17

Nkauli-am Twv Cov Yixalayees

¹Cov Filitees txhij tubrog tuaj tua lub nroog Xukaus hauv tebchaws Yudas; lawv tuaj tsuam yeej rau ntawm qhov chaw uas hu ua Efes Damees, ntu nruab nrab ntawm lub nroog Xukaus thiab Axekas. ²Xa-ules thiab cov tubrog Yixalayees mus tsuam yeej rau ntawm lub Hav Elas, lawv npaj tos yuav nrog cov Filitees sib tua. ³Cov Filitees tuaj sawv saum ib lub laj roob, cov Yixalayees los mus sawv saum ib lub laj roob thiab, muaj ib lub hav quas.
⁴Muaj ib tug txivneej hu Nkauli-am, nws nyob hauv lub nroog Nkas tuaj, nws tawm hauv cov Filitees lub yeej tuaj twv cov Yixalayees. Nws siab rau tshim, ⁵nws ntoo ib lub kausmom tooj thiab hnav ib lub tsho tooj hnyav ib puas nees nkaum tsib choj, ⁶thiab muab tooj looj nws ob txhais ceg huv tibsi, nws kwv rawv ib rab hmuv tooj saum xubpwg. ⁷Nws rab hmuv tuab ib yam li lub nqos ntos ntaub, thiab lub vos hlau hnyav kwvlam li kaum tsib choj. Muaj ib tug tubrog nqa Nkauli-am daim thaiv hniav ntaj mus ua Nkauli-am ntej. ⁸Nkauli-am sawv nres nroos hu nrov nrov rau cov Yixalayees hais tias, “Nej tuaj ua dabtsi ntawm ko, tuaj tua rog los? Xa-ules cov nyuag qhev, kuv yog neeg Filitees! Cia li xaiv nej cov neeg ib tug tuaj tua kuv. ⁹Yog nws tua yeej kuv, peb yuav ua nej qhev; tiamsis yog kuv tua yeej nws, nej yuav tsum ua peb qhev. ¹⁰Kuv sawv ntawm no twv ntxhias cov tubrog Yixalayees ntag. Cia li xaiv nej cov ib tug tuaj tua kuv.” ¹¹Thaum Xa-ules thiab nws cov tubrog hnov li ntawd, lawv ntshai kawg li.

Daviv Mus Xyuas Nws Cov Tijlaug Hauv Yeej Tubrog

¹²Daviv yog Yexais tus tub, Yexais yog neeg Efalathas uas nyob hauv lub nroog Npelehees hauv tebchaws Yudas. Yexais muaj yim leej tub, lub sijhawm uas Xa-ules ua vajntxwv, Yexais laus heev lawm. ¹³Nws peb tug tub hlob nrog Xa-ules mus ua tubrog. Tus hlob hu ua Eli-as, tus ob hu ua Anpinadas thiab tus peb hu ua Samas. ¹⁴Daviv yog tus tub ntxawg, thaum Daviv peb tug tijlaug nrog Xa-ules mus ua rog ntawd, ¹⁵Daviv pheej ib sij rov qab mus pab nws txiv yug tsiaj hauv lub nroog Npelehees.
¹⁶Nkauli-am niaj tagkis thiab niaj hmo tuaj twv cov Yixalayees tau plaub caug hnub.
¹⁷Muaj ib hnub Yexais hais rau Daviv hais tias, “Koj cia li xa ib nta tawb mov kib thiab kaum lub ncuav mus rau koj cov tijlaug uas nyob tom tshavrog. ¹⁸Koj coj kaum thooj mis nyuj qhuav no mus rau tus thawj tubrog. Mus nug saib koj peb tug tijlaug nyob li cas lawm. Koj kom lawv muab ib yam dabtsi rau koj nqa los rau kuv saib, kuv thiaj paub hais tias, koj mus pom lawv tiag thiab lawv puavleej noj qab nyob zoo. ¹⁹Vajntxwv Xa-ules, koj cov tijlaug thiab cov tubrog Yixalayees puavleej nyob nram lub Hav Elas tawmtsam cov Filitees.”
²⁰Thaum kaj ntug txoog Daviv txawm muab nws pab yaj tso rau lwm tus saib, ces nws xa mov mus rau nws coj tijlaug raws li nws txiv hais rau nws. Daviv mus txog hauv lub yeej tub rog, thaum cov Yixalayees tabtom tawm mus rau tom tshavrog thiab qw ntshoo rooj. ²¹Cov Filitees thiab cov Yixalayees nyias txhij nyias cov tubrog tuaj sawv ua phiaj yiav, thiab sib ntsia tos ntsoov yuav sib tua. ²²Daviv muab tej zaub mov tso plhuav rau tus uas saib kev noj haus, Daviv khiav ceev nrooj mus cuag nws cov tijlaug, thiab nug saib nws cov tijlaug noj nyob li cas. ²³Thaum Daviv tabtom nrog nws cov tijlaug tham, Nkauli-am txawm tawm tuaj twv cov Yixalayees raws li nws niaj hnub ua. Thiab Daviv kuj hnov tej lus uas Nkauli-am khav. ²⁴Thaum cov Yixalayees pom dheev Nkauli-am, lawv ntshai heev, lawv nyias txawm khiav nyias zom zaws mus lawm. ²⁵Lawv sib tham hais tias, “Nej sim ntsia saib! Nej cia li mloog tej lus uas nws khav! Vajntxwv Xa-ules hais tias, yog leejtwg mus tua tau nws, vajntxwv yuav muab nqi zog ntau thiab muab nws tus ntxhais rau tus ntawd yuav, thiab nws txiv tsevneeg yuav tsis tau them se.”
²⁶Daviv nug cov neeg uas nyob ze ntawd hais tias, “Tus uas tua tau tus neeg Filitees ntawd thiab pab tau cov Yixalayees tsis poob ntsejmuag yuav tau dabtsi no? Tus neeg Filitees uas tsis ua kevcai txiav ntawd yog leejtwg, ua li cas nws yuav muaj cuabkav khav thiab hais lus saib tsis taus Vajtswv tus uas muaj sia nyob cov tubrog?” ²⁷Lawv qhia rau Daviv hais tias, tus uas tua tau Nkauli-am tuag yuav tau nqi zog dabtsi.
²⁸Eli-as uas yog Daviv tus tijlaug hlob hnov Daviv nrog cov neeg sib tham. Nws npautaws rau Daviv thiab cem hais tias, “Koj tuaj ua dabtsi ntawm no? Leejtwg zov koj pab yaj tom tiaj mojsab qhua? Ua li cas koj yuav tawv ua luaj? Kuv paub koj lub nyuag siab ko, koj xav tuaj xauj luag sib tua xwb los mas!”
²⁹Daviv teb hais tias, “Kuv ua txhaum dabtsi? Kuv txawm nug tsis tau ib los li los?” ³⁰Daviv txawm tig hlo mus nug dua lwm tus tib lo lus qub, thiab txhua zaus uas nws nug, luag teb nws ib yam nkaus.
³¹Cov neeg uas hnov Daviv hais, lawv txawm mus piav qhia rau Xa-ules, Xa-ules thiaj hu Daviv los cuag nws. ³²Daviv hais rau Xa-ules hais tias, “Vajntxwv, tsis tsimnyog leejtwg yuav ntshai tus neeg Filitees ntawd li! Kuv yuav mus nrog nws sib tua ntag.”
³³Xa-ules teb hais tias, “Tsis tau, koj yuav ua li cas tua tau nws? Koj tseem yog menyuam yaus xwb, Nkauli-am yeej ibtxwm ua rog los laus li ntawd!”
³⁴Daviv teb hais tias, “Vajntxwv, kuv ibtxwm yug kuv txiv pab yaj. Thaum muaj tsov ntxhuav lossis dais los tom ib tug menyuam yaj kwv mus lawm, ³⁵kuv cia li raws qab mus ntaus thiab cawm tau tus yaj ntawd rov los. Yog hais tias tsov ntxhuav lossis dais tig los tom kuv, kuv cia li khawm nkaus cajdab qhau thiab muab ntaus tuag kiag. ³⁶Kuv twb tua tau tsov ntxhuav thiab dais lawm, kuv yuav ua ib yam li ntawd rau tus neeg Filitees uas tsis ua kevcai txiav no, vim nws txob thuam Vajtswv tus uas muaj sia nyob cov tubrog. ³⁷Tus TSWV cawm kuv dim ntawm tsov ntxhuav thiab dais li cas; nws yeej yuav cawm kuv dim ntawm tus neeg Filitees li ntawd thiab.”
Xa-ules teb hais tias, “Tau lawm, koj cia li mus thiab tus TSWV yuav nrog nraim koj.” ³⁸Xa-ules muab nws cev ris tsho tooj rau Daviv hnav thiab muab nws lub kausmom tooj rau Daviv ntoo. ³⁹Daviv muab Xa-ules rab ntaj ris rau ntawm duav thiab sim mus kev, tiamsis Daviv mus tsis taus kev li, rau qhov nws hnav tsis kam tej ntawd. Daviv hais rau Xa-ules hais tias, “Yog kuv hnav tej no, kuv mus sib tua tsis tau, rau qhov kuv tsis tau hnav dua tej no li.” Yog li ntawd, Daviv txawm muab hle tseg. ⁴⁰Daviv nqa tus pas nrig uas nws nrig zov nws pab yaj, thiab nws khaws tau tsib lub pobzeb kheej kheej nram ntug dej ntim rau hauv nws lub hnab. Nws nqa ib txoj zes hlua, ces nws txawm mus tua Nkauli-am.

Daviv Tua Nkauli-am Tuag

⁴¹Tus neeg Filitees ncaj nraim tuaj rau ntawm Daviv, tus uas nqa Nkauli-am daim thaiv hniav ntaj ua ntej loo tuaj. Nkauli-am tuaj ze zuj zus rau ntawm Daviv, ⁴²thaum nws pom Daviv tseeb lawm, nws saib tsis taus Daviv, rau qhov Daviv tseem yog ib tug tub hluas uas zoo nraug ntxiag xwb. ⁴³Nkauli-am hais rau Daviv hais tias, “Koj nqa tus pas nrig ko tuaj ua dabtsi? Koj xav hais tias kuv yog dev no los?” Nws txawm tuav nws tus vajtswv lub npe foom phem rau Daviv. ⁴⁴Nws thuam Daviv hais tias, “Tuaj ntawm no, kuv yuav muab koj lub cev rau tej noog thiab tej tsiaj noj.”
⁴⁵Daviv teb hais tias, “Koj nqa ntaj, nqa hmuv thiab xubvos tuaj tua kuv, tiamsis kuv tuav tus TSWV uas muaj hwjchim loj kawg nkaus uas yog cov tubrog Yixalayees tus Vajtswv uas koj saib tsis tau lub npe tuaj tua koj. ⁴⁶Hnub no tus TSWV yuav muab koj cob rau kuv tes; kuv yuav tua tau koj thiab txiav koj lub taubhau povtseg. Kuv yuav muab cov tubrog Filitees lub cev rau tej noog thiab tej tsiaj noj. Kom neeg thoob ntiajteb thiaj paub hais tias cov Yixalayees muaj Vajtswv tiag, ⁴⁷thiab txhua tus uas nyob ntawm no yuav pom hais tias tus TSWV tsis siv ntaj lossis hmuv cawm nws haivneeg. Tus TSWV yuav tua yeej nej, thiab nws yuav muab nej txhua tus cob rau peb tes.”
⁴⁸Nkauli-am txawm tuaj ze zuj zus rau ntawm Daviv, thiab Daviv kuj khiav ceev nrooj mus ti nkaus rau ntawm cov Filitees tus ciam tua Nkauli-am. ⁴⁹Daviv rho hlo ib lub pobzeb hauv hnab los tso rau ntawm txoj zes hlua thiab fiav mus ntaub nkaus Nkauli-am hauvpliaj tawg rhe, ua rau nws vau hlo khwb nkaus rau hauv av. ⁵⁰Daviv tua Nkauli-am tuag, tsis yog muab ntaj tua, tiamsis yog muab txoj zes hlua thiab ib lub pobzeb xwb! ⁵¹Daviv khiav loo mus sawv saum Nkauli-am thiab rho hlo Nkauli-am rab ntaj hauv hnab los tua Nkauli-am tuag kiag thiab txiav Nkauli-am cajdab tu nrho.
Thaum cov Filitees pom hais tias, lawv tus tubrog uas ua tau heev tuag lawm, ces lawv txawm tig loo khiav. ⁵²Cov tubrog Yixalayees thiab cov tubrog Yudas thiaj qw ntshoo rooj caum cov Filitees tua mus ti nkaus lub nroog Nkas thiab lub nroog Ekiloos tej roojvag. Cov Filitees raug mob pw pawglug taug txojkev uas mus rau hauv lub nroog Sa-alayees mus ti nkaus lub nroog Nkas thiab lub nroog Ekiloos. ⁵³Thaum cov Yixalayees uas caum tua cov Filitees rov los, lawv tshawb cov tubrog Filitees tej khoom txhua yam hauv yeej nqa los. ⁵⁴Daviv nqa Nkauli-am lub taubhau los rau hauv lub nroog Yeluxalees, tiamsis Daviv nqa Nkauli-am tej cuabyeej ua rog mus tso rau hauv Daviv lub tsevntaub.

Coj Daviv Mus Cuag Xa-ules

⁵⁵Thaum Xa-ules pom Daviv mus tua Nkauli-am lawm, Xa-ules nug Aneles uas yog nws tus thawj tubrog hais tias, “Aneles, tus hluas ntawd yog leejtwg tus tub?”
Aneles teb hais tias, “Vajntxwv, kuv tsis paub.”
⁵⁶Xa-ules hais tias, “Koj cia li mus nug saib.”
⁵⁷Yog li ntawd, thaum Daviv mus tua tau Nkauli-am, thiab nws rov los txog rau hauv yeej, Aneles txawm coj Daviv mus cuag Xa-ules. Daviv tseem nqa rawv Nkauli-am lub taubhau. ⁵⁸Xa-ules nug Daviv hais tias, “Tub hluas, koj yog leejtwg tub?”
Daviv teb hais tias, “Kuv yog koj tus tubtxib Yexais uas nyob hauv lub nroog Npelehees tus tub.”

17

Davi tua Kaulia

¹Cov Filixatee txhij tub rog yuav tuaj ua rog, lawv tuaj txoos ua ke ntawm lub moos Xaukhau uas nyob hauv Yuda tebchaws. Lawv ua yeej rau ntawm Xaukhau thiab Axekha ntu nruab nrab ntawm Efedami. ²Mas Xa‑u thiab cov Yixayee txhij rog ua ke tuaj ua yeej rau hauv lub hav Ela, npaj chaw ua rog rau cov Filixatee. ³Cov Filixatee sawv rau saum ib lub roob, cov Yixayee sawv dua rau saum ib lub roob, muaj ib lub hav quas nruab nrab. ⁴Muaj ib tug yawg uas txawj ua rog heev tawm hauv cov Filixatee lub yeej tuaj npe hu ua Kaulia. Nws siab rau tshis thiab ib dos, nws yog neeg hauv lub moos Ka. ⁵Nws ntoo ib lub mom tooj liab saum nws taubhau thiab hnav lub tsho tooj liab hnyav tsib txhiab sekhee.⚓ ⁶Nws rau nrhoob tooj liab thiab khuam ib rab hmuv tooj liab ntawm xub pwg laim nkaus. ⁷Tus ko hmuv ntoo uas nws tuav loj li rab nqos ntos ntaub, lub hauv hmuv yog hlau hnyav rau pua sekhee.⚓ Tus tub rog uas tuav daim phiaj hlau thaiv nws mus ua nws ntej. ⁸Nws tuaj sawv qw rau Yixayee cov tub rog uas nyob ib kab sab tias, “Nej tawm tuaj nyob ib kab sab ua dabtsi li kod? Kuv yog neeg Filixatee los tsis yog? Nej yog Xa‑u cov qhev los tsis yog? Cia li xaiv ib tug nyob nej chaw nqes tuaj rau ntawm kuv no. ⁹Yog nws muaj peevxwm nrog kuv ua rog thiab tua tau kuv, peb cov yuav yeem ua nej qhev. Yog kuv kov yeej nws thiab tua tau nws, nej cov yuav tsum ua peb qhev thiab tu peb.” ¹⁰Thiab tus Filixatee ntawd hais tias, “Hnub no kuv twv ntxhias Yixayee cov tub rog xa ib tug tuaj mas wb yuav sib tua.” ¹¹Thaum Xa‑u thiab cov Yixayee sawvdaws hnov tus Filixatee tej lus ntawd, lawv poob siab thiab ntshai kawg li.
¹²Mas Davi yog Yexi tus tub. Yexi yog neeg Efatha nyob hauv lub moos Npelehee hauv Yuda tebchaws, nws muaj yim tus tub. Thaum Xa‑u ua vajntxwv Yexi kuj laus heev hnub nyoog nchav lawm. ¹³Yexi peb tug tub hlob kuj nrog Xa‑u mus ua rog. Nws peb tug tub uas mus ua rog ntawd tus hlob npe hu ua Elia, tus ob hu ua Anpinada thiab tus peb hu ua Sama. ¹⁴Davi yog tus tub ntxawg. Peb tug tijlaug hlob kuj nrog Xa‑u mus lawm. ¹⁵Davi mus mus los los rau ntawm Xa‑u thiab yug nws txiv pab yaj ntawm Npelehee. ¹⁶Tus Filixatee ntawd tawm tuaj twv ntxhias thaum tagkis thiab thaum yuav tsaus ntuj tau plaub caug hnub.
¹⁷Yexi hais rau nws tus tub Davi tias, “Koj cia li coj cov qeb kib ib efa⚓ thiab kaum lub ncuav no kavtsij mus rau koj cov tijlaug hauv lub yeej. ¹⁸Thiab coj kaum thooj nyuj mis nkoog khov no mus rau lawv tus thawj rog uas kav ib txhiab leej. Saib koj cov tijlaug nyob zoo li cas thiab coj lawv li ib yam los rau kuv saib. ¹⁹Xa‑u thiab koj cov tijlaug thiab cov Yixayee sawvdaws nyob hauv lub hav Ela tabtom ua rog rau cov Filixatee.”
²⁰Davi thiaj sawv ntxov tsees tso pab yaj tseg rau ib tug saib, thauj zaub mov mus raws li Yexi hais rau nws. Nws tuaj txog hauv lub yeej rau thaum pab tub rog tabtom tawm mus nyob ib kab sab rau ntawm chaw ua rog thiab qw ua tsuj ua tsaug. ²¹Cov Yixayee thiab cov Filixatee tawm tuaj yuav nqes tes ua rog, ob tog tub rog tuaj sawv saib ntswb ntsoov. ²²Davi muab tej zaub mov tso rau tus uas saib zaub mov ces txawm dhia mus rau tom chaw ua rog nrog nws tijlaug tham. ²³Thaum lawv tabtom hais lus tus yawg Filixatee uas hu ua Kaulia, uas yog neeg hauv lub moos Ka uas txawj ua rog heev txawm tawm hauv pab tub rog Filixatee uas sawv ua ib kab sab ntawd txav zog tuaj, thiab hais twv ntxhias yam li yav tag los lawd, mas Davi kuj hnov.
²⁴Thaum cov Yixayee sawvdaws pom tus yawg ntawd lawv txawm khiav thim rov qab ntshai kawg li. ²⁵Cov Yixayee sib tham hais tias, “Nej twb pom tus yawg uas tawm tuaj ntawd lawm lov? Nws tawm tuaj twv ntxhias cov Yixayee tiag tiag li. Yog leejtwg tua tau nws, vajntxwv yuav muab nyiaj txiag ntau nplua mias thiab muab vajntxwv tus ntxhais rau tus ntawd yuav, thiab pub kom nws txiv tsev neeg tsis txog them se rau hauv cov Yixayee.” ²⁶Ces Davi txawm hais rau cov neeg uas nrog nws sawv ua ke ntawd tias, “Lawv yuav ua li cas rau tus uas tua tau tus Filixatee ntawd thiaj rhuav tau qhov uas nws ua rau cov Yixayee poob ntsej muag? Tus yawg Filixatee uas tsis ua kevcai txiav ntawd yog leejtwg es nws yuav hais twv ntxhias rau Vajtswv uas muaj txojsia nyob pab tub rog?” ²⁷Cov pejxeem kuj teb nws ib yam nkaus tias, “Yog leejtwg tua tau tus yawg ntawd nws yuav tau raws li hais cia lawd.”
²⁸Thaum Elia uas yog Davi tus tijlaug hlob hnov Davi hais rau cov neeg ntawd, Elia txawm npau taws rau Davi thiab hais tias, “Koj tuaj ua dabtsi? Koj tseg ob peb tug nyuag yaj rau leejtwg saib xyuas hauv tebchaws moj sab qhua? Kuv yeej paub koj tej nyuag kev khav theeb thiab tej kev phem hauv koj lub siab. Koj tsuas yog tuaj saib lawv sib tua xwb.” ²⁹Davi txawm teb tias, “Kuv tau ua li cas maj? Kuv tsuas yog hais lo lus xwb.” ³⁰Davi txawm tig mus hais dua rau lwm tus ib yam nkaus li ntawd. Tej neeg kuj teb ib yam li qub rau nws.
³¹Thaum lawv hnov Davi tej lus lawv txawm piav rau Xa‑u paub, Xa‑u thiaj txib neeg mus coj Davi los. ³²Davi thiaj hais rau Xa‑u tias, “Tsis txhob cia leejtwg poob siab rau yawg ntawd kiag li. Kuv uas yog koj tus qhev yuav mus nrog tus Filixatee ntawd sib tua.” ³³Mas Xa‑u hais rau Davi tias, “Koj tsis muaj peevxwm mus nrog tus Filixatee ntawd sib tua, rau qhov koj tseem yog menyuam hluas, tiamsis tus yawg ntawd yeej ua tub rog txij thaum hluas los lawm.” ³⁴Tiamsis Davi hais rau Xa‑u tias, “Kuv uas yog koj tus qhev txeev yug kuv txiv tej yaj, mas thaum muaj tsov ntxhuav muaj dais tuaj tom menyuam yaj, ³⁵kuv muab raws ntaus thiab cawm tus menyuam yaj ntawd dim hauv nws lub qhov ncauj los. Yog tsov tig kiag los tom kuv, kuv kuj ntsiab nkaus puab tsaig muab ntaus tuag kiag. ³⁶Kuv uas yog koj tus qhev twb txeev tua tau tsov ntxhuav thiab dais los lawm. Mas tus Filixatee uas tsis ua kevcai txiav ntawd kuj yuav zoo li tej tsiaj ntawd rau qhov nws tau hais twv ntxhias Vajtswv uas muaj txojsia nyob cov tub rog.” ³⁷Thiab Davi hais tias, “Yawmsaub uas cawm kuv dim hauv tsov ntxhuav tej rau tes rau taw thiab dim hauv dais tej rau tes rau taw, yuav cawm kuv dim hauv tus Filixatee ntawd txhais tes thiab.” Xa‑u txawm hais rau Davi tias, “Cia li mus, thov Yawmsaub nrog nraim koj.”
³⁸Xa‑u txawm muab nws tej ris tsho ua rog rau Davi hnav thiab muab lub mom tooj liab rau Davi ntoo saum taubhau thiab muab lub tsho hlau rau Davi hnav. ³⁹Davi muab Xa‑u rab ntaj los sia ris zawm lub tsho hlau rau ntawm duav, ces nws sim mus kev mas mus tsis taus rau qhov nws hnav tsis kam tej ntawd. Ces Davi txawm hais rau Xa‑u tias, “Kuv hnav tej no mus tsis taus, rau qhov kuv hnav tsis kam.” Ces Davi txawm muab hle. ⁴⁰Nws tuav rawv nws tus pas nrig thiab xaiv tsib lub qe zeb kheej kheej hauv hav los ntim rau hauv nws lub hnab thoob puab uas nws khuam yug yaj. Nws nqa ib txoj hlua fiav ntaus qe zeb, nws nam zog mus ze tus Filixatee ntawd.
⁴¹Tus yawg Filixatee ntawd kuj nam zog tuaj ze Davi, tus uas tuav daim phiaj hlau thaiv kuj ua nws ntej. ⁴²Thaum tus Filixatee tsa muag ntsia pom Davi nws kuj saib tsis taus Davi rau qhov Davi tsuas yog ib tug hluas ntsej muag tshiab liab ploog zoo nraug ntxiag xwb. ⁴³Nws txawm hais rau Davi tias, “Kuv yog dev lov es koj yuav coj ib tug nyuag pas tuaj ntawm kuv?” Ces nws txawm tuav nws tej dab qhua lub npe tsawm foom Davi. ⁴⁴Tus Filixatee hais rau Davi tias, “Cia li los rau ntawm kuv no. Kuv yuav muab koj tej nqaij rau tej liaj dav saum nruab ntug thiab tej tsiaj qus noj.” ⁴⁵Ces Davi hais rau nws tias, “Koj coj ntaj coj hmuv thiab coj hmuv nkaug tuaj tawm tsam kuv. Tiamsis kuv tuav Yawmsaub uas muaj hwjchim loj kawg nkaus lub npe tuaj tawm tsam koj. Nws yog Yixayee pab tub rog tus Vajtswv uas koj twv ntxhias. ⁴⁶Hnub no Yawmsaub yuav muab koj cob rau hauv kuv txhais tes, kuv yuav muab koj tua thiab muab koj lub taubhau txiav pov tseg. Hnub no kuv yuav muab Filixatee cov tub rog tej cev tuag rau tej liaj dav saum nruab ntug thiab tej tsiaj qus hauv ntiajteb noj, mas ib tsoom neeg hauv qab ntuj yuav paub tias muaj ib tug Vajtswv nyob hauv Yixayee, ⁴⁷thiab tej neeg uas tuaj ua ke no huvsi yuav paub tias Yawmsaub tsis yog siv ntaj siv hmuv cawm neeg, rau qhov kev ua rog zaum no yog Yawmsaub ua, mas nws yuav muab nej cob rau hauv peb txhais tes.”
⁴⁸Thaum tus Filixatee ntawd sawv tsees nam zog tuaj ze yuav ntaus Davi, Davi kuj dhia ceev nrooj mus rau ntawm lub chaw ua rog rau tus Filixatee ntawd. ⁴⁹Davi cev tes rho kiag ib lub qe zeb hauv lub hnab los fiav ntawm txoj hlua ntaus raug tus Filixatee ntawd hauv pliaj. Lub qe zeb ntsia nkaus rau ntawm hauv pliaj ua rau nws ntog khwb nkaus rau hauv av.
⁵⁰Yog li no Davi thiaj siv txoj hlua fiav thiab ib lub qe zeb xwb kov yeej tus Filixatee ntawd. Nws muab tus Filixatee ntaus thiab muab tua pov tseg. Davi tsis muaj ntaj hauv nws txhais tes li. ⁵¹Davi thiaj dhia mus sawv kiag saum tus ntawd lub cev tuag thiab rho kiag rab ntaj hauv tus Filixatee ntawd lub hnab los txiav lub taubhau tu nrho.
Thaum cov Filixatee pom tus tub rog uas nyob lawv chaw ua rog tuag lawm, lawv thiaj tig kiag khiav. ⁵²Cov Yixayee thiab cov Yuda txawm sawv tsees qw nrov mus raws caum cov Filixatee mus txog ntua lub moos Ka thiab txog lub rooj loog lub moos Ekhoo. Cov Filixatee uas raug mob thiaj ntog taug kev ntawm lub moos Sa‑ala‑i mus txog ntua lub moos Ka thiab lub moos Ekhoo. ⁵³Mas cov Yixayee thiaj rov qab los tsis caum cov Filixatee lawm thiab mus lws tej qhov txhia chaw hauv lawv lub yeej. ⁵⁴Davi kuj coj tus Filixatee ntawd lub taubhau mus rau hauv lub nroog Yeluxalees. Tiamsis tej cuab yeej mas Davi coj mus khaws rau hauv nws lub tsev ntaub.
⁵⁵Thaum Xa‑u pom Davi tawm mus ntaus rog rau tus Filixatee ntawd, nws txawm hais rau Anaw uas yog nws tus thawj rog tias, “Anaw, tus hluas ntawd yog leejtwg li tub?” Anaw teb tias, “Vajntxwv uas muaj txojsia nyob, kuv yeej tsis paub thiab.” ⁵⁶Vajntxwv txawm hais tias, “Cia li mus nug saib tug nyuag hluas ntawd yog leejtwg li tub.” ⁵⁷Thaum Davi mus tua tus Filixatee rov los, Anaw coj nws mus cuag Xa‑u. Davi nqa rawv tus Filixatee ntawd lub taubhau mus thiab. ⁵⁸Xa‑u thiaj nug tias, “Tub hluas 'e, koj yog leejtwg li tub?” Davi teb tias, “Kuv yog koj tus qhev Yexi tus tub, yog neeg hauv Npelehee.”