16

Yeluxalees fav xeeb

¹Yawmsaub hais lus tuaj dua rau kuv tias, ²“Neeg tus tub, cia li qhia Yeluxalees paub txog nws tej kev qias vuab tsuab, ³thiab hais tias, ‘Vajtswv Yawmsaub hais li no rau Yeluxalees tias, Koj lub keeb thaum ub thiab lub chaw uas yug koj yog Khana‑as tebchaws. Koj txiv yog ib tug Amaulai, koj niam yog ib tug Hithai. ⁴Mas hais txog qhov uas yug koj, hnub uas yug koj los ntawd luag tsis txiav koj txoj hlab ntaws, thiab tsis muab koj ntxuav kom huv, thiab tsis muab ntsev txhuam koj, thiab tsis muab khaubncaws qhwv koj. ⁵Tsis muaj ib lub qhov muag khuvleej koj es yuav ua tej uas hais no vim yog tab ncuab koj. Tiamsis koj raug muab pov tseg rau tom teb, vim koj raug ntxub kawg li rau hnub uas yug koj.
⁶“ ‘Mas thaum kuv dua kev tuaj mus kuv pom koj nti cuj ca hauv koj pas ntshav, kuv thiaj hais rau koj hauv koj cov ntshav tias, “Cia li ciaj sia nyob,” ⁷thiab kuv ua rau koj kheev hlob zoo li tej qoob loo hauv nruab teb. Koj kuj kheev hlob thiab siab, tiav nkauj hlo, koj ob lub mis kuj puv tuaj thiab koj kuj tuaj plaub, tiamsis koj liab qab tsuas.
⁸“ ‘Thaum kuv rov dua kev tuaj mus ib zaug kuv tsa muag ntsia koj, mas koj twb muaj hnub nyoog paub sib nyiam lawm, kuv thiaj nthuav kuv lub tsho ntev los roos koj thiab npog koj lub cev uas liab qab. Kuv thiaj cog lus khov kho thiab nrog koj cog lus tseg mas koj thiaj ua kuv tug lawm. Yawmsaub hais li no ntag.
⁹“ ‘Kuv muab koj da dej thiab ntxuav tej ntshav uas lo koj thiab muab roj tsw qab pleev koj. ¹⁰Kuv muab tsoos tsho paj rau koj hnav thiab muab zoo khau tawv rau koj rau, thiab muab tej ntaub mag uas zoo zoo qhwv koj thiab muab ntaub xov kab kauv koj. ¹¹Kuv muab npauj nyiag ntsais nyiaj teem rau koj lub tsho, thiab muab tooj npab rau koj coj ntawm txhais tes thiab muab saw nyiaj los looj koj caj dab. ¹²Kuv muab lub nplhaib rau koj coj ntawm qhov ntswg thiab muab kauj co rau koj coj ntawm qhov ntsej thiab muab lub mom kub zoo nkauj rau koj ntoo saum taubhau. ¹³Kuv muab nyiaj muab kub los phim koj li no thiab koj tej tsoos tsho yog muab ntaub mag zoo zoo thiab ntaub xov kab thiab ntaub ua paj los ua. Koj noj tej hmoov mog zoo zoo thiab zib ntab thiab roj aulib. Koj kheev hlob, zoo nkauj tshaj plaws thiab koj ua tau vajntxwv. ¹⁴Koj lub koob meej zoo nkauj nto moo lug rau hauv ib tsoom tebchaws, vim qhov uas koj zoo nkauj kawg nkaus ntawd twb yog kuv pub meej mom rau koj. Vajtswv Yawmsaub hais li no ntag.
¹⁵“ ‘Tiamsis koj tso siab rau qhov uas koj zoo nkauj thiab muab koj lub koob meej mus ntxias nrog luag sib deev, thiab tsis hais leejtwg tuaj los koj kuj nrog luag sib deev coob kawg li.⚓ ¹⁶Koj muab koj tej tsoos tsho ib txhia los ua lub chaw teev dab kom zoo nkauj, thiab deev dab lub chaw ntawd, tsis txeev muaj dua li no thiab yuav tsis muaj li no ntxiv mus.⚓ ¹⁷Koj muab koj tej npauj nyiag npauj kub zoo nkauj uas kuv muab pub rau koj, los ua tej dab mlom txivneej rau koj, thiab koj nrog lawv sib deev. ¹⁸Thiab koj muab koj tej tsoos tsho paj mus kauv tej dab mlom ntawd, thiab muab kuv tej roj tej tshuaj tsw qab xyeem rau ntawm lawv xubntiag. ¹⁹Tej zaub mov noj uas kuv pub rau koj, koj ua ib yam li ntawd. Kuv muab hmoov mog zoo zoo thiab roj aulib thiab zib ntab rau koj noj, tiamsis koj kuj coj mus xyeem rau ntawm lawv xubntiag ua tej pa ncho txaus lawv siab. Vajtswv Yawmsaub hais li no ntag.
²⁰“ ‘Thiab koj muab koj tej tub tej ntxhais uas koj yug rau kuv coj mus xyeem pub rau lawv ua ploj tag. Koj tej kev sib deev yog ib qho me me xwb lov? ²¹Koj thiaj muab kuv tej menyuam tua coj mus hlawv xyeem rau tej dab mlom ntawd. ²²Tag nrho koj tej kev qias vuab tsuab huvsi thiab koj tej kev sib deev koj txawm tsis nco txog hnub uas koj tseem liab ntsha tsuas liab qab tsuas nti cuj ca hauv koj pas ntshav.
²³“ ‘Vajtswv Yawmsaub hais tias, Koj yuav raug txom nyem, yuav raug txom nyem lauj! Tom qab uas koj ua tej kev phem kev qias huvsi, ²⁴koj tseem mus ua lub ruv tsev uas koov qas loo rau koj, thiab txhua lub tshav puam hauv lub nroog koj ua lub chaw siab teev dab rau koj. ²⁵Txhua lub ncauj kev koj kuj ua lub chaw siab teev dab rau koj thiab muab koj txojkev zoo nkauj ua qias vuab tsuab, nrhab ceg hlo rau txhua tus uas dua kev tuaj mus tsis hais leejtwg kuj xij, koj thiaj deev tau ntau zuj zus. ²⁶Koj kuj nrog cov Iyi sib deev, yog cov uas nyob ze koj thiab nyiam sib deev heev. Koj tsav kev sib deev ntau zuj zus zes kom kuv chim. ²⁷Vim li no kuv thiaj tsa kiag kuv txhais tes tawm tsam koj, thiab txiav koj lub tebchaws kom nqaim zuj zus, thiab muab koj cob rau koj cov yeeb ncuab cia lawv ua raws li lawv lub siab nyiam, yog cob rau cov Filixatee tej ntxhais uas txaj muag rau koj txojkev ua dev ua npua qias tsis huv. ²⁸Koj tseem nrog cov Axilia sib deev, vim tsis tau txaus koj lub siab li. Koj yeej nrog lawv cov sib deev, tiamsis koj tseem tsis txaus siab. ²⁹Koj tseem yimhuab nrog Kheedia lub tebchaws uas ua lag ua luam sib deev heev zuj zus. Txawm yog nrog lub tebchaws ntawd sib deev los koj tseem tsis txaus siab li.
³⁰“ ‘Vajtswv Yawmsaub hais li no tias, Koj qaug siab ua tej no huvsi yam nkaus li tus poj muag cev ua, tsis paub txaj muag li. ³¹Txhua lub ncauj kev koj ua tej lub ruv tsev koov qas loo rau koj, thiab txhua lub tshav puam koj ua lub chaw siab teev dab rau koj. Txawm ua li ntawd los koj tseem tsis thooj li poj muag cev rau qhov koj twb tsis yuav nqe ntiav kiag li. ³²Koj yog tus pojniam uas deev hluas nraug, uas txais luag lwm tus nyob nws tus txiv chaw. ³³Tej txivneej yeej muab nqe rau txhua tus poj muag cev, tiamsis koj mas tseem muab nqe ntiav rau txhua tus uas nyiam koj, thiab muab qhov txhia chaw dib kom luag tuaj txhua fab tuaj deev koj. ³⁴Yog li no koj txawv tsis thooj li lwm tus poj muag cev rau thaum koj mus deev luag. Tsis muaj leejtwg tuaj thov nrog koj pw, los koj tseem mus ntiav, twb tsis muaj leejtwg muab nqe ntiav koj. Vim li no koj thiaj txawv luag lwm tus.
³⁵“ ‘Vim li no, tus poj muag cev 'e, cia li mloog Yawmsaub tej lus. ³⁶Vajtswv Yawmsaub hais li no tias, Vim koj qhov kev txaj muag thiab koj txojkev liab qab twb tshwm los rau thaum koj thiab cov uas nrog koj sib nyiam sib deev, thiab vim koj tej dab mlom uas qias vuab tsuab huvsi thiab koj cov menyuam tej ntshav uas muab xyeem rau lawv, ³⁷vim li no, kuv yuav sau zog cov uas nrog koj sib nyiam huvsi, uas koj nrog pw zoo siab, yog txhua tus uas koj nyiam thiab txhua tus uas koj ntxub. Kuv yuav sau zog lawv tuaj txhua fab tuaj tawm tsam koj, thiab kuv yuav thws koj txojkev liab qab tab meeg lawv xwv lawv thiaj pom koj liab qab huvsi. ³⁸Kuv yuav txiav txim rau koj ib yam li txiav txim rau tus pojniam deev hluas nraug thiab txiav txim rau cov uas tua neeg, thiab kuv yuav coj cov ntshav ntawm kuv txojkev npau taws thiab txojkev khib xeeb los raug koj. ³⁹Thiab kuv yuav muab koj cob rau hauv cov uas nrog koj sib nyiam txhais tes, mas lawv yuav rhuav koj lub ruv tsev uas koov qas loo, thiab muab koj tej chaw siab teev dab rhuav kom pob tag. Lawv yuav hle koj tej tsoos tsho thiab coj koj tej npauj nyiag npauj kub mus, thiab tso koj nyob liab qab tsuas. ⁴⁰Lawv yuav coj ib pab neeg coob coob tuaj tawm tsam koj, mas lawv yuav xuas pob zeb ntaus koj thiab xuas ntaj tsuav koj. ⁴¹Lawv yuav hlawv koj tej vaj tse thiab txiav txim rau koj tab meeg tej pojniam coob coob. Kuv yuav ua rau koj tseg kiag tsis ua poj muag cev, thiab koj yuav tsis ntiav luag deev koj dua li lawm.
⁴²“ ‘Kuv ua li no kuv txojkev npau taws rau koj thiaj li nqeg tag, thiab kuv yuav tsis khib xeeb rau koj lawm. Kuv yuav nyob tus thiab yuav tsis chim dua li lawm. ⁴³Vim koj tsis nco txog hnub uas koj tseem liab ntsha tsuas tiamsis koj ua tej no huvsi ua rau kuv chim kawg, vim li no, kuv yuav ua pauj rau koj raws li koj tau ua lawm rau saum koj taubhau. Koj tsis tau ua dev ua npua ntxiv rau koj tej kev qias vuab tsuab huvsi lov? Vajtswv Yawmsaub hais li no ntag.
⁴⁴“ ‘Saib maj, txhua tus uas hais paj lug yuav hais paj lug li no txog koj, “Niam zoo li cas, ntxhais kuj zoo li ntawd.” ⁴⁵Koj yog koj niam li ntxhais yog tus uas ntxub nws tus txiv thiab nws cov menyuam. Koj yog tus ntxhais uas yoog koj niam laus niam hluas uas ntxub tus txiv thiab tej menyuam. Koj niam yog ib tug Hithai koj txiv yog ib tug Amaulai. ⁴⁶Koj tus niam laus yog Xamali uas nrog nws tej ntxhais nyob ntawm koj sab ped. Koj tus niam hluas yog Xaudoo uas nrog nws tej ntxhais nyob ntawm koj sab nrad. ⁴⁷Txawm li ntawd koj tseem tsis ua lub neej yam li lawv thiab ua raws li lawv tej kev qias vuab tsuab xwb, ib pliag xwb txhua yam uas koj ua kuj phem heev dua li lawv ua thiab. ⁴⁸Vajtswv Yawmsaub hais tias, Kuv yeej muaj txojsia nyob, koj tus niam hluas Xaudoo thiab nws tej ntxhais twb tsis tau ua phem npaum li koj thiab koj tej ntxhais ua. ⁴⁹No nawj yog koj tus niam hluas Xaudoo lub txim, yog qhov uas nws thiab nws tej ntxhais khav theeb, muaj noj muaj haus nplua mias, tau zoo heev dhau, tsis pab tej neeg pluag thiab tej neeg txom nyem. ⁵⁰Lawv tsab ua loj thiab ua tej kev qias vuab tsuab rau ntawm kuv xubntiag. Vim li no, thaum kuv pom, kuv muab lawv rhuav tshem pov tseg. ⁵¹Xamali tsis tau ua txhaum npaum li koj ib nrab. Koj ua qias vuab tsuab loj dua ob tug, tej kev qias vuab tsuab huvsi uas koj ua ntawd thiaj ua rau pom zoo li koj tus niam laus thiab koj tus niam hluas ncaj ncees. ⁵²Koj yuav tsum ris koj txojkev poob ntsej muag, vim koj ua rau qhov txiav txim qaij rau koj tus niam laus thiab koj tus niam hluas. Vim koj tej kev txhaum uas ua qias vuab tsuab loj dua li ob tug, ob tug thiaj ncaj dua koj. Koj cia li txaj muag thiab ris koj txojkev poob ntsej muag, rau qhov koj ua rau pom yam li koj tus niam laus thiab koj tus niam hluas ncaj ncees.
⁵³“ ‘Kuv yuav ua rau Xaudoo thiab nws tej ntxhais rov vam meej li qub, thiab ua rau Xamali thiab nws tej ntxhais rov vam meej li qub. Thiab kuv yuav ua rau koj nrog lawv rov vam meej li qub, ⁵⁴koj thiaj yuav ris koj txojkev poob ntsej muag thiab koj yuav txaj muag rau txhua yam uas koj tau ua lawm thiaj ua qhov uas nplij ob tug lub siab. ⁵⁵Hais txog koj tus niam laus thiab koj tus niam hluas, mas Xaudoo thiab nws tej ntxhais yuav rov ua lub neej zoo li qub, thiab Xamali thiab nws tej ntxhais yuav rov ua lub neej zoo li qub. Thiab koj thiab koj tej ntxhais yuav rov ua lub neej li qub. ⁵⁶Thaum koj tseem khav theeb tsis yog koj tus niam hluas Xaudoo tiag koj ncauj koj lo lov, ⁵⁷yog ua ntej uas tsis tau muab koj tej kev phem thws los? Nimno koj zoo ib yam li nws lawm, koj ua lub chaw uas Edoo⚓ tej ntxhais thiab tej uas nyob ib ncig Edoo thiab cov Filixatee tej ntxhais thuam luag, yog cov uas nyob ib ncig koj saib tsis taus koj. ⁵⁸Koj yuav ris lub txim uas koj ua dev ua npua thiab ua qias vuab tsuab. Yawmsaub hais li no ntag.
⁵⁹“ ‘No nawj, Vajtswv Yawmsaub hais li no tias, Kuv yuav ua rau koj yam li koj tau ua los lawm, vim koj saib tsis taus tej lus twv tseg thiab rhuav kuv tej lus cog tseg. ⁶⁰Txawm li ntawd los kuv tseem yuav nco ntsoov kuv tej lus cog tseg uas thaum koj tseem hluas nkauj kuv cog rau koj. Thiab kuv yuav tuav rawv cov lus cog tseg rau koj kom nyob ruaj mus ib txhis. ⁶¹Thaum ntawd koj yuav nco txog tej uas koj tau ua los lawm thiab koj yuav raug txaj muag rau thaum koj txais koj tus niam laus thiab koj tus niam hluas, thiab kuv muab ob tug pub ua koj li ntxhais, tiamsis qhov uas kuv ua no tsis nyob hauv kuv tej lus uas cog tseg rau koj. ⁶²Kuv yuav tuav rawv tej lus uas kuv cog tseg rau koj, mas koj yuav paub tias kuv yog Yawmsaub, ⁶³kom koj thiaj cim tau thiab xav tsis thoob thiab txaj muag tsis rua ncauj hais lus dua li, rau thaum kuv zam tej kev txhaum txim txhua yam uas koj tau ua los lawm. Vajtswv Yawmsaub hais li no ntag.’ ”

16

Yeluxalees Tsis Muab Siab Npuab Vajtswv

¹Tus TSWV hais rau kuv ntxiv hais tias, ²“Tub noobneej, koj cia li qhia tej kev phem kev qias uas Yeluxalees tau ua lawm. ³Koj qhia tus TSWV uas kav ib puas tsav yam tej lus rau Yeluxalees hais tias,
“Koj yug hauv lub tebchaws Kana-as. Koj txiv yog neeg Amaules thiab koj niam yog neeg Hitis. ⁴Thaum yug tau koj los tsis muaj leejtwg txiav koj txoj hlab ntaws lossis ntxuav koj, tsis muab ntsev txhuam lossis muab khaubncaws qhwv koj. ⁵Thaum yug tau koj los tsis muaj leejtwg hlub koj thiab mob siab ua tej uas hais tas los ntawd rau koj. Luag thiaj muab koj pov rau tom tiaj nrag.
⁶“Kuv dua kev tuaj pom koj tsau ntshav tsawv. Koj ibce lo ntshav tas, tiamsis kuv tsis cia koj tuag. ⁷Kuv ua rau koj hlob mos nyoos ib yam li tus ntsuag ntoo. Koj thiaj hlob tiav nkauj. Koj ob lub mis puv zoo thiab koj cov plaubhau ntev npws loo, tiamsis koj tseem liabqab.
⁸“Thaum kuv rov dua kev tuaj, kuv pom hais tias txog lub sijhawm uas koj nyiam hluas nraug lawm. Kuv thiaj muab kuv lub tsho loj qhwv koj lub cev uas liabqab. Kuv coglus yuav hlub koj thiab yuav koj ua kuv tus pojniam kom koj yog kuv tug.” Tus TSWV uas kav ib puas tsav yam hais li ntawd.
⁹“Kuv muab dej los ntxhuav tej ntshav ntawm koj lub cev, thiab muab roj tsw qab pleev koj. ¹⁰Kuv muab ib daim tiab uas taw suab yi rau koj hnav thiab muab ib nkawm khau tawv uas zoo heev rau koj rau; kuv muab phuam ntaubmag rau koj ntoo thiab muab tsho ntaub tshwbkab rau koj hnav. ¹¹Kuv muab kauj toog npab thiab xauv rau koj coj. ¹²Kuv muab khawb khawm koj qhovntswg, muab qhwsntsej rau koj coj, thiab muab kausmom kub rau koj ntoo. ¹³Koj coj saw nyiaj saw kub thiab hnav tej ntaubmag thiab ntaub tshwbkab uas zoo heev. Koj tau noj tej ncuav uas yog muab cov tseem hmoov nplej puab, thiab koj muaj zib ntab thiab roj txiv ntoo noj. Koj cev zam zoo nkauj ci ntsa iab, koj thiaj tau los ua ib tug poj vajntxwv. ¹⁴Koj txojkev zoo nkauj ua rau koj muaj koob meej nto moo lug rau txhua haivneeg, rau qhov kuv muab koj tseev zam txaus nyiam thiab ntxim luag siab heev.” Tus TSWV uas kav ib puas tsav yam hais li ntawd.
¹⁵“Tiamsis koj cia li siv koj txojkev zoo nkauj thiab nto moo mus nrog txhua tus uas tuaj cuag koj ua kev nkauj kev nraug. ¹⁶Koj muab tej khaubncaws ibtxhia coj mus dai rau hauv koj tej chaw pe mlom thiab chaw ua niamntiav; ibtxwm yeej tsis muaj li no, thiab yuav tsis muaj ntxiv li lawm. ¹⁷Koj muab tej saw nyiaj saw kub uas kuv muab rau koj coj mus nchuav ua tej tus mlom txivneej thiab koj ua kev nkauj kev nraug nrog tej mlom ntawd. ¹⁸Koj muab kuv tej tiab taw suab yi uas kuv muab rau koj coj mus rau tej mlom hnav; koj muab roj txiv ntoo thiab tej hmoov tshuaj tsw qab uas kuv muab rau koj coj mus fij rau tej mlom. ¹⁹Kuv pub koj muaj tej zaub mov uas yog tej tseem hmoov nplej, tej roj txiv ntoo thiab zib ntab noj, tiamsis koj muab coj mus ua khoom fij rau tej mlom lawm.” Tus TSWV uas kav ib puas tsav yam hais li ntawd.
²⁰“Koj muab tej tub tej ntxhais uas koj yug rau kuv coj mus tua fij rau tej mlom. Koj mus ua kev nkauj kev nraug los tseem tsis txaus koj siab, ²¹koj thiaj coj kuv cov menyuam ntawd mus tua fij rau tej mlom no los? ²²Thaum koj mus ua kev phem kev qias uas yog ua niamntiav, koj yeej tsis nco qab txog thaum koj tseem yau uas liabqab tsuas thiab pw tsau ntshav tsawv ntawd lawm.”

Yeluxalees ua Li Tus Niamntiav

²³Tus TSWV uas kav ib puas tsav yam hais tias, “Koj raug kev puastsuaj lawm! Raug puastsuaj lawm! Koj ua txhua yam kev phem kev qias thiab koj tseem ²⁴mus ua tej chaw pe mlom rau ntawm tej ntug kev ua chaw ua niamntiav. ²⁵Koj coj koj txojkev zoo nkauj mus da pas av. Koj muab koj lub cev rau txhua tus uas tuaj cuag koj, thiab koj niaj hnub ua niamntiav. ²⁶Koj cia cov neeg Iziv uas yog phoojywg nruab ze tuaj nrog koj pw hauv koj txaj, thiab koj pheej ua niamntiav ua rau kuv chim heev.
²⁷“Kuv thiaj tsa tes rau txim rau koj thiab tshem tej koob hmoov uas yog koj feem ntawm koj mus. Kuv muab koj cob rau koj cov yeebncuab uas yog neeg Filitees kom lawv ua rau koj raws li lawv siab nyiam; koj tej kev phem kev qias ua rau cov ntxhais Filitees poob ntsejmuag.
²⁸“Vim koj tsis txaus siab rau tej kev phem kev qias uas koj ua nrog lwm cov neeg, koj thiaj raws cov Axilias qab. Koj yog lawv tus niamntiav, txawm li ntawd los tseem tsis txaus koj siab qees. ²⁹Tsis tas li ntawd xwb koj tseem ua niamntiav rau cov Npanpiloos uas yog lub tebchaws uas muaj tej tub lag tub luam, tiamsis lawv cov ntawd los kuj tsis txaus koj siab li thiab.”
³⁰Tus TSWV uas kav ib puas tsav yam hais tias, “Koj tau ua ib puas tsav yam ib yam li tus niamntiav uas tsis paub txajmuag li. ³¹Koj ua chaw pe mlom rau txhua txojkev thiab ua niamntiav rau hauv tej chaw ntawd. Tiamsis tsis yog koj ua niamntiav yuav nyiaj ib yam li tej niamntiav ibtxwm ua. ³²Koj yog tus pojniam uas muaj txiv, tiamsis tsis hlub tus txiv thiaj mus ua kev kauj kev nraug. ³³Tus niamntiav tiag mas luag them nyiaj rau nws, tiamsis koj tseem muab khoom pub thiab muab nyiaj ntiav hluas nraug tuaj txhua qhov tuaj nrog koj pw. ³⁴Koj yog ib tug niamntiav uas txawv dua luag tej. Tsis muaj leejtwg yuam kom koj ua niamntiav. Luag tsis them nyiaj rau koj; koj them nyiaj rau luag! Koj yeej txawv dua lwm tus niamntiav tiag.”

Vajtswv Txiav Txim rau Yeluxalees

³⁵Yeluxalees uas yog tus niamntiav! Koj cia li mloog tus TSWV uas kav ib puas tsav yam tej lus.
³⁶Tus TSWV uas kav ib puas tsav yam hais li no: “Koj hle koj tej ris tsho ib yam li tus niamntiav koj muab koj lub cev rau koj tej hluas nraug thiab rau koj tej mlom uas phem qias, thiab tua koj tej menyuam fij rau tej mlom ntawd. ³⁷Vim li no kuv yuav coj tagnrho koj tej qub hluas nraug tuaj ua ke, tsis hais cov uas koj nyiam thiab cov uas koj ntxub huv tibsi. Kuv yuav coj lawv tuaj sawv puagncig koj, ces kuv yuav muab koj tej ris tsho hle kom lawv pom koj liabqab. ³⁸Kuv yuav rau txim rau koj, vim koj ua kev nkauj kev nraug thiab tua neeg. Kuv chim thiab npautaws kuv thiaj rau txim kom koj tuag. ³⁹Kuv yuav muab koj cob rau lawv tes, lawv yuav rhuav koj tej chaw ua niamntiav thiab pe mlom. Lawv yuav chua pesntia koj tej ris tsho thiab tej saw nyiaj saw kub cia kom koj nyob liabqab.
⁴⁰“Lawv yuav sau nthwv tuaj muab pobzeb ntaus koj thiab muab ntaj txiav kom koj tu ua ob peb ya. ⁴¹Lawv yuav muab koj tej vajtse hlawv kom kub hnyiab tas thiab kuv yuav rau txim rau koj tabmeeg ibtsoom pojniam. Kuv yuav txwv kom koj tseg tsis txhob ua niamntiav thiab tseg tsis txhob muab khoom pub koj tej hluas nraug. ⁴²Ces kuv txojkev chim thiaj yuav txias thiab kuv lub siab thiaj yuav tus. Kuv yuav tsis chim thiab tsis khib ntxiv lawm. ⁴³Koj tsis nco txog thaum koj tseem yau uas kuv tu koj, koj thiaj li mus ua ib puas tsav yam rau kuv chim. Yog li ntawd, kuv thiaj ua pauj tej uas koj tau ua los lawm. Vim li cas koj ua kev nkauj kev nraug tsub rau tej kev pe mlom uas phem qias?” Tus TSWV uas kav ib puas tsav yam hais li ntawd.

Niam Zoo Li Cas Ntxhais Zoo Li Ntawd

⁴⁴Tus TSWV hais tias, “Neeg yuav siv zaj pajlug no hais ntsig txog koj uas yog lub nroog Yeluxalees hais tias, ‘Leej niam zoo li cas, ces tus ntxhais zoo ib yam li ntawd.’ ⁴⁵Koj yog koj niam tus ntxhais tiag. Koj niam ntxub nws tus txiv thiab nws tej menyuam. Koj zoo ib yam li koj cov vivncaus uas ntxub lawv cov txiv thiab cov menyuam. Koj thiab koj cov vivncaus leej niam yog neeg Hitis thiab nej txiv yog neeg Amaules.
⁴⁶“Koj tus niamlaus yog lub nroog Xamalis uas nyob nrog nws tej zos sab qaumteb. Koj tus niamhluas yog lub nroog Xaudoos uas nyob nrog nws tej zos sab qabteb. ⁴⁷Tsis yog koj ua li lawv ua xwb, tej kev phem kev qias uas lawv ua ntawd tseem tsis txaus koj siab. Tsis ntev koj yuav mus ua phem ua qias tshaj tej uas lawv ua thiab.”
⁴⁸Tus TSWV uas kav ib puas tsav yam hais tias, “Kuv yog Vajtswv tus uas muaj sia nyob hais li no: Koj tus niamhluas uas yog lub nroog Xaudoos thiab nws tej zos twb tsis tau ua kev phem kev qias npaum li koj thiab koj tej zos ua. ⁴⁹Ntawm no yog Xaudoos txojkev txhaum: Nws thiab nws cov ntxhais khavtheeb, rau qhov lawv muaj noj muaj haus nplua mias thiab nyob kaj siab lug, tiamsis lawv tsis hlub cov neeg txomnyem thiab cov neeg pluag. ⁵⁰Lawv khavtheeb thiab tawvncauj kawg li. Thaum kuv pom lawv ua tej uas kuv ntxub, kuv thiaj rhuav kom lawv raug kev puastsuaj.
⁵¹“Xamalis tej kev txhaum twb tsis npaum li koj tej kev txhaum ib nrab. Koj tau ua kev phem kev qias ntau dua nws. Yog muab nws piv rau koj, mas koj tus niamlaus zoo li tus uas tsis muaj ib qho txhaum li. ⁵²Nimno koj yuav tsum ris txojkev txajmuag. Koj tej kev txhaum ntau dua koj cov vivncaus; yog muab lawv piv rau koj, ces zoo li lawv nyob ib cag tsis tau ua txhaum li. Koj cia li tiv kev txob thuam thiab ris kev txajmuag, rau qhov koj ua rau koj cov vivncaus zoo li lawv tsis muaj txhaum.”

Yuav Txhim Kho Xaudoos thiab Xamalis Dua Tshiab

⁵³Tus TSWV hais rau Yeluxalees hais tias, “Kuv yuav rov txhim kho lub nroog Xaudoos thiab nws tej zos lub nroog Xamalis thiab nws tej zos kom rov vammeej dua. Kuv yuav rov txhim kho kom koj vammeej ib yam nkaus. ⁵⁴Koj yuav rov txajmuag rau tej kev phem kev qias uas koj tau ua lawm, thiab koj txojkev txhaum yuav ua rau koj cov vivncaus pom hais tias lawv zoo dua koj. ⁵⁵Xamalis thiab Xaudoos yuav rov zoo li qub, koj thiab koj tej zos los yuav rov zoo li qub thiab. ⁵⁶Thaum koj khavtheeb, koj muab koj tus niamhluas uas yog Xaudoos hais tsis zoo ⁵⁷ua ntej uas koj tej kev phem kev qias raug nthuav tawm. Nimno koj zoo li nws; cov Edoos, cov Filitees thiab cov neeg uas nyob puagncig koj uas ntxub koj los hais koj plig tsis zoo. ⁵⁸Koj yuav raug txim vim tej kev phem kev qias uas koj tau ua tas los.” Tus TSWV hais li ntawd.

Lus Cog Tseg uas Kav Ibtxhis

⁵⁹Tus TSWV uas kav ib puas tsav yam hais tias, “Kuv yuav ua rau koj raws li koj tau ua lawm, rau qhov koj tsis ua li koj coglus, koj rhuav koj tej lus cog tseg. ⁶⁰Txawm li ntawd los kuv yuav nco ntsoov kuv tej lus cog tseg rau koj thaum koj tseem yau, thiab kuv yuav coglus rau koj mus ibtxhis. ⁶¹Koj yuav rov nco txog tej kev phem uas koj tau ua tas los lawm; koj yuav txajmuag thaum koj coj koj tus niamhluas thiab niamlaus rov los. Kuv yuav cia nkawd zoo ib yam li yog koj ntxhais, tiamsis kuv tsis coglus rau nkawd li uas kuv coglus rau koj. ⁶²Kuv yuav nrog koj coglus dua tshiab, koj thiaj yuav paub hais tias kuv yog tus TSWV. ⁶³Kuv yuav zam tej kev txhaum uas koj tau ua tas los, tiamsis koj yuav nco ntsoov tej ntawd thiab txajmuag heev tsis xav hais lus li.” Tus TSWV uas kav ib puas tsav yam tau hais li ntawd.