41
Vajtswv yuav pab Yixayee
1“Cov tebchaws uas nyob
ntawm ntug hiavtxwv 'e,
cia li nyob twjywm mloog kuv hais.
Cia ib tsoom tebchaws
cuab lawv lub zog dua tshiab,
cia lawv txav los ze thiab cia lawv hais.
Peb cia li ua ke txav los ze
lub chaw txiav txim.
2“Leejtwg txhob ib tug tawm
sab hnub tuaj tuaj
uas kov yeej txhua kauj ruam?
Nws muab ib tsoom tebchaws
cob rau tus ntawd
thiab tsuj tej vajntxwv rau hauv xib taws.
Nws rab ntaj ua rau lawv
zoo yam nkaus li tej hmoov av,
thiab nws rab hneev ua rau lawv zoo li
tej quav nyab uas cua ntsawj ya mus.
3Nws raws lawv
thiab hla dhau plaws tso siab plhuav,
taug txojkev uas nws txhais kotaw
tsis tau tsuj dua.
4Leejtwg tau ua tej no thiab ua kom tiav,
yog hu txhua tiam neeg
txij thaum chiv keeb los?
Kuv uas yog Yawmsaub ua,
kuv yeej nyob thawj tiam neeg
thiab nyob tiam kawg.
Kuv yog tus ntawd ntag.”
5Tej tebchaws ntawm ntug hiavtxwv
twb pom lawm kuj ntshai,
thiab thoob qab ntuj kawg
kuj ntshai tshee hnyo.
Lawv txav los ze thiab tuaj ua ke lawm.
6Txhua tus pab nws kwvtij zej zog,
thiab hais rau nws cov kwvtij tias,
“Cia li ua siab tuab.”
7Tus Kws txawj txhua yam
txhawb tus Kws ntaus kub lub zog,
tus uas xuas rauj ntaus kom du
kuj txhawb tus uas
ntaus ntawm lub thaiv lub zog,
thiab hais txog qhov uas ham tias,
“Zoo heev lawm.”
Lawv kuj muab ntsia hlau ntsia
tus dab mlom ntawd kom tsis txhob ua zog.
8Yixayee, koj uas yog kuv tus qhev,
yog Yakhauj uas kuv tau xaiv cia,
yog kuv tus kwvluag Aplahas caj ces,
9koj yog tus uas kuv coj tawm
tim qab ntuj kawg los, thiab hu tawm
hauv qhov uas deb kawg hauv ntiajteb los.
Kuv hais rau koj tias,
“Koj yog kuv tus qhev, kuv xaiv koj
thiab kuv yuav tsis muab koj laim pov tseg.”
10Koj tsis txhob ntshai,
vim kuv nrog nraim koj,
tsis txhob poob siab
vim kuv yog koj tus Vajtswv.
Kuv yuav pub zog rau koj, kuv yuav pab koj,
kuv txhais tes uas kov yeej
yuav tuav rawv koj.
11“Saib maj, txhua tus uas chim heev rau koj
yuav raug txaj muag thiab poob ntsej muag,
cov uas tawm tsam koj
yuav ploj thiab puam tsuaj mus.
12Koj yuav nrhiav cov uas tawm tsam koj
los koj yuav tsis pom li lawm,
cov uas ua rog rau koj yuav ploj yaj ntshis.
13Rau qhov kuv uas yog
koj tus Vajtswv Yawmsaub tuav rawv
koj txhais tes xis cia,
kuv yog tus uas hais rau koj tias,
Tsis txhob ntshai, kuv yuav pab koj.”
14Yawmsaub hais tias,
“Tus nyuag kas Yakhauj 'e,
tus nyuag Yixayee 'e,
tsis txhob ntshai, kuv yuav pab koj.
Tus uas txhiv koj
yog Yixayee tug Tswv uas Dawb Huv.
15Saib maj, kuv yuav muab koj ua
lub thob log tshiab ntaus qoob
uas ntse thiab muaj hniav.
Koj yuav ntaus thiab tsoo tej roob,
thiab ua rau tej pov roob
zoo li npluag qoob.
16Koj yuav ntxuaj thiab cua yuav ntsawj
ya tag mus, cua daj cua dub
yuav ua kom ri sua.
Koj yuav zoo siab xyiv fab
rau hauv Yawmsaub,
koj yuav khav txog
tus Dawb Huv hauv cov Yixayee.
17“Thaum cov neeg pluag
thiab cov uas txom nyem
nrhiav dej tiamsis tsis muaj,
lawv tus nplaig qhuav qhawv
vim yog nqhis heev,
kuv uas yog Yawmsaub yuav teb lawv,
kuv uas yog Yixayee tus Vajtswv
yuav tsis tso lawv tseg.
18Kuv yuav ua dej ntws saum tej roob
do hau los thiab ua dej txhawv hauv tej hav.
Kuv yuav muab tebchaws moj sab qhua
ua pas dej, thiab muab tej teb qhua
ua qhov dej txhawv.
19Kuv yuav ua kom tebchaws moj sab qhua
tuaj ntoo ciab thiab ntoo kub twg
thiab txiv ntoo roj thiab ntoo aulib,
kuv yuav ua rau ntuj nrag teb do
tuaj ntoo ciab nplooj suab
thiab ntoo seb thiab ntoo thuv tuaj ua ke,
20neeg thiaj yuav pom thiab paub,
lawv yuav xav txog thiab nkag siab tias
Yawmsaub txhais tes ua tej no,
tus Dawb Huv hauv cov Yixayee tsim tej no.”
Yawmsaub thuam tej dab
21Yawmsaub hais tias,
“Nej cia li teev nej tej lus kom.”
Yakhauj tus vajntxwv hais tias,
“Cia li coj nej tej keeb puam tuaj.
22Cia lawv coj tej dab ntawd tuaj qhia rau peb
paub tias yuav muaj dabtsi tshwm los.
Thiab qhia peb paub tias tej uas
muaj yav thaum ub los lawd yog dabtsi,
peb thiaj tshuaj saib thiab paub tias
tej ntawd yuav zoo li cas rau thaum kawg.
Lossis piav rau peb mloog txog
tej uas yuav muaj tshwm los.
23Cia li qhia rau peb paub tias
yav tom ntej yuav muaj dabtsi tshwm los,
peb thiaj paub tias nej yog timtswv tiag.
Cia li ua zoo lossis ua phem,
xwv peb thiaj li poob siab thiab ntshai.
24Saib maj, nej twb peem tsis tsheej dabtsi li,
thiab tej uas nej ua tsis muaj qabhau li,
cov uas xaiv yuav nej kuj qias vuab tsuab.
25“Kuv twb txhob ib tug tuaj sab ped tuaj
mas nws tuaj lawm,
nws tawm sab hnub tuaj tuaj
thiab tuav kuv lub npe.
Nws yuav tsuj pes ntiag cov thawj
ib yam li tsuj hmoov zeb sib,
ib yam li tus Kws puab laujkaub
tsuj cov av nplaum.
26Leejtwg qhia txij thaum chiv keeb los
rau peb paub,
thiab qhia ua ntej lawm
peb thiaj hais tau tias,
‘Nws hais tseeb tiag?’
Tsis muaj leejtwg qhia,
tsis muaj leejtwg tshaj tawm,
tsis muaj leejtwg hnov nej tej lus.
27Kuv yog thawj tug uas qhia rau Xi‑oo
tias, ‘Lawv tuaj lawm,’
thiab tso tus uas xa xov zoo
tuaj rau hauv Yeluxalees.
28Tiamsis thaum kuv tsa muag ntsia
tej dab ntawd, tsis muaj ib tug li,
tej dab ntawd tsis muaj ib tug ua tau
lub chaw sablaj uas yuav teb kuv
rau thaum kuv nug.
29Saib maj, tej dab ntawd puavleej
yog cuav xwb,
tej uas lawv ua tsis muaj qabhau li,
tej dab mlom uas nchuav ntawd
kuj yog ib nthwv cua ntsawj do xwb.”