34

Yelemi ntuas Xedekhiya

¹No yog tej lus uas Yawmsaub hais tuaj rau Yelemi rau thaum vajntxwv Nenpukhanexa hauv Npanpiloo thiab nws cov tub rog huvsi thiab txhua lub tebchaws hauv ntiajteb thiab txhua haiv neeg uas nws kav tabtom ua rog rau Yeluxalees thiab tej moos ib ncig. ²“Yawmsaub uas yog Yixayee tus Vajtswv hais li no tias, Koj cia li mus hais rau Yuda tus vajntxwv Xedekhiya hais tias, ‘Yawmsaub hais li no tias, Saib maj, kuv yuav muab lub nroog no rau hauv vajntxwv Npanpiloo txhais tes, mas nws yuav muab hlawv pov tseg. ³Koj yuav tsis dim hauv nws txhais tes li, koj yeej yuav raug ntes tiag tiag li thiab raug muab cob rau hauv nws txhais tes thiab koj yuav pom vajntxwv Npanpiloo tim ntsej tim muag thiab sib txuas lus ntawm ncauj. Thiab koj yuav tau mus rau Npanpiloo. ⁴Au vajntxwv Xedekhiya uas kav Yuda, txawm li cas kuj xij cia li mloog Yawmsaub tej lus. Yawmsaub hais txog koj li no tias, Koj yuav tsis tuag hniav ntaj. ⁵Koj yuav tuag siab tus yees. Luag hlawv tshuaj tsw qab pam koj tej poj koob yawm txwv uas yog tej vajntxwv nyob ua koj ntej li cas, luag kuj yuav hlawv tshuaj tsw qab pam koj thiab quaj ntsuag koj hais tias “Au peb tus vajntxwv” ib yam li ntawd, rau qhov kuv twb hais cia li no lawm. Yawmsaub hais li no ntag.’ ”
⁶Mas Yelemi uas cev Vajtswv lus hais tej lus no huvsi rau vajntxwv Xedekhiya uas kav Yuda hauv lub nroog Yeluxalees, ⁷rau thaum vajntxwv Npanpiloo cov tub rog tabtom ua rog rau Yeluxalees thiab Yuda txhua lub moos uas tseem tshuav, yog lub moos Lakhi thiab lub moos Axekha, vim yog tej moos uas muaj ntsa loog hauv Yuda tsuas tshuav ob lub moos no xwb.

Tso cov tub qhe dim

⁸Yawmsaub hais lus tuaj rau Yelemi tom qab uas vajntxwv Xedekhiya tau cog lus rau cov neeg hauv Yeluxalees sawvdaws tias yuav tshaj tawm kevcai tso cov qhev nyob ywj pheej. ⁹Txhua tus nyias yuav tsum tso nyias tej qhev uas yog neeg Henplais tsis hais pojniam txivneej kom nyob ywj pheej, kom thiaj tsis muaj leejtwg muab nws cov kwvtij Yudai ua qhev. ¹⁰Mas cov thawj coj sawvdaws thiab cov pejxeem sawvdaws tau cog lus tseg tias nyias yuav tso nyias tej tub qhe nkauj qhev dim kom lawv thiaj tsis raug rov muab ua qhev dua. Lawv mloog lus thiab tso tej qhev dim nyob ywj pheej lawm. ¹¹Tiamsis tom qab lawv rov qab fav dua thiab ntes tej tub qhe nkauj qhev uas lawv muab tso nyob ywj pheej lawm rov los quab yuam ua qhev dua. ¹²Mas Yawmsaub hais lus tuaj rau Yelemi tias, ¹³“Yawmsaub uas yog Yixayee tus Vajtswv hais li no tias, Kuv twb cog lus rau nej tej poj koob yawm txwv rau thaum uas kuv coj lawv tawm hauv Iyi tebchaws, thiab tawm hauv lub tsev ua qhev, hais tias, ¹⁴‘Thaum puv rau xyoo lawm nej txhua tus yuav tsum tso tej kwvtij Henplais uas luag muag rau nej thiab tau ua haujlwm rau nej tau rau xyoo lawm. Nej yuav tsum tso lawv nyob ywj pheej tsis txhob ua haujlwm rau nej lawm.’⚓ Tiamsis nej tej poj koob yawm txwv tsis mloog thiab tsis tig ntsej mloog kuv hais. ¹⁵Tsis ntev los no nej tau ntxeev dua siab ua yam uas kuv pom zoo es tshaj tawm kev ywj pheej nyias tshaj tawm rau nyias kwvtij uas ua qhev, thiab nej tau cog lus tab meeg kuv ntawm lub tuam tsev uas hu raws li kuv lub npe. ¹⁶Tiamsis dhau ntawd lawm nej rov fav dua thiab ua puas tsuas kuv lub npe rau thaum uas nej txhua tus ntes nej tej tub qhe nkauj qhev uas nej twb muab tso nyob ywj pheej lawm raws li lawv lub siab xav, rov los yuam ua nej li qhev dua.
¹⁷“Vim li no, Yawmsaub thiaj li hais tias, Nej tsis mloog kuv lus yog qhov uas nyias tshaj tawm rau nyias tej kwvtij zej zog txog qhov uas nyob ywj pheej. Yawmsaub hais tias, Saib maj, kuv tshaj tawm kom hniav ntaj hniav riam thiab kev tshaib nqhis thiab mob kis muaj kev ywj pheej tua nej. Kuv yuav ua rau nej ua chaw rau ib tsoom tebchaws sawvdaws hauv ntiajteb ceeb thiab ntshai. ¹⁸Thiab cov neeg uas ua txhaum kuv tej lus cog tseg thiab tsis ua raws li tej nqe lus hais hum uas lawv cog lus tseg tab meeg kuv ntawd, mas kuv yuav ua rau lawv zoo yam nkaus li tus menyuam nyuj uas lawv muab phua rhe ua ob sab es lawv mus hauv nruab nrab dhau plaws lawm. ¹⁹Tag nrho Yuda cov thawj thiab Yeluxalees cov thawj thiab cov nraug sam, thiab cov pov thawj thiab cov pejxeem sawvdaws hauv lub tebchaws uas tau hla dhau ob sab tus menyuam nyuj ntawd, ²⁰mas kuv yuav muab lawv cob rau hauv lawv cov yeeb ncuab txhais tes thiab rau hauv cov uas nrhiav txov lawv txojsia txhais tes. Lawv tej cev tuag mas tej liaj dav saum nruab ntug thiab tej tsiaj qus hauv ntiajteb yuav noj. ²¹Kuv yuav muab vajntxwv Xedekhiya uas kav Yuda thiab nws cov thawj cob rau hauv lawv cov yeeb ncuab thiab rau hauv cov uas nrhiav txov lawv txojsia txhais tes, thiab muab rau hauv vajntxwv Npanpiloo cov tub rog txhais tes yog cov uas twb thim ntawm nej mus lawm. ²²Yawmsaub hais tias, Saib maj, kuv yuav hais rau lawv thiab coj lawv rov qab tuaj rau ntawm lub nroog no, mas lawv yuav ua rog rau lub nroog no thiab txeeb tau thiab muab hlawv pov tseg. Kuv yuav ua rau Yuda tej moos nyob do cuas cia tsis muaj neeg nyob li.”

34

Yelemis Cev Vajtswv Lus rau Xedekiyas

¹Tus TSWV hais rau kuv thaum lwm haivneeg tej tubrog tuaj pab Vajntxwv Nenpukajnexales uas kav tebchaws Npanpiloos thiab nws cov tubrog thiab cov neeg uas zwm rau nws tuaj ntaus lub nroog Yeluxalees thiab tej nroog uas nyob ze ibncig ntawd. ²Tus TSWV uas yog cov Yixalayees tus Vajtswv, kom kuv mus hais rau Vajntxwv Xedekiyas uas kav tebchaws Yudas hais tias, “Kuv uas yog tus TSWV, yuav muab lub nroog no cob rau tus vajntxwv uas kav tebchaws Npanpiloos, nws yuav muab hlawv kom kub hnyiab tas. ³Koj yuav khiav tsis dim li; koj yuav raug luag ntes coj mus cob rau Nenpukajnexales. Koj yuav tau mus ntsib nws thiab nrog nws tham tim ntsej tim muag, ces nws yuav coj koj mus rau tim tebchaws Npanpiloos. ⁴Xedekiyas, koj cia li mloog tej lus uas kuv hais txog koj, koj yuav tsis raug tua tuag rau hauv tshavrog. ⁵Koj yuav tuag kaj siab lug, luag yuav hlawv tshuaj tsw qab rau koj thiab faus koj ib yam li thaum ub luag hlawv tshuaj tsw qab thiab faus koj cov yawgkoob thiab cov vajntxwv uas tuag ua ntej lawm. Lawv yuav quaj nyiav koj hais tias, ‘Peb tus vajntxwv tuag lawm!’ Kuv yog tus TSWV uas hais li ntawd.”
⁶Kuv thiaj coj tus TSWV tej lus mus hais rau Vajntxwv Xedekiyas uas nyob hauv Yeluxalees ⁷thaum tus vajntxwv uas kav tebchaws Npanpiloos cov tubrog tuaj tua lub nroog Yeluxalees thiab tua cov Yudas lub nroog Lakhis thiab Axekas uas yog ob lub nroog hauv tebchaws Yudas uas tseem muaj ntsayeej thaiv.

