitees ib hmo kaj ntug kom lawv tuag tas thiab huab lawv tej khoom huv tibsi.”
Cov tubrog teb hais tias, “Cia li ua raws li koj pom zoo.” Tiamsis tus povthawj teb hais tias, “Cia peb nug Vajtswv tso.”
³⁷Yog li ntawd, Xa-ules nug Vajtswv hais tias, “Kuv yuav mus tua cov Filitees los tsis mus?” Koj puas pub kom peb tua yeej lawv? Tiamsis hnub ntawd Vajtswv tsis teb li. ³⁸Xa-ules hais rau cov Yixalayees cov thawjcoj hais tias, “Nej los ntawm no, peb ua tib zoo xav saib hnub no peb tau ua txhaum dabtsi lawm. ³⁹Kuv cog lus rau tus TSWV uas muaj sia nyob thiab yog tus uas pub rau cov Yixalayees muaj yeej hais tias, txawm yog kuv tus tub Yaunathas ua txhaum los yuav tsum muab nws tua povtseg.” Tiamsis tsis muaj leejtwg hais ib los li. ⁴⁰Ces Xa-ules hais rau lawv hais tias, “Nej cia li mus sawv lawm tod, kuv thiab Yaunathas yuav sawv ntawm no.” Lawv teb hais tias, “Ua raws li koj pom zoo.”
⁴¹Xa-ules thov tus TSWV uas yog cov Yixalayees tus Vajtswv hais tias, “Tus TSWV, ua li cas hnub no koj tsis teb kuv? Tus TSWV uas yog cov Yixalayees tus Vajtswv, yog kuv tus tub Yaunathas lossis kuv ua txhaum, thov koj qhia rau kuv ntawm lub Ulees; tiamsis yog koj haivneeg Yixalayees ua txhaum, thov koj qhia rau kuv ntawm lub Thumees.” Thaum nws saib, ua ciav yog Yaunathas thiab Xa-ules ua txhaum; tsis yog cov pejxeem ua txhaum. ⁴²Xa-ules hais tias, “Tus TSWV thov koj qhia siab, yog kuv tus tub Yaunathas lossis kuv ua txhaum.” Thaum nws saib, ua ciav yog Yaunathas ua txhaum. ⁴³Xa-ules nug Yaunathas hais tias, “Koj ua txhaum dabtsi?”
Yaunathas teb hais tias, “Kuv noj mentsis zib ntab xwb. Kuv nyob ntawm no, kuv yeej zoo siab tuag.”
⁴⁴Xa-ules hais tias, “Yog kuv tsis tua koj, thov kom Vajtswv tua kuv povtseg!”
⁴⁵Tiamsis cov neeg hais rau Xa-ules hais tias, “Koj yuav muab Yaunathas, tus uas pab tau cov Yixalayees kovyeej loj npaum li no tua povtseg los? Yog koj tua nws, peb yeej tsis zoo siab rau koj li! Peb thov coglus rau tus TSWV uas muaj sia nyob hais tias, txawm yog Yaunathas ib txoj nyuag plaubhau los tsis pub kom poob li. Tej uas hnub no nws ua yeej yog Vajtswv pab xwb.” Yog li ntawd, sawvdaws thiaj pab tau Yaunathas dim tsis raug tua tuag.
⁴⁶Ces Xa-ules txawm tso tseg tsis caum cov Filitees tua, thiab cov Filitees rov qab mus rau lawv lub tebchaws lawm.

Xa-ules Tsevneeg

⁴⁷Lub sijhawm uas Xa-ules ua vajntxwv kav tebchaws Yixalayees, nws ntaus tsov ntau rog tawmtsam nws cov yeebncuab rau txhua qhov: nws tua cov Mau-am, cov Amoos thiab cov Edoos, cov vajntxwv uas kav tebchaws Xaunpas thiab cov Filitees. Txhua qhov uas nws tua, nws puavleej tua yeej. ⁴⁸Nws siab tawv thiab tua rog ua tau heev tsis ntshai leejtwg li, txawm yog cov Amalej los nws tua yeej huv tibsi. Txhua zaus uas yeebncuab tuaj tua cov Yixalayees los nws cawm tau lawv dim.
