45

Yawmsaub hais rau Xailab

¹“Yawmsaub hais li no rau tus uas
nws hliv roj tsa lawd, yog Xailab,
yog tus uas kuv tuav nws sab tes xis
kom kuv thiaj ntaus yeej
tej tebchaws ntawm nws xubntiag,
thiab hle tej vajntxwv txoj siv ntawm duav,
thiab qheb tej qhov rooj
rau ntawm nws hauv ntej
tsis muaj ib lub rooj loog yuav muab kaw li.
²Kuv yuav mus ua koj ntej
thiab muab tej roob pheej kom tiaj,
kuv yuav tsoo tej rooj loog tooj liab
pob tag ua tej dwb daim,
thiab txiav tej las hlau kom tu.
³Kuv yuav pub tej nyiaj txiag uas khaws cia
hauv qhov tsaus ntuj thiab tej qhov nyiaj
uas muab zais lawm rau koj,
xwv koj thiaj paub tias kuv uas yog Yawmsaub
uas yog cov Yixayee tus Vajtswv
hu koj raws li koj lub npe.
⁴Vim yog saib rau kuv tus qhev Yakhauj
thiab saib rau Yixayee
uas kuv twb xaiv cia lawd,
kuv thiaj li hu koj raws li koj lub npe,
txawm yog koj tsis paub kuv
los kuv tis npe rau koj.
⁵Kuv yog Yawmsaub,
tsis muaj dua ib tug twg li,
dhau kuv lawm tsis muaj dua ib tug vajtswv.
Txawm yog koj tsis paub kuv
los kuv pub zog rau koj,
⁶xwv tej neeg txij ntua sab hnub tuaj
mus txog ntua sab hnub poob thiaj li paub
tias dhau kuv lawm tsis muaj dua ib tug li.
Kuv yog Yawmsaub,
tsis muaj dua lwm tus li lawm.
⁷Kuv tsim qhov kaj thiab tsim qhov tsaus ntuj,
kuv ua kom noj qab nyob zoo
thiab ua kom muaj kev puam tsuaj,
kuv yog Yawmsaub
yog tus uas ua txhua yam no huvsi.

⁸“Lub ntuj 'e, cia li tso txojkev ncaj ncees
saum ntuj los, cia lub ntuj hliv los.
Cia lub ntiajteb qheb kiag kom
txojkev cawm dim thiaj li hlob tuaj,
thiab cia lub ntiajteb ua txojkev
ncaj ncees tshwm tuaj.
Kuv yog Yawmsaub uas tsim tej no.

⁹“Tus tawm tsam tus uas tsim,
nws yuav raug txom nyem lauj,
yog lub laujkaub av
tawm tsam tus Kws puab.
Cov av nplaum puas hais rau tus Kws puab
tias, ‘Koj tabtom ua dabtsi?’
lossis ‘Koj tsis ua tus tes nqa.’ lov?
¹⁰Tus uas hais rau leej txiv tias,
‘Koj yug tau dabtsi?’
lossis hais rau leej niam tias,
‘Koj yug tau dabtsi?’
yuav raug txom nyem lauj!”
¹¹Yawmsaub, yog tus Dawb Huv
hauv cov Yixayee, yog tus uas tsim lawv,
hais li no tias, “Hais txog tej uas
yuav muaj rau tom hauv ntej,
mas nej yuav nug txog kuv tej tub ki,
lossis qhia rau kuv txog tej uas
kuv txhais tes yuav tsum ua lov?
¹²Kuv tsim lub ntiajteb
thiab tsim neeg nyob rau hauv,
kuv txhais tes ntag nthuav lub ntuj
thiab kuv kav txhua yam
uas nyob saum nruab ntug.
¹³Kuv ua ncaj ncees
kuv thiaj li tsa Xailab sawv,
kuv yuav ua rau nws tej kev huvsi ncaj.
Nws yuav tsim kuv lub nroog dua tshiab
thiab tso kuv cov neeg uas poob tebchaws
dim tsis yuav nqe tsis yuav tshav ntuj.”
Yawmsaub uas muaj hwjchim
loj kawg nkaus hais li no ntag.
¹⁴Yawmsaub hais li no tias,
“Tej nyiaj txiag hauv Iyi
thiab cov neeg Khuj tej kev lag luam,
thiab cov neeg Xenpa uas siab siab
yuav tuaj cuag nej thiab ua nej li.
Lawv yuav raws nej qab.
Lawv yuav raug saw hlau khi tuaj
thiab yuav khoov ntshis pe nej.
Lawv yuav taij thov nej hais tias,
‘Vajtswv nrog nraim nej,
thiab tsis muaj dua ib tug twg li,
dhau nws lawm tsis muaj lwm tus vajtswv li.’ ”
¹⁵Au Yixayee tus Vajtswv, yog tus cawmseej,
qhov tseeb koj yog tus Vajtswv
uas tsis pub leejtwg pom.
¹⁶Lawv txhua tus yuav raug txaj muag
thiab poob ntsej muag,
cov uas ua dab mlom sawvdaws
yuav raug rhuav ntsej muag.
¹⁷Cov Yixayee yuav raug Yawmsaub
cawm dim mus ib txhis tsis kawg
nej yuav tsis txaj muag
thiab tsis poob ntsej muag mus ib txhis.