Tso Cov Neeg ua Qhev

⁸Vajntxwv Xedekiyas thiab cov pejxeem uas nyob hauv lub nroog Yeluxalees coglus hais tias, ⁹lawv yuav tso cov Henplais uas ua luag qhev kom dim kev ua qhev, tsis hais pojniam lossis txivneej, kom cov kwvtij Henplais tsis muaj ib tug ua luag qhev li. ¹⁰Cov thawjcoj thiab tej pejxeem sawvdaws pom zoo tso lawv tej qhev thiab tsis yuam lawv ua qhev ntxiv lawm. Lawv tau tso cov qhev ntawd tiag, ¹¹tiamsis tom qab ntawd tsis ntev, lawv rov hloov siab thiab mus coj cov qhev rov los ua qhev dua.
¹²Ces tus TSWV ¹³uas yog cov Yixalayees tus Vajtswv kom kuv mus hais rau cov neeg hais tias, “Kuv tau coglus rau nej cov yawgkoob thaum uas kuv tso lawv tawm nram tebchaws Iziv los kom lawv dim ntawm txojkev ua luag qhev. Kuv hais rau lawv hais tias ¹⁴cov neeg Henplais uas nws muab nws muag ua qhev thiab ua haujlwm rau lawv puv rau lub xyoos lawm, xyoo xya lawv yuav tsum tso cov qhev ntawd. Tiamsis nej cov yawgkoob tsis quavntsej lossis tsis mloog kuv hais li. ¹⁵Ob peb hnub uas dhau los ntawd nej tau hloov siab ua kom haum kuv siab nyiam. Nej sawvdaws yeej pom zoo tso nej cov kwvtij Henplais uas ua nej qhev thiab coglus tabmeeg kuv hauv lub Tuamtsev uas nej pehawm kuv. ¹⁶Tiamsis nej rov hloov siab thiab saib tsis tau kuv. Nej rov mus coj cov qhev uas nej twb muab tso mus lawm rov los thiab yuam kom lawv ua nej qhev dua. ¹⁷Yog li ntawd, nimno kuv uas yog tus TSWV hais rau nej hais tias nej yeej tsis mloog kuv lus; nej tsis tso nej tej kwvtij Henplais kom dim kev ua qhev. Yog li ntawd, kuv yuav tso nej nyob ywjpheej: yog kev ywjpheej mus tuag rau hauv tshavrog, tuag rau kev tshaib kev nqhis thiab tuag rau kab mob kev nkeeg. Kuv yuav ua kom txhua haivneeg thoob ntiajteb ntshai vim tej uas kuv ua rau nej. ^18-19Cov nomtswv hauv tebchaws Yudas, hauv lub nroog Yeluxalees, hauv lub loog, cov povthawj thiab cov thawjcoj tau coglus rau kuv thiab tua ib tug heev nyuj muab phua ua ob sab thiab lawv mus hauv kis nruab nrab. Tiamsis nimno lawv rhuav tsis ua rawv li lawv tej lus cog tseg; yog li ntawd, kuv yuav ua rau lawv ib yam li lawv ua rau tus heev nyuj ntawd. ²⁰Kuv yuav muab lawv cob rau lawv tej yeebncuab uas nrhiav nrhw tua lawv povtseg, tej tsiaj qus thiab noog yuav los noj lawv. ²¹Kuv yuav muab Vajntxwv Xedekiyas uas kav tebchaws Yudas thiab nws cov nomtswv cob rau cov neeg uas nrhiav nrhw tua lawv povtseg. Kuv yuav muab lawv cob rau cov tubrog Npanpiloos uas twb thim rov qab lawm. ²²Kuv yuav hais rau lawv kom lawv tig rov los rau hauv lub nroog. Lawv yuav tua lub nroog, txeeb lub nroog thiab hlawv lub nroog kom kub hnyiab tas. Kuv yuav ua kom cov Yudas tej nroog zoo ib yam li lub tiaj suabpuam uas tsis muaj neeg nyob. Kuv yog tus TSWV uas hais li ntawd.”