⁴⁹Xa-ules cov tub yog: Yaunathas, Isevis thiab Makhisuas. Xa-ules tus ntxhais hlob hu ua Melas thiab tus ntxhais yau hu ua Mikhas. ⁵⁰Xa-ules tus pojniam hu ua Ahinaus uas yog Ahimas tus ntxhais; Xa-ules tus thawj tubrog hu Aneles uas yog Xa-ules txiv hlob Neles tus tub. ⁵¹Kises uas yog Xa-ules txiv thiab Neles uas yog Aneles txiv, yog Anpiyees tub.
⁵²Thaum Xa-ules ua neej nyob, nws nrog cov Filitees sib tua hnyav heev. Yog nws pom ib tug txivneej khov kho thiab siab tawv, ces nws txawm coj tus ntawd mus ua nws tubrog.

14

Yaunathas tua cov Filixatee

¹Muaj ib hnub Yaunathas uas yog Xa‑u tus tub hais rau tus hluas uas nqa nws tej cuab yeej ua rog tias, “Wb cia li hla mus rau tim cov Filixatee pab tub rog uas zov kev.” Tiamsis nws tsis qhia rau nws txiv paub. ²Xa‑u tsuam chaw nyob ntawm ntug moos Kinpe‑a hauv tsob qab ntoo txiv ntsiav kws hauv lub moos Miloo. Cov neeg uas nrog Xa‑u nyob kwvlam muaj rau pua leej, ³thiab Ahiya uas coj lub efauj⚓ kuj nrog Xa‑u nyob. Ahiya txiv yog Ahithu uas yog Ikhanpau tus tijlaug, nws yawg yog Fineha, nws yawg koob yog Eli uas ua Yawmsaub tus pov thawj hauv lub moos Silau. Cov tub rog kuj tsis paub tias Yaunathas mus lawm. ⁴Lub dawm uas Yaunathas yuav hla mus rau cov Filixatee pab tub rog uas zov kev muaj ib ntxwj zeb zuag zuag nyob sab no hu ua Npauxe thiab ib ntxwj zeb nyob sab tid hu ua Xene. ⁵Ntxwj zeb sab ped tshwm ncaj ntawm Mimaj thiab ntxwj zeb sab nrad tshwm ncaj ntawm lub moos Kenpa.
⁶Yaunathas hais rau tus hluas uas nqa nws tej cuab yeej tias, “Wb cia li hla mus rau ntawm pab tub rog uas yog cov neeg tsis ua kevcai txiav. Tej zaum Yawmsaub yuav pab peb rau qhov tsis muaj ib yam dabtsi yuav tav tau qhov uas Yawmsaub cawm peb tsis hais nws siv neeg coob los tsawg.” ⁷Tus uas nqa nws tej cuab yeej teb nws tias, “Koj cia li ua txhua yam uas koj lub siab xav ua. Kuv nrog koj ua ke thiab koj lub siab xav li cas kuv lub siab kuj ua ib yam li ntawd.” ⁸Ces Yaunathas txawm hais tias, “Wb yuav hla mus rau ntawm cov neeg ntawd thiab tshwm rau lawv pom. ⁹Yog lawv hais rau wb tias, ‘Cia li nyob tos txog thaum peb tuaj txog neb,’ ces wb yuav nyob twjywm ntawm lub chaw thiab wb yuav tsis nce mus rau ntawm lawv. ¹⁰Yog lawv hais tias, ‘Cia li nce tuaj rau ntawm peb,’ ces wb yuav nce mus. Qhov uas lawv teb li ntawd yuav qhia rau wb paub tias Yawmsaub twb muab lawv cob rau hauv wb txhais tes lawm.” ¹¹Ob tug thiaj tshwm rau cov Filixatee pab tub rog pom, mas cov Filixatee hais tias, “Saib nawj, cov Henplais tawm hauv qhov tsiv nraim tshwm tuaj lawm.” ¹²Ces cov tub rog uas zov kev ntawd txawm hu Yaunathas thiab tus uas nqa nws tej cuab yeej hais tias, “Cia li nce tuaj rau ntawm peb mas peb yuav qhia ib yam dabtsi rau neb.” Yaunathas txawm hais rau tus uas nqa nws tej cuab yeej tias, “Cia li raws kuv qab los, rau qhov Yawmsaub twb muab lawv cob rau hauv cov Yixayee txhais tes lawm.”
