73

NTU PEB

(Phau Ntawv Nkauj 78–89)

Vajtswv Txojkev Ncaj Ncees

¹Vajtswv ua zoo kawg nkaus rau
cov Yixalayees uas muaj lub siab ncaj ncees.
²Tiamsis kuv twb tsis tshua muaj siab vam lawm;
kuv kev ntseeg twb ploj yuav tas
³rau qhov kuv khib cov neeg khavtheeb
thaum kuv pom hais tias cov neeg
siab phem lub neej zoo dua.

⁴Lawv tsis tau tiv kev mob kev nkees,
lawv noj qab nyob zoo thiab lawv muaj zog npho
⁵lawv tsis tau tiv kev txomnyem li luag tej;
thiab lawv tsis muaj kev ntxhov siab li luag lwm tus.
⁶Yog li ntawd, lawv thiaj li muab
kev khavtheeb
los coj ib yam li coj xauv, thiab muab kev nruj tsiv
los hnav ib yam li hnav lub tsho ntev;
⁷lawv lub siab nthuav tej kev phem
tawm tuaj,
thiab lawv lub tswvyim npaj rawv ua kev phem kev qias.
⁸Lawv luag lwm tus plig thiab hais tej
lus phem lus qias;
lawv khavtheeb thiab tuav hauv tsimtxom luag.
⁹Lawv thuam Vajtswv tus uas nyob
saum ntuj ceebtsheej
thiab hais lus khavtheeb ntxhias
yuam tej neeg ntiajteb no.
¹⁰Txawm yog Vajtswv haivneeg los
cia li yuam kev nrog cov neeg ntawd lawm,
thiab nyiam ntseeg lawv tej lus heev.
¹¹Lawv hais tias, “Vajtswv yeej tsis
paub li,
tus uas muaj hwjchim loj kawg nkaus
los yeej tsis paub zaj no li.”
¹²Cov neeg siab phem yeej los zoo li ntawd,
lawv muaj txhua yam nplua mias
lawm los lawv yimhuab xav muaj ntau ntxiv.

¹³Qhov uas kuv tswj kuv lub siab kom
ua tau neeg zoo
thiab tsis ua txhaum ntawd txawm
tsis muaj nqis li los?
¹⁴Vajtswv, koj tau ua rau kuv tiv
kev txomnyem tas hnub;
thiab koj rau txim rau kuv txhua tagkis sawv ntxov.

¹⁵Yog kuv lam tau lam hais tej ntawd,
ntshai kuv tsis coj lub neej zoo li koj haivneeg.
¹⁶Zaj no nyuaj kawg li, tiamsis kuv
muab los xav txhij xav txhua saib zoo li cas,
txawm yog li ntawd los kuv yeej tsis totaub
¹⁷mus txog thaum uas kuv mus rau
hauv koj lub Tuamtsev.
Thaum ntawd kuv mam paub tseeb txog tej uas yuav los
raug cov neeg siab phem ntawd.

¹⁸Qhov tseemceeb, koj yuav cia lawv
taug txojkev uas nplua nplua kom lawv ntog
thiab puastsuaj mus.
¹⁹Tib ntsais muag xwb lawv cia li raug
kev puastsuaj tas;
thaum kawg lawv yuav poob mus rau
txojkev txomnyem heev!
²⁰Lawv lub neej zoo ib yam li neeg ua
npau suav,
thaum nws tsim los nws tsis nco qab
txhua yam tas lawm;
Tus TSWV, thaum koj sawv tsees
los, cov neeg ntawd yuav ploj ntais mus.

²¹Thaum kuv chim thiab tu siab heev,
²²kuv ruam ib yam li tus tsiaj,
kuv yeej tsis totaub tej uas koj ua hlo li.
²³Txawm yog li ntawd los kuv yeej
nrog nraim koj nyob ua ke, thiab koj
yeej tuav rawv kuv txhais tes.
²⁴Koj tej lus qhuab ntuas niaj hnub coj
kuv txoj haukev,
thiab txog thaum kawg koj yuav los tos kuv mus
thiab pub rau kuv tau ntsejmuag.
²⁵Dhau koj lawm, tsis muaj lwm yam
uas kuv xav tau nyob saum ntuj.
Yog muaj koj lawm, kuv tsis ntshaw
ib yam dabtsi hauv ntiajteb no li.
²⁶Kuv lub zog thiab kuv lub siab qaug
zog zuj zus lawm,
tiamsis Vajtswv yog kuv lub zog,
nws yog tus uas kuv ntshaw mus ibtxhis.

²⁷Cov neeg uas tso koj tseg, yuav ploj
mus tas;
koj yuav ua kom cov neeg uas tsis
muab siab npuab koj raug puastsuaj tas.
²⁸Tiamsis kuv mas zoo siab kawg,
vim kuv nyob ze Vajtswv;
kuv muaj tus TSWV uas yog Vajtswv
ua tus tsomkwm kuv,
thiab kuv yuav qhia txhua yam uas
nws ua rau sawvdaws paub!

73

Ntu 3

(Nt.Nk. 73‑89)

Tus neeg phem lub khuab

Axas zaj nkauj.

¹Vajtswv yeej ua zoo rau cov Yixayee tiag tiag li,
yog ua zoo rau cov uas lub siab dawb huv.
²Kuv mas kuv txhais kotaw twb yuav dawm,
kuv txhais kotaw twb yuav plam tib tiag,
³vim yog kuv khib cov uas khav theeb,
rau thaum kuv pom
cov neeg phem vam meej.

⁴Lawv tsis muaj mob kiag li,
lawv lub cev nyob zoo thiab muaj zog ho.
⁵Lawv tsis raug ceeblaj li lwm tus,
lawv tsis raug xwm txheej phem li lwm tus.
⁶Vim li no lawv thiaj muab qhov uas khav theeb
los ua saw coj,
lawv muab qhov uas ua nruj ua tsiv
los ua tsoos tsho hnav.
⁷Lawv rog rog qhov muag qe tauv,
tej tswvyim phem phwj hauv lawv lub siab los.
⁸Lawv thuam luag
thiab hais tej lus uas xav ua phem,
lawv tsab ua loj hem tias yuav quab yuam.
⁹Lawv tsa ncauj tawm tsam lub ntuj,
lawv tus nplaig kuj taug xaiv thoob ntiajteb.
¹⁰Vajtswv cov pejxeem
thiaj tig raws lawv qab,
thiab yuav lawv tej lus
ib yam li haus dej ntau heev.⚓
¹¹Lawv hais tias,
“Vajtswv yuav paub tau li cas?
Tus uas Loj Dua Ntais txawj paub lov?”
¹²Saib maj, cov neeg phem zoo li no ntag,
lawv pheej noj qab nyob zoo
thiab vam meej tuaj.
¹³Kuv tu kuv lub siab dawb huv,
thiab ntxuav kuv txhais tes
tsis ua txhaum do do xwb.
¹⁴Kuv raug tej xwm txheej phem
ib hnub tsaus ntuj,
thiab raug muab nplawm txhua tagkis.

¹⁵Yog kuv tau hais tias,
“Kuv yuav hais li ntawd,”
kuj yog kuv fav xeeb rau koj cov menyuam.
¹⁶Tiamsis thaum kuv xav tias
kuv yuav nkag siab zaj no li cas,
kuv pom tias yog tes haujlwm uas khwv kawg,
¹⁷txog thaum kuv nkag mus
rau hauv lub chaw pe Vajtswv,
kuv thiaj tshuaj pom
lawv txojkev qhov kawg.
¹⁸Qhov tseeb koj yeej muab lawv
tso rau hauv txojkev uas nplua,
koj ua rau lawv ntog puam tsuaj tag.
¹⁹Ib pliag ntshis xwb lawv raug puam tsuaj,
lawv raug txojkev ntshai
muab ntxuav tu noob nrho mus lawm lauj!
²⁰Au tus Tswv, thaum koj tsim dheev los,
koj tsis nco qab lawv tus duab lawm,
ib yam li zaj npau suav
rau thaum yus tsim dheev los.

²¹Thaum kuv tus ntsuj plig yws thiab chim,
thaum chob txog kuv lub siab,
²²kuv txawm ruam tsis paub dabtsi li,
kuv zoo li ib tug tsiaj txhu rau koj.
²³Txawm li cas los kuv pheej nrog nraim koj,
koj tuav rawv kuv txhais tes xis cia.
²⁴Koj tej lus taw qhia coj kuv txoj hauv kev,
thiab yav tom qab koj yuav coj kuv
kom tau koob meej.
²⁵Dhau koj lawm kuv muaj leejtwg
saum ntuj ceeb tsheej?
Dhau koj lawm kuv tsis ntshaw
ib yam dabtis hauv lub ntiajteb.
²⁶Kuv lub cev thiab lub siab
yuav qaug zog mus,
tiamsis Vajtswv yog kuv lub siab lub zog,
thiab yog kuv teej kuv tug mus ib txhis.
²⁷Vim tias cov uas nyob deb koj
yuav puam tsuaj,
koj ua rau cov uas tsis muab siab npuab koj
ploj mus.
²⁸Kuv mas qhov uas kuv nyob ze Vajtswv
yog qhov zoo.
Kuv muab Vajtswv Yawmsaub
ua kuv lub chaw cawm siav,
kom kuv thiaj tau piav
txog koj tej haujlwm huvsi.