33

Mauxe foom koob hmoov rau txhua xeem Yixayee

¹Ntawm no mus yog Mauxe uas yog Vajtswv tus neeg tej lus foom koob hmoov rau cov Yixayee ua ntej uas nws tsis tau tuag. ²Nws hais tias,
“Yawmsaub nqes saum lub roob Xinai los,
nws tawm ntawm Xe‑i ci tuaj rau lawv,⚓
nws ci nplas saum lub roob Palas tuaj,
nws nrog qas txhiab qas vam leej
uas dawb huv tuaj,
muaj nplaim taws ntawm nws sab tes xis.⚓
³Nws yeej hlub nws haiv neeg.
Nws cov neeg dawb huv,
txhua tus nyob hauv nws txhais tes.
Lawv pe ntawm koj kotaw
thiab txais tej lus uas koj qhia.
⁴Mauxe muab txoj kevcai cob rau peb
ua Yakhauj cov neeg qub txeeg qub teg.
⁵Yawmsaub thiaj ua vajntxwv hauv Yesulu⚓
rau thaum cov pejxeem cov thawj
tuaj txoos ua ke
thiab nrog cov Yixayee txhua xeem ua ke.

⁶“Thov cia Lunpee muaj txojsia nyob,
tsis txhob tuag,
tiamsis cia nws cov neeg muaj tsawg.”⚓

⁷Mauxe hais txog Yuda li no tias,
“Au Yawmsaub, thov mloog Yuda tej lus,
thov coj nws rov los koom nws haiv neeg.
Nws txhais tes tawm tsam
pab nws tus kheej.⚓
Thov koj pab nws tawm tsam
nws cov yeeb ncuab.”

⁸Mauxe hais txog Levi tias,
“Yawmsaub, koj li Thumi thiab Uli⚓
nrog tus uas koj hlub nyob,
yog tus uas koj twb muab sim
ntawm Maxa lawm,
thiab tus uas koj tawm tsam
ntawm dej Melinpa.
⁹Nws hais rau nws niam nws txiv tias,
‘Kuv tsis quav ntsej lawv lawm.’
Nws tsis yuav nws cov kwvtij
thiab tsis paub nws cov menyuam,
rau qhov cov Levi ua raws li koj tej lus
thiab tuav rawv koj tej lus cog tseg.
¹⁰Lawv yuav qhia koj tej kevcai rau Yakhauj,
thiab qhia koj txoj kevcai rau Yixayee.
Lawv yuav muab hmoov tshuaj tsw qab
tso rau ntawm koj xubntiag,
thiab muab tej uas hlawv huvsi xyeem
tso rau saum koj lub thaj.
¹¹Au Yawmsaub, thov foom koob hmoov
rau nws tej qhov txhia chaw,
thiab lees yuav tej haujlwm
uas nws txhais tes ua.
Thov koj tsoo nws cov yeeb ncuab lub duav,
yog cov uas ntxub nws,
ua kom sawv tsis taus dua li.”

¹²Mauxe hais txog Npeeyamee tias,
“Tus uas Yawmsaub hlub
nyob tso siab plhuav rau hauv nws.
Yawmsaub tsom kwm nws tas hnub tas hmo,
nws nyob saum Yawmsaub xub pwg.”

¹³Mauxe hais txog Yauxej tias,
“Thov Yawmsaub foom koob hmoov
rau nws lub tebchaws,
cia nws tau dej lwg
uas zoo kawg nkaus saum ntuj,
thiab tau tej dej uas nyob hauv qab ntuj,
¹⁴thiab tau tej qoob loo
zoo kawg nkaus ntawm lub hnub,
thiab tau tej qoob loo
nplua mias raws lub hli,
¹⁵thiab tau tej yam uas zoo kawg
saum tej roob uas ib txwm muaj nyob,
thiab tau tej uas zoo nplua mias
saum tej ncov roob uas nyob mus ib txhis,
¹⁶thiab tau tej kev tsim txiaj hauv ntiajteb
thiab txhua yam uas nyob hauv,
thiab tau txojkev hlub ntawm tus uas nyob
hauv tsob ntoo cig plaws ntawd.
Thov kom tej koob hmoov no
los rau saum Yauxej lub taubhau,
thiab los rau saum tus uas ua
nws cov kwvtij tus thawj lub tiaj taubhau.
¹⁷Nws yog thawj tug menyuam txiv nyuj
uas muaj meej mom,
nws txwm kub zoo yam li kub nyuj qus.
Txwm kub ntawd yuav laub txhua haiv neeg
mus txog qab ntuj kawg.
Efa‑i qas vam leej kuj zoo li no,
Manaxe qas txhiab leej
kuj zoo ib yam nkaus.”

¹⁸Mauxe hais txog Xenpuloo tias,
“Xenpuloo, cia li zoo siab xyiv fab
rau thaum koj tawm mus,
thiab Ixakha cia li zoo siab
rau hauv koj lub tsev ntaub.
¹⁹Ob tug yuav hu neeg tuaj
rau ntawm ob tug lub roob,
thiab yuav xyeem tsiaj raug cai qhov ntawd.
Ob tug rub tej uas zoo nplua mias
hauv hiavtxwv los,
thiab tau tej qhov txhia chaw tswm txiaj
uas muab zais rau hauv xuab zeb.”

²⁰Mauxe hais txog Kas tias,
“Qhuas Vajtswv uas nthuav
Kas lub tebchaws dav.
Kas nyob zoo yam li tsov ntxhuav,
dua luag npab dua luag tiaj taubhau.
²¹Nws xaiv lub tebchaws
uas zoo kawg nkaus rau nws,
vim yog qhov ntawd tseg cia
rau tus thawj uas kav.
Thaum pejxeem cov thawj tuaj txoos ua ke,
nws ua raws li Yawmsaub
txojkev ncaj ncees,
thiab ua raws li tej kevcai
uas muab rau cov Yixayee.”

²²Mauxe hais txog Daj tias,
“Daj yog ib tug menyuam tsov ntxhuav
uas dhia caws qia
hauv Npasas tebchaws tuaj.”

²³Mauxe hais txog Nathali tias,
“Nathali 'e, koj yog tus uas tau
Yawmsaub txojkev hlub puv npo,
thiab tau Yawmsaub li koob hmoov puv nkaus,
cia li txeeb dej hiavtxwv⚓
thiab yav qab teb ua koj tug.”

²⁴Mauxe hais txog Asaw tias,
“Thov kom Asaw tau koob hmoov
ntau dua cov tub huvsi,
thov kom nws cov kwvtij hlub nws,
thiab cia nws raus kotaw rau hauv thoob roj.
²⁵Koj tej las rooj yog hlau thiab tooj liab,
koj txojsia ntev li cas,
koj lub zog yuav muaj ntev li ntawd.”

²⁶“Yesulu 'e, tsis muaj leejtwg
zoo cuag li Vajtswv.
Nws taug txojkev saum ntuj los pab koj
thiab muaj meej mom caij huab cua los.
²⁷Vajtswv uas ib txwm muaj nyob
yog nej lub chaw nyob,
nws txhais npab uas nyob mus ib txhis
cug rawv nej.
Nws ntiab yeeb ncuab khiav
ntawm nej xubntiag mus,
thiab hais tias, ‘Ua kom puam tsuaj lauj!’
²⁸Ua li no Yixayee thiaj li
nyob tso siab plhuav,
Yakhauj caj ces kuj nyob thaj yeeb
rau hauv lub tebchaws
uas muaj qoob loo muaj cawv txiv hmab,
thiab lub ntuj tso dej lwg nqes los.
²⁹Yixayee 'e, nej tau hmoov zoo tiag tiag li.
Leejtwg zoo thooj li nej,
yog haiv neeg uas Yawmsaub
cawm kom dim?
Nws yog daim hlau uas pab nej,
nws yog rab ntaj uas ua kom nej kov yeej.
Nej cov yeeb ncuab
yuav nkag tuaj hawm nej,
nej yuav tsuj pes ntiag
saum lawv tej chaw siab.”⚓

33

Mauxe foom koob moov rua txhua xeem Yixayee

¹Ntawm nuav moog yog Mauxe kws yog Vaajtswv tug tuabneeg tej lug foom koob moov rua cov Yixayee ua ntej kws nwg tsw tau tuag. ²Nwg has tas,
“Yawmsaub nqeg sau lub roob Xinai lug,
nwg tawm ntawm Xe‑i ci tuaj rua puab,⚓
nwg ci nplaag sau lub roob Palaa tuaj,
nwg nrug quas txheeb quas vaam leej
kws dawb huv tuaj,
muaj nplaim tawg
ntawm nwg saab teg xws.⚓
³Nwg yeej hlub nwg haiv tuabneeg.
Nwg cov tuabneeg dawb huv,
txhua tug nyob huv nwg txhais teg.
Puab pe ntawm koj kwtaw
hab txais tej lug kws koj qha.
⁴Mauxe muab txuj kevcai cob rua peb
ua Yakhauj cov tuabneeg qub txeeg qub teg.
⁵Yawmsaub txhad ua vaajntxwv huv Yesulu⚓
rua thaus cov pejxeem cov thawj
tuaj txoos ua ke
hab nrug cov Yixayee txhua xeem ua ke.

⁶“Thov ca Lunpee muaj txujsa nyob,
tsw xob tuag,
tassws ca nwg cov tuabneeg muaj tsawg.”⚓

⁷Mauxe has txug Yuta le nuav tas,
“Au Yawmsaub, thov noog Yuta tej lug,
thov coj nwg rov lug koom nwg haiv tuabneeg.
Nwg txhais teg tawm tsaam
paab nwg tug kheej.⚓
Thov koj paab nwg tawm tsaam
nwg cov yeeb ncuab.”

⁸Mauxe has txug Levi tas,
“Yawmsaub, koj le Thumi hab Uli⚓
nrug tug kws koj hlub nyob,
yog tug kws koj tub muab swm
ntawm Maxa lawm,
hab tug kws koj tawm tsaam
ntawm dej Melinpa.
⁹Nwg has rua nwg nam nwg txwv tas,
‘Kuv tsw quav ntsej puab lawm.’
Nwg tsw yuav nwg cov kwvtij
hab tsw paub nwg cov mivnyuas,
tsua qhov cov Levi ua lawv le koj tej lug
hab tuav rawv koj tej lug cog tseg.
¹⁰Puab yuav qha koj tej kevcai rua Yakhauj,
hab qha koj txuj kevcai rua Yixayee.
Puab yuav muab moov tshuaj tsw qaab
tso rua ntawm koj xubndag,
hab muab tej kws hlawv huvsw xyeem
tso rua sau koj lub thaaj.
¹¹Au Yawmsaub, thov foom koob moov
rua nwg tej hov txhua chaw,
hab leeg yuav tej num
kws nwg txhais teg ua.
Thov koj tsoo nwg cov yeeb ncuab lub duav,
yog cov kws ntxub nwg,
ua kuas sawv tsw taug dua le.”

¹²Mauxe has txug Npeeyamee tas,
“Tug kws Yawmsaub hlub
nyob tso sab plhuav rua huv nwg.
Yawmsaub tsom kwm nwg taag naj taag nub,
nwg nyob sau Yawmsaub xub pwg.”

¹³Mauxe has txug Yauxej tas,
“Thov Yawmsaub foom koob moov
rua nwg lub tebchaws,
ca nwg tau dej lwg
kws zoo kawg nkaus sau ntuj,
hab tau tej dej kws nyob huv qaab ntuj,
¹⁴hab tau tej qoob loos zoo kawg nkaus
ntawm lub nub,
hab tau tej qoob loos nplua quas mag
lawv lub hli,
¹⁵hab tau tej yaam kws zoo kawg
sau tej roob kws ib txwm muaj nyob,
hab tau tej kws zoo nplua mag
sau tej ncov roob kws nyob moog ib txhws,
¹⁶hab tau tej kev tswm txaj huv nplajteb
hab txhua yaam kws nyob huv,
hab tau txujkev hlub ntawm tug kws nyob
huv tsob ntoo cig quas plawg hov.
Thov kuas tej koob moov nuav
lug rua sau Yauxej lub taubhau,
hab lug rua sau tug kws ua
nwg cov kwvtij tug thawj lub taj taubhau.
¹⁷Nwg yog thawj tug mivnyuas txwv nyuj
kws muaj meej mom,
nwg txwm kub zoo yaam le kub nyuj qus.
Txwm kub hov yuav laub txhua
haiv tuabneeg moog txug qaab ntuj kawg.
Efa‑i quas vaam leej kuj zoo le nuav,
Manaxe quas txheeb leej kuj zoo ib yaam nkaus.”

¹⁸Mauxe has txug Xenpuloo tas,
“Xenpuloo, ca le zoo sab xyiv faab
rua thaus koj tawm moog,
hab Ixakha ca le zoo sab
rua huv koj lub tsev ntaub.
¹⁹Ob tug yuav hu tuabneeg tuaj
rua ntawm ob tug lub roob,
hab yuav xyeem tsaj raug cai hov ntawd.
Ob tug nqug tej kws zoo nplua quas mag
huv havtxwv lug,
hab tau tej hov txhua chaw tswm txaj
kws muab zais rua huv xuab zeb.”

²⁰Mauxe has txug Kas tas,
“Qhuas Vaajtswv
kws nthuav Kas lub tebchaws daav.
Kas nyob zoo yaam le tsuv ntxhuav,
dua luas npaab dua luas taj taubhau.
²¹Nwg xaiv lub tebchaws
kws zoo kawg nkaus rua nwg,
vem yog hov ntawd
tseg ca rua tug thawj kws kaav.
Thaus pejxeem cov thawj tuaj txoos ua ke,
nwg ua lawv le Yawmsaub txujkev ncaaj nceeg,
hab ua lawv le tej kevcai
kws muab rua cov Yixayee.”

²²Mauxe has txug Ntaaj tas,
“Ntaaj yog ib tug mivnyuas tsuv ntxhuav
kws dha caws qa huv Npasaa tebchaws tuaj.”

²³Mauxe has txug Nathali tas,
“Nathali 'e, koj yog tug kws tau
Yawmsaub txujkev hlub puv npo,
hab tau Yawmsaub le koob moov puv nkaus,
ca le txeeb dej havtxwv⚓
hab yaav qaab teb ua koj tug.”

²⁴Mauxe has txug Asaw tas,
“Thov kuas Asaw tau koob moov
ntau dua cov tub huvsw,
thov kuas nwg cov kwvtij hlub nwg,
hab ca nwg raus kwtaw rua huv thoob roj.
²⁵Koj tej laag rooj yog hlau hab tooj lab,
koj txujsa ntev le caag, koj tug zug
yuav muaj ntev le ntawd.”

²⁶“Yesulu 'e, tsw muaj leejtwg
zoo cuag le Vaajtswv.
Nwg taug txujkev sau ntuj lug
paab koj hab muaj meej mom
caij fuab cua lug.
²⁷Vaajtswv kws ib txwm muaj nyob
yog mej lub chaw nyob,
nwg txhais npaab kws nyob moog ib txhws
cug rawv mej.
Nwg lawv yeeb ncuab tswv
ntawm mej xubndag moog,
hab has tas, ‘Ua kuas puam tsuaj lauj!’
²⁸Ua le nuav Yixayee txhad le nyob
tso sab plhuav,
Yakhauj caaj ceg kuj nyob thaaj yeeb
rua huv lub tebchaws kws muaj
qoob loos muaj cawv txwv maab,
hab lub ntuj tso dej lwg nqeg lug.
²⁹Yixayee 'e, mej tau moov zoo tag tag le.
Leejtwg zoo thooj le mej, yog haiv tuabneeg
kws Yawmsaub cawm kuas dim?
Nwg yog daim hlau kws paab mej,
nwg yog raab ntaaj
kws ua kuas mej kov yeej.
Mej cov yeeb ncuab
yuav nkaag tuaj hawm mej,
mej yuav tsuj pis ntag
sau puab tej chaw sab.”⚓