32

Tus vajntxwv ncaj ncees

¹Saib nawj, yuav muaj ib tug vajntxwv
kav ncaj ncees,
thiab cov thawj yuav txiav txim ncaj.
²Lawv txhua tus yuav zoo yam nkaus li
lub chaw nraim cua,
yog lub chaw uas roos cua daj cua dub,
zoo yam li tus dej cag hauv teb qhua,
thiab zoo yam li tus duab ntxoov ntxoo
ntawm txhib zeb uas loj heev
hauv tebchaws qhuav nkig nkuav.
³Thaum ntawd cov uas lub qhov muag
pom kev yuav tsis qe muag,
cov uas lub qhov ntsej mloog yuav tau hnov.
⁴Cov uas lub siab heev yuav txawj ntse,
cov uas tus nplaig nrhiav nrhiav lus
yuav hais lus meej nriav nrawm nroos.
⁵Luag yuav tsis hu tus neeg ruam tias
yog neeg tsim txiaj,
thiab yuav tsis hu tus uas siab nkhaus tias
yog neeg ncaj dua li lawm.
⁶Tus neeg ruam yeej hais tej lus ruam
thiab nws lub siab
kuj ntaus tswvyim ua txhaum,
nws ua tej kev phem
thiab hais tsis tseeb txog Yawmsaub,
nws ua rau cov uas tshaib tseem yoo
thiab nkaum tes tsis pub
rau cov uas nqhis tau haus.
⁷Tus neeg siab nkhaus tej tswvyim
phem kawg, nws xav tswvyim phem
hais lus dag ua rau cov pluag puam tsuaj,
txawm yog cov pluag tej lus thov raug cai kuj xij.
⁸Tus neeg tsim txiaj xav ua yam uas zoo xwb,
nws nyob ruaj vim qhov uas nws ua zoo.

Ntuas cov pojniam hauv Yeluxalees

⁹Nej cov pojniam uas tau zoo nyob,
cia li sawv tsees, thiab mloog kuv hais.
Nej cov ntxhais uas tsis txhawj dabtsi li,
cia li tig ntsej mloog kuv tej lus.
¹⁰Nej cov pojniam uas tsis txhawj dabtsi li,
tshuav ib xyoos ntau xwb
nej yuav ceeb tshee hnyo,
vim tej vaj txiv hmab yuav tsis txi txiv,
lub caij sau txiv yuav los tsis txog nej.
¹¹Nej cov pojniam uas tau zoo nyob,
cia li tshee hnyo,
nej cov uas tsis txhawj dabtsi li,
cia li ceeb tshee hnyo lauj!
Cia li hle tsoos tsho nyob liab qab,
thiab muab khaub seev tsaj
los npua ntawm duav.
¹²Cia li ntaus hauv siab
txog tej teb uas zoo zoo
thiab tej txiv hmab uas txi ncw,
¹³thiab txog kuv haiv neeg tej av
uas tuaj pos kaus ntsaj pos kaus ntsim,
thiab tej vaj tse uas xyiv fab hlo
hauv lub nroog uas lomzem.
¹⁴Rau qhov vajntxwv lub tsev
yuav raug muab tso tseg,
lub nroog uas muaj neeg nyob coob
yuav tsis muaj neeg nyob lawm,
lub roob thiab tej chaw tsom faj
yuav nyob do cuas mus ib txhis,
yuav ua nees luav qus lub chaw hom khaj,
thiab ua tshav zaub rau tej yaj tej tshis nog,
¹⁵mus txog thaum hliv Vaj Ntsuj Plig
saum ntuj los rau peb,
thiab tebchaws moj sab qhua
yuav ntxeev ua teb ntsu qoob,
thiab tej teb zoo qoob
yuav ntom nti li hav zoov.
¹⁶Thaum ntawd kev ua ncaj yuav nyob
hauv tebchaws moj sab qhua,
thiab txojkev ncaj ncees yuav nyob
hauv tej teb ntsu qoob.
¹⁷Qhov uas ua ncaj ncees
yuav ua rau muaj kev thaj yeeb,
thiab txojkev ncaj ncees yuav ua
kom nyob tus yees tso siab plhuav
mus ib txhis.
¹⁸Kuv haiv neeg yuav nyob kaj siab lug
rau hauv lub tsev uas tso siab plhuav
thiab so hauv lub chaw tus yees.
¹⁹Yuav los lawg ua rau hav zoov piam tag,
thiab lub nroog
yuav raug muab tshem pob tag,
²⁰los nej cov uas tseb noob ntawm ntug dej,
thiab tso nyuj thiab nees luav
nyob kab ntsab yuav tau nyob kaj siab lug.

32

Tus Vajntxwv uas Ncaj Ncees

¹Nej saib, yuav muaj ib tug vajntxwv kav ncaj ncees, thiab nws cov nomtswv los yuav tswjhwm raws li txojkev ncaj ncees. ²Cov nomtswv ntawd, txhua tus yuav zoo ib yam li lub tsev uas thaiv cua thiab lub chaw nkaum cua daj cua dub. Lawv yuav zoo ib yam li tej dej uas ntws hauv tiaj suabpuam, thiab zoo ib yam li lub tsua uas ntxoov lub tiaj mojsab qhua. ³Cov neeg uas qhovmuag pom kev yuav pom mus li, thiab cov neeg uas pobntseg hnov lus yuav hnov mus li. ⁴Cov neeg uas ua dog ua dig yuav txawj ntse thiab paub qabhau, thiab cov neeg uas nplaig txhav yuav hais tau lus meej npliag lias. ⁵Yuav tsis muaj leejtwg xav hais tias neeg ruam yog neeg tsim txiaj lossis hais tias tus neeg siab nkhaus yog neeg ncaj ncees. ⁶Tus neeg ruam yeej hais tej zaj ruam thiab nws lub siab xav ntsoov ua tej yam phem; nws ua tsis ncaj, hais lus saib tsis taus tus TSWV, nws tsis pub mov rau cov neeg tshaib plab noj thiab nws tsis pub dej rau cov neeg nqhis dej haus. ⁷Tus neeg siab nkhaus yeej muaj lub siab phem thiab nws ua kev phem nkaus xwb; nws dag noj dag haus thiab tuavhauv txov cov neeg pluag lub neej thiab yuam cov neeg txomnyem txoj cai. ⁸Tiamsis tus neeg tsim txiaj ua qhov ncaj thiab tuav rawv txoj cai xwb.

Cov Pojniam Hauv Nroog Yeluxalees

⁹Cov pojniam uas ua neej nyob qhuas ntxhias tsis txob tsis txhawj dabtsi, nej cia li mloog tej lus uas kuv hais! ¹⁰Nimno nej noj nyob tsau npo, tiamsis lwm xyoo txog lub caij no nej yuav txomnyem ntsuav vim yuav tsis muaj txiv hmab rau nej de lawm. ¹¹Cov pojniam uas ua neej nyob qhuas ntxhias tsis txob tsis txhawj dabtsi, nimno nej cia li ntshai ua ibce tshee hnyo, cia li hle nej tej tsoos tsho povtseg thiab muab ntaubtsaj los npua. ¹²Cia li ntaus nej hauv siab thiab tu siab vim nej tej teb uas zoo qoobloo thiab tej vaj txiv hmab uas txi txiv ncw twb puastsuaj tas; ¹³nroj tsuag thiab hmab pos twb tuaj laum kuv haivneeg tej av lawm; txhua lub tsev uas neeg nyob kaj siab lug, thiab tej nroog uas muaj neeg nyob lomzem xauv npo cia li quaj! ¹⁴Txawm yog vajntxwv lub loog los yuav muab tso povtseg thiab lub tuamceeb nroog los yuav ua suabpuam tas. Tej tsev thiab tej chaw fajxwm yuav raug kev puastsuaj mus ibtxhis. Yuav ua qhov chaw rau tej neesluav qus tau kev zoo siab thiab ua tshav zaub rau yaj noj.
¹⁵Tiamsis tus TSWV yuav txib nws tus ntsujplig los rau peb dua ib zaug ntxiv. Lub tebchaws uas ua quav poj yuav rov ua lub tebchaws uas av zoo, thiab tej teb yuav zoo qoobloo heev. ¹⁶Yuav muaj kev ncaj ncees nyob hauv tiaj suabpuam, thiab muaj kev ua zoo nyob hauv tej teb uas muaj qoobloo nplua mias. ¹⁷Thaum ntawd txhua tus yuav ua ncaj ua ncees, yuav muaj kev thajyeeb thiab nyob kaj siab lug mus ibtxhis. ¹⁸Kuv haivneeg yuav nyob tso siab lug ntawm qhov chaw uas muaj kev thajyeeb, hauv lub tsev uas nyob kaj siab lug thiab tsis muaj kev ntxhov siab dabtsi. ( ¹⁹Txawm yog lawg yuav los ntaus tej havzoov, thiab yuav muab lub nroog tsoo kom puastsuaj tas ²⁰los nej txhua tus cia li zoo siab, vim muaj dej txaus los ywg tej noob qoob uas nej tseb thiab muaj tshav zaub txhua qhov rau nej tej neesluav thiab tej nyuj noj.)