¹⁸Yawmsaub uas tsim lub ntuj,
nws yog Vajtswv, nws yog tus uas
puab lub ntiajteb thiab muab tsim cia,
nws muab lub ntiajteb tsim ruaj khov,
nws tsis tsim nyob do cuas,
nws tsim kom muaj neeg nyob.
Nws hais tias, “Kuv yog Yawmsaub,
tsis muaj dua lwm tus li lawm.
¹⁹Kuv tsis tau hais nraim nkoos,
tsis tau hais rau hauv lub tebchaws
uas tsaus ntuj nti.
Kuv tsis tau hais rau Yakhauj caj ces tias,
‘Cia li nrhiav kuv hauv lub chaw uas do cuas.’
Kuv uas yog Yawmsaub hais qhov tseeb,
kuv qhia tej uas raug cai xwb.

²⁰“Nej cov uas tseem tshuav nyob
hauv ib tsoom tebchaws,
cia li tuaj txoos ua ke thiab txav los ze ze.
Cov uas nqa lawv tej dab mlom ntoo
mus mus los los,
thiab pheej thov tej dab
uas cawm tsis tau dim,
lawv tsis paub dabtsi li.
²¹Cia li piav thiab teev nej tshaj plaub,
cia lawv sablaj ua ke.
Leejtwg piav tej no mloog ntev los lawm?
Leejtwg qhia tej no txij thaum ub los?
Tsis yog kuv, uas yog Yawmsaub lov?
Dhau kuv lawm tsis muaj dua ib tug vajtswv li.
kuv yog tus Vajtswv ncaj ncees
thiab yog tus cawmseej.
Dhau kuv lawm tsis muaj dua lwm tus li.
²²Thoob qab ntuj kawg, cia li tig los rau kuv
thiab txais txojkev cawm dim,
rau qhov kuv yog Vajtswv,
tsis muaj dua lwm tus lawm.
²³Kuv tuav kuv tus kheej twv
thiab cog lus ncaj ncees
tawm hauv kuv lub qhov ncauj mus,
yuav tsis thim tej lus ntawd kiag li, hais tias,
‘Txhua lub hauv caug yuav pe kuv,
txhua tus nplaig yuav cog lus rau kuv.’
²⁴Luag yuav hais txog kuv tias,
‘Txojkev ncaj ncees thiab lub zog tsuas yog
nyob hauv Yawmsaub tib leeg xwb.’ ”
Txhua tus uas npau taws rau nws yuav los
cuag nws thiab yuav txaj muag kawg.
²⁵Nyob hauv Yawmsaub,
Yixayee caj ces sawvdaws yuav kov yeej,
thiab qhuas ntxhias nws.

45

Yawmsaub has rua Xailab

¹“Yawmsaub has le nuav rua tug kws nwg laub roj tsaa lawd,
yog Xailab, yog tug kws kuv tuav nwg saab teg xws
sub kuv txhad ntaus yeej tej tebchaws ntawm nwg xubndag,
hab hle tej vaajntxwv txuj hlaab ntawm duav,
hab qheb tej qhov rooj rua ntawm nwg hauv ntej
tsw muaj ib lub rooj loog yuav muab kaw le.
²Kuv yuav moog ua koj ntej hab muab tej roob pheej kuas taj,
kuv yuav tsoo tej rooj loog tooj lab pob taag ua tej dwb daim,
hab txav tej laag hlau kuas tu.
³Kuv yuav pub tej nyaj txag kws khaws ca huv qhov tsaus ntuj
hab tej qhov nyaj kws muab zais lawm rua koj,
sub koj txhad paub tas kuv kws yog Yawmsaub
kws yog cov Yixayee tug Vaajtswv
hu koj lawv le koj lub npe.
⁴Vem yog saib rua kuv tug qhev Yakhauj
hab saib rua Yixayee kws kuv tub xaiv ca lawd,
kuv txhad le hu koj lawv le koj lub npe,
txawm yog koj tsw paub kuv los kuv tis npe rua koj.
⁵Kuv yog Yawmsaub, tsw muaj dua ib tug twg le,
dhau kuv lawm tsw muaj dua ib tug vaajtswv.
Txawm yog koj tsw paub kuv los kuv pub zug rua koj,
⁶sub tej tuabneeg txwj nrho saab nub tuaj
moog txug ncua saab nub poob
txhad le paub tas dhau kuv lawm tsw muaj dua ib tug le.
Kuv yog Yawmsaub, tsw muaj dua lwm tug le lawm.
⁷Kuv tswm qhov kaaj hab tswm qhov tsaus ntuj,
kuv ua kuas noj qaab nyob zoo
hab ua kuas muaj kev puam tsuaj,
kuv yog Yawmsaub yog tug kws ua txhua yaam nuav huvsw.

⁸“Lub ntuj 'e, ca le tso txujkev ncaaj nceeg sau ntuj lug, ca lub ntuj hliv lug.
Ca lub nplajteb qheb hlo sub txujkev cawm dim txhad le hlub tuaj,
hab ca lub nplajteb ua txujkev ncaaj nceeg tshwm tuaj.
Kuv yog Yawmsaub kws tswm tej nuav.

⁹“Tug tawm tsaam tug kws tswm,
nwg yuav raug txom nyem lauj,
yog lub laujkaub aav tawm tsaam tug Kws puab.
Cov aav nplaum puas has rua tug Kws puab tas,
‘Koj saamswm ua daabtsw?’
lossws ‘Koj tsw ua tug teg nqaa.’ lov?
¹⁰Tug kws has rua leej txwv tas, ‘Koj yug tau daabtsw?’
lossws has rua leej nam tas, ‘Koj yug tau daabtsw?’
yuav raug txom nyem lauj!”
¹¹Yawmsaub, yog tug Dawb Huv huv cov Yixayee,
yog tug kws tswm puab, has le nuav tas,
“Has txug tej kws yuav muaj rua tom hauv ntej,
mas mej yuav nug txug kuv tej tub ki,
lossws qha rua kuv txug tej kws
kuv txhais teg yuav tsum ua lov?
¹²Kuv tswm lub nplajteb hab tswm tuabneeg nyob rua huv,
kuv txhais teg ntaag nthuav lub ntuj
hab kuv kaav txhua yaam kws nyob sau nruab ntug.
¹³Kuv ua ncaaj nceeg kuv txhad le tsaa Xailab sawv,
kuv yuav ua rua nwg tej kev huvsw ncaaj.
Nwg yuav tswm kuv lub nroog dua tshab
hab tso kuv cov tuabneeg kws poob tebchaws dim
tsw yuav nqe tsw yuav tshaav ntuj.”
Yawmsaub kws muaj fwjchim luj kawg nkaus has le nuav ntaag.
¹⁴Yawmsaub has le nuav tas,
“Tej nyaj txag huv Iyi hab cov tuabneeg Khuj tej kev laag luam,
hab cov tuabneeg Xenpa kws sab sab
yuav tuaj cuag mej hab ua mej le.
Puab yuav lawv mej qaab.
Puab yuav raug saw hlau khi tuaj hab yuav khoov ntshws pe mej.
Puab yuav taij thov mej has tas, ‘Vaajtswv nrug nraim mej,
hab tsw muaj dua ib tug twg le,
dhau nwg lawm tsw muaj lwm tug vaajtswv le.’ ”
¹⁵Au Yixayee tug Vaajtswv, yog tug cawmseej,
qhov tseeb koj yog tug Vaajtswv kws tsw pub leejtwg pum.
¹⁶Puab txhua tug yuav raug txaaj muag hab poob ntsej muag,
cov kws ua txoov daab suavdawg yuav raug rhuav ntsej muag.
¹⁷Cov Yixayee yuav raug Yawmsaub cawm dim moog ib txhws tsw kawg,
mej yuav tsw txaaj muag hab tsw poob ntsej muag moog ib txhws.

¹⁸Yawmsaub kws tswm lub ntuj, nwg yog Vaajtswv,
nwg yog tug kws puab lub nplajteb hab muab tswm ca,
nwg muab lub nplajteb tswm ruaj khov, nwg tsw tswm nyob do cuas,
nwg tswm kuas muaj tuabneeg nyob.
Nwg has tas, “Kuv yog Yawmsaub,
tsw muaj dua lwm tug le lawm.
¹⁹Kuv tsw tau has nraim nkoog,
tsw tau has rua huv lub tebchaws kws tsaus ntuj nti.
Kuv tsw tau has rua Yakhauj caaj ceg tas,
‘Ca le nrhav kuv huv lub chaw kws do cuas.’
Kuv kws yog Yawmsaub has qhov tseeb,
kuv qha tej kws raug cai xwb.

²⁰“Mej cov kws tseed tshuav nyob huv ib tsoom tebchaws,
ca le tuaj txoos ua ke hab txaav lug ze ze.
Cov kws nqaa puab tej txoov daab ntoo moog moog lug lug,
hab pheej thov tej daab kws cawm tsw tau dim,
puab tsw paub daabtsw le.
²¹Ca le pav hab teev mej tshaaj plaub, ca puab sablaaj ua ke.
Leejtwg pav tej nuav noog ntev lug lawm?
Leejtwg qha tej nuav txwj thau u lug?
Tsw yog kuv, kws yog Yawmsaub lov?
Dhau kuv lawm tsw muaj dua ib tug vaajtswv le.
kuv yog tug Vaajtswv ncaaj nceeg hab yog tug cawmseej.
Dhau kuv lawm tsw muaj dua lwm tug le.
²²Thoob qaab ntuj kawg, ca le tig lug rua kuv hab txais txujkev cawm dim,
tsua qhov kuv yog Vaajtswv, tsw muaj dua lwm tug lawm.
²³Kuv tuav kuv tug kheej twv
hab cog lug ncaaj nceeg tