79

Thov Vajtswv Pab Cov Yixalayees

¹Vajtswv, lwm haivneeg twb
tuaj vij koj lub tebchaws lawm;
lawv tuaj ua tsis huv rau koj lub Tuamtsev uas dawbhuv,
thiab cia lub nroog Yeluxalees pob puas tas.
²Lawv cia koj haivneeg tej cev tuag
rau dav npoj noj,
thiab cia koj cov tubtxib tej cev tuag
rau tej tsiaj qus noj.
³Lawv tua koj haivneeg tej ntshav
tawm ntws cuag dej;
ntshav ntws mus thoob plaws lub
nroog Yeluxalees,
thiab tsis muaj leejtwg faus cov neeg
tuag ntawd li.
⁴Twb yog cov neeg uas nyob ibncig
peb tuaj tsimtxom peb ntag;
lawv luag peb plig thiab thuam peb
lub npe kawg li.

⁵Tus TSWV, koj yuav chim rau peb
mus ibtxhis li los?
Koj txojkev chim yuav kub li
hluavtaws mus tsis paub tuag li los?
⁶Cia koj txojkev chim mus rau
haivneeg uas tsis pehawm koj,
mus rau cov neeg uas tsis tsa ncauj thov koj.
⁷Vim lawv tau tuaj tua koj haivneeg tuag tas,
thiab tau ua rau koj lub tebchaws
puastsuaj tas lawm.

⁸Thov koj tsis txhob rau txim rau peb
vim peb cov yawgkoob tej kev txhaum.
Thov koj tshua peb; peb twb tas kev
cia siab lawm.
⁹Vajtswv, thov pab peb thiab cawm peb;
thov tso peb dim thiab zam peb tej
kev txhaum kom koj tau koob meej.
¹⁰Vim li cas yuav cia lwm haivneeg
nug peb hais tias,
“Nej tus Vajtswv dua twg lawm?”
Thov cia peb pom koj rau txim rau lwm haivneeg,
vim lawv tuaj ua rau koj cov tubtxib
nqaij ntuag ntshav nrog.

¹¹Thov koj mloog cov neeg uas raug
luag kaw tej suab quaj,
thiab siv koj lub hwjchim tso cov
neeg uas luag teem txim tuag rau lawv kom dim.
¹²Tus Tswv, thov koj ua xya npaug
pauj rau cov neeg siab phem ntawd.
Vim tej uas lawv tau ua txob thuam
koj lub koob lub npe lawm.
¹³Ces peb cov uas yog koj haivneeg,
pab yaj uas yog koj tug,
yuav ua koj tsaug thiab qhuas koj
lub npe mus ibtxhis li.

79

Quaj ntsuag vim yog Yeluxalees puam tsuaj

Axas zaj nkauj.

¹Au Vajtswv, lwm haiv neeg tau txeem mus
rau hauv koj qub txeeg qub teg,
lawv tau ua rau koj lub tuam tsev
uas dawb huv qias tsis huv,
lawv tau muab Yeluxalees ua pob tag.
²Lawv muab koj cov qhev tej cev tuag
rau tej liaj dav saum nruab ntug noj,
thiab muab koj cov neeg
uas dawb huv tej nqaij
rau tej tsiaj qus hauv ntiajteb noj.
³Lawv muab tej neeg no cov ntshav nchuav los
yam li dej puag ncig Yeluxalees,
thiab tsis tshuav leejtwg muab lawv log.
⁴Peb raug tej neeg zej zog thuam luag,
thiab raug tej neeg uas nyob ib ncig peb
luag thiab saib tsis taus.

⁵Au Yawmsaub, yuav ntev li cas?
Koj yuav chim mus ib txhis li lov?
Koj txojkev khib yuav hlawv
yam li hluavtaws kub mus li lov?
⁶Thov koj muab koj txojkev chim nchuav
rau saum cov neeg uas tsis paub koj,
thiab rau saum tej tebchaws
uas tsis tuav koj lub npe thov.
⁷Vim yog lawv tau rhuav tshem Yakhauj
thiab muab nws tej chaw nyob
tso tseg piam tag.
⁸Thov tsis txhob muab
peb tej poj koob yawm txwv tej kev txhaum
coj los rau txim rau peb.
Thov koj khuvleej peb sai sai no
vim peb poob qes kawg li.
⁹Au Vajtswv uas yog peb txojkev cawm dim,
thov pab peb lauj, vim yog saib rau koj lub npe
uas muaj hwjchim ci ntsa iab.
Thov cawm peb thiab zam peb lub txim
vim yog saib rau koj lub npe.
¹⁰Ua cas ib tsoom tebchaws yuav hais tias,
“Lawv tus Vajtswv nyob qhovtwg?”
Thov kom ib tsoom tebchaws
paub tab meeg peb lub qhov muag tias
yog koj ua pauj koj cov qhev tej ntshav
uas ntws los.
¹¹Thov kom cov uas raug ntes lub suab quaj
nrov tuaj txog ntawm koj xubntiag.
Thov koj siv koj lub hwjchim loj
tuav cov raug txim tuag txojsia.

¹²Au tus Tswv, thov pauj tej uas
cov uas nyob ib ncig peb thuam luag koj
xya npaug rau ntawm lawv lub xubntiag.
¹³Peb uas yog koj haiv neeg,
yog koj pab yaj
uas nyob hauv koj lub tshav zaub
yuav ua koj tsaug ib txhis,
peb yuav qhuas koj
ib tiam dhau ib tiam mus li.