54

Yawmsaub hlub Yeluxalees tsis tu li

¹“Tus pojniam mooj 'e,
tus uas tsis tau yug dua menyuam,
cia li hu nkauj,
koj uas tsis tau mob dua plab yug menyuam 'e,
cia li tsa suab hu nkauj thiab hu nrov nrov,
rau qhov tus pojniam
uas tsis muaj txiv li menyuam
yuav coob dua tus pojniam uas muaj txiv.”
Yawmsaub hais li no ntag.
²“Cia li txuas koj lub tsev ntaub kom dav,
thiab nthuav daim ntaub
uas xov koj lub chaw nyob kom dav.
Tsis txhob nkaum tes,
cia li txuas koj txoj hlua kom ntev
thiab txhos koj tej tswg kom ruaj,
³rau qhov koj yuav nthuav dav
mus rau sab xis sab laug.
Koj tej caj ces yuav tau
ib tsoom tebchaws los ua lawv tug,
thiab yuav mus nyob
rau hauv tej moos uas nyob do cuas.
⁴Tsis txhob ntshai
vim koj yuav tsis raug txaj muag,
tsis txhob poob siab
vim koj yuav tsis poob ntsej muag.
Koj yuav tsis nco qab tej kev txaj muag
thaum koj tseem hluas nkauj,
thiab koj yuav tsis nco qhov uas
luag thuam koj ua poj ntsuam dua li lawm.
⁵Tus uas tsim koj yog koj li txiv,
nws npe yog Yawmsaub
uas muaj hwjchim loj kawg nkaus,
thiab tus Dawb Huv hauv cov Yixayee
yog tus txhiv koj,
nws hu ua Vajtswv
uas kav tag nrho lub ntiajteb huvsi.
⁶Yawmsaub tau hu koj yam li tus pojniam
uas raug muab tso tseg es lwj siab lawd,
yam li tus pojniam hluas
uas raug muab tso tseg.”
Koj tus Vajtswv hais li no ntag.
⁷“Kuv tso koj tseg ib nyuag pliag xwb,
tiamsis kuv khuvleej koj heev
es kuv yuav qaws koj rov los.
⁸Kuv npau taws ceev es fee plhu ntawm koj
ib nyuag pliag xwb,
tiamsis vim yog muaj txojkev hlub ib txhis
kuv yuav khuvleej koj.”
Yawmsaub tus uas txhiv koj hais li no ntag.

⁹“Kuv saib tej no zoo ib yam li
thaum Nau‑a nyob.
Kuv cog lus twv rau Nau‑a tias
dej yuav tsis nyab lub ntiajteb dua li lawm,
ib yam li ntawd kuv tau cog lus twv tias
kuv yuav tsis chim rau koj
thiab yuav tsis cem koj.
¹⁰Txawm yog tej roob yuav ncaim mus
thiab tej pov roob yuav raug muab rhuav tshem mus,
los kuv txojkev hlub uas ruaj khov
yuav tsis ncaim koj,
thiab kuv tej lus cog tseg sib raug zoo
yuav tsis raug muab rhuav tshem.”
Yawmsaub uas khuvleej koj hais li no ntag.

¹¹“Au koj uas raug txom nyem nyuaj siab,
raug cua daj cua dub ntsawj
thiab tsis muaj leejtwg nplij,
saib maj, kuv muab koj tej pob zeb
lo tej qe zeb hlaws dub txho txaij
thiab muab tej qe zeb phaithu tsamxem los
tiag koj lub taw.
¹²Kuv yuav muab tej qe zeb liab los
ua koj tej chaw tsom faj,
thiab muab tej qe zeb hlaws ci ci
muaj nqes los ua koj tej rooj loog,
thiab muab tej qe zeb muaj nqes los
ua koj tej ntsa loog.
¹³Yawmsaub yuav qhuab qhia koj tej tub huvsi,
thiab koj tej tub ki yuav vam meej heev kawg.
¹⁴Koj yuav raug muab tsa
rau hauv txojkev ncaj ncees,
koj yuav nyob deb ntawm
kev raug luag quab yuam,
vim koj yuav tsis ntshai,
thiab deb ntawm txojkev txhawj xeeb kev ntshai
vim tej ntawd yuav tsis los ze koj.
¹⁵Yog leejtwg tshum kom muaj kev sib txeeb,
kuj tsis yog kuv ua.
Leejtwg tshum kom muaj kev sib txeeb
tus ntawd yuav piam tag rau koj tes.
¹⁶Saib maj, kuv twb tsim tus Kws hlau
uas tshuab tej thee hluavtaws,
thiab ua tej cuab yeej uas hum siv
rau tej haujlwm ntawd.
Kuv twb tsim tus uas rhuav tshem
ua kom puam tsuaj.
¹⁷Tsis muaj ib yam cuab yeej uas tsim los
tawm tsam yeej koj,
thiab koj yuav rhuav tshem txhua tus nplaig
uas sawv los txiav txim rau koj.
No yog Yawmsaub cov tub qhe li
qub txeeg qub teg,
thiab yog qhov uas kuv tsa lawv cai.”
Yawmsaub hais li no ntag.