¹³Ces Yaunathas txawm nkag nce mus thiab tus uas nqa nws tej cuab yeej kuj raws nws qab mus. Cov neeg no thiaj li tuag rau ntawm Yaunathas txhais tes thiab tus uas nqa nws tej cuab yeej kuj tua lawv raws qab mus. ¹⁴Thawj zaug uas Yaunathas thiab tus uas nqa nws tej cuab yeej tua lawv ntawd mas tuag kwvlam nees nkaum leej. Thaj chaw uas lawv sib tua ntawd dav li ib nkawg nyuj laij teb ib tav su. ¹⁵Cov Filixatee sawvdaws ras zom zaws tsis hais hauv lub yeej thiab ib ncig lub yeej. Pab tub rog uas zov kev thiab cov tub rog uas mus lws tebchaws kuj ntshai tshee hnyo. Av kuj ntseeg nkaws, ua rau muaj kev ras zom zaws loj heev.
¹⁶Xa‑u cov tub rog uas faj xwm hauv lub moos Kinpe‑a hauv Npeeyamee tebchaws tsa muag ntsia ua ciav pom cov Filixatee coob coob ntawd dhia khiav ntxhov hnyo rau tom ub tom no. ¹⁷Ces Xa‑u txawm hais rau cov neeg uas nrog nws nyob tias, “Cia li suav saib leejtwg tawm ntawm peb mus lawm.” Thaum lawv suav saib ua ciav Yaunathas thiab tus uas nqa nws tej cuab yeej tsis nyob ntawd. ¹⁸Xa‑u txawm hais rau Ahiya tias, “Cia li coj Vajtswv lub phij xab⚓ los ntawm no,” rau qhov lub sijhawm ntawd Vajtswv lub phij xab^v nyob hauv cov Yixayee lawm. ¹⁹Thaum Xa‑u nrog tus pov thawj hais lus txawm muaj suab nrov heev zuj zus hauv cov Filixatee lub yeej. Xa‑u thiaj hais rau tus pov thawj tias, “Cia li nkaum tes, tsis txhob ua nug lawm.” ²⁰Ces Xa‑u thiab nws cov tub rog txawm sau nthwv mus ntaus rog, ua ciav cov Filixatee rov sib tua ua ntxhov hnyo sib chab sib chaws. ²¹Cov Henplais uas twb mus nrog cov Filixatee nyob ua ntej los lawm thiab tuaj rau hauv lub yeej ntawd, kuj tig los koom nrog cov Yixayee uas yog Xa‑u thiab Yaunathas tog. ²²Thaum cov Yixayee uas tsiv nraim rau pem toj siab Efa‑i tebchaws tau hnov tias cov Filixatee tabtom khiav, lawv kuj caum qab mus ua rog rau thiab. ²³Hnub ntawd Yawmsaub cawm cov Yixayee li no. Lawv thiaj ntaus rog mus dhau plaws lub moos Npe‑avee.
²⁴Hnub ntawd cov Yixayee raug kev ceeblaj heev vim yog Xa‑u twv tseg rau cov tub rog tias, “Leejtwg noj mov ua ntej hnub tsis tau poob qho thiab ua ntej uas kuv tsis tau ua pauj rau kuv cov yeeb ncuab tag, cia tus ntawd raug foom tsis zoo.” Vim li no cov tub rog tsis noj mov kiag li. ²⁵Cov neeg sawvdaws mus rau hauv hav zoov mas muaj zib ntab nyob hauv pem teb. ²⁶Thaum cov neeg mus rau hauv hav zoov lawm mas pom zib ntab tabtom nrog, tiamsis tsis muaj leejtwg cev tes muab los noj, vim yog ntshai tej lus uas twv tseg lawd. ²⁷Tiamsis Yaunathas tsis hnov leej txiv tej lus uas nws twv rau cov pejxeem. Nws thiaj muab tus hau pas nrig uas nws coj tshum xub ntab cev tes muab cov zib los noj, ces nws qhov muag thiaj kaj tuaj. ²⁸Muaj ib tug yawg hais tias, “Koj txiv twv tseg rau cov tub rog tias, ‘Hnub no leejtwg noj mov yuav raug foom tsis zoo.’ Cov neeg thiaj tsaug leeg heev.” ²⁹Yaunathas thiaj hais tias, “Kuv txiv ua rau lub tebchaws raug kev ceeblaj. Sim saib kuv lub qhov muag twb kaj lawm vim kuv tau noj mentsis zib ntab. ³⁰Yog hnub no cov neeg tau noj tej uas txeeb tau ntawm yeeb ncuab los mas yuav zoo dua ntau npaug, rau qhov nimno qhov uas tua cov Filixatee kuj tsis muaj ntau lawm.”
³¹Hnub ntawd lawv tua cov Filixatee ntawm Mimaj mus txog lub moos Aiyaloo. Mas cov tub rog tsaug leeg heev. ³²Lawv thiaj dhia mus muab tej uas txeeb tau los, yog yaj thiab nyuj thiab menyuam nyuj coj los tua kiag rau hauv av, noj kiag nqaij thiab ntshav ua ke. ³³Mas luag thiaj mus hais rau Xa‑u tias, “Cov neeg ua txhaum rau Yawmsaub vim yog noj kiag nqaij thiab ntshav.” Mas Xa‑u hais tias, “Nej ua neeg fav xeeb lawm. Cia li dov ib lub pob zeb loj los rau ntawm kuv no.” ³⁴Thiab Xa‑u hais tias, “Cia li mus hais thoob plaws rau cov neeg tias, ‘Nej txhua tus yuav tsum coj nej tej nyuj tej yaj los tua rau saum lub pob zeb no noj. Tsis txhob ua txhaum rau Yawmsaub vim yog noj nqaij thiab ntshav.’ ” Mas hmo ntawd txhua tus coj lawv tej nyuj los tua rau qhov ntawd. ³⁵Xa‑u ua ib lub thaj xyeem rau Yawmsaub. Yog thawj lub thaj uas nws ua rau Yawmsaub.
³⁶Ces Xa‑u hais tias, “Peb cia li mus caum cov Filixatee hmo ntuj thiab txeeb lawv tej qhov txhia chaw ib hmos kaj ntug. Peb tsis txhob tseg ib tug dim siav li.” Cov neeg teb tias, “Cia li ua raws li koj pom zoo.” Tiamsis tus pov thawj hais tias, “Cia peb los ua nug rau Vajtswv ntawm no tso.” ³⁷Ces Xa‑u thiaj nug Vajtswv tias, “Kuv yuav mus caum cov Filixatee los tsis txhob mus? Koj yuav muab lawv cob rau hauv cov Yixayee txhais tes los tsis muab?” Tiamsis hnub ntawd Vajtswv tsis teb Xa‑u. ³⁸Xa‑u thiaj hais tias, “Nej sawvdaws uas yog cov thawj, cia li los ntawm no, nej cia li tshuaj saib yog vim li cas hnub no muaj lub txim no tshwm los. ³⁹Muaj Yawmsaub tus uas cawm cov Yixayee muaj txojsia nyob pom, txawm yog txojkev txhaum nyob ntawm kuv tus tub Yaunathas los nws yeej yuav tuag xwb.” Tiamsis cov neeg sawvdaws ntawd tsis muaj ib tug teb nws li. ⁴⁰Ces Xa‑u txawm hais rau cov Yixayee sawvdaws tias, “Cia nej tuaj ib tog, mas kuv thiab kuv tus tub Yaunathas tuaj ib tog.” Mas cov pejxeem hais rau Xa‑u tias, “Cia li ua raws li koj pom zoo.” ⁴¹Ua li ntawd Xa‑u thiaj thov hais tias, “Au Yawmsaub uas yog cov Yixayee tus Vajtswv, ua cas hnub no koj tsis teb kuv uas yog koj tus qhev? Yog lub txim nyob ntawm kuv thiab kuv tus tub Yaunathas, thov teb rau Uli, yog lub txim nyob ntawm cov Yixayee thov teb rau Thumi.”⚓ Ces Xa‑u thiab Yaunathas thiaj yog tog uas ua txhaum mas cov pejxeem dim. ⁴²Ces Xa‑u thiaj hais tias, “Rov qab saib Uli thiab Thumi rau kuv thiab kuv tus tub Yaunathas.” Mas kev txhaum poob rau Yaunathas.
⁴³Ces Xa‑u thiaj hais rau Yaunathas tias, “Koj tau ua dabtsi lawm? Cia li hais rau kuv saib.” Yaunathas thiaj hais tias, “Kuv tau sim noj mentsis zib ntab ntawm tus hau pas nrig hauv kuv txhais tes. Kuv nyob ntawm no, kuv yeem tuag.” ⁴⁴Xa‑u thiaj hais tias, “Yog kuv tsis tua koj thov Vajtswv ua hnyav dua ntawd rau kuv. Yaunathas koj yuav tuag tiag tiag li.” ⁴⁵Cov pejxeem hais rau Xa‑u tias, “Tsim nyog Yaunathas uas coj kev kov yeej loj kawg los rau cov Yixayee tuag lov? Tsis txhob ua li ntawd. Muaj Yawmsaub uas muaj txojsia nyob pom, tsis tseev nws ib txoj plaubhau poob rau hauv av li, vim hnub no nws tau koom nrog Vajtswv ua rog.” Cov pejxeem thiaj txhiv tau Yaunathas nws thiaj tsis tuag. ⁴⁶Ces Xa‑u txawm tsis raws caum cov Filixatee lawm. Cov Filixatee rov mus rau lawv qub teb qub chaw.
⁴⁷Thaum Xa‑u tau ua vajntxwv kav cov Yixayee, nws ua rog rau nws cov yeeb ncuab rau txhua fab, yog ua rog rau Mau‑a thiab Asmoo thiab Edoo thiab cov vajntxwv hauv Xaunpa tebchaws thiab cov Filixatee. Nws mus rau qhovtwg kuj ntaus yeej qhov ntawd. ⁴⁸Nws muaj siab loj siab tuab ua rog thiab ntaus yeej cov Amalej thiab cawm cov Yixayee dim hauv cov uas tuaj lws lawv txhais tes.
⁴⁹Xa‑u li tub yog Yaunathas, Isavi thiab Makhisuva. Nws ob tug ntxhais tus hlob hu ua Mela, tus yau hu ua Mikhas. ⁵⁰Xa‑u tus pojniam hu ua Ahinau‑as, nws yog Ahima‑a tus ntxhais. Xa‑u tus thawj rog yog Anaw uas yog Naw tus tub, Naw yog Xa‑u yawg laus. ⁵¹Khij yog Xa‑u txiv, Naw yog Anaw txiv, Naw thiab Khij yog Anpi‑ee li tub.
⁵²Xa‑u sim neej mas muaj kev ua rog rau cov Filixatee loj heev. Thaum Xa‑u pom leejtwg muaj zog thiab siab loj siab tuab nws coj los nrog nws nyob ua nws li tubtxib tub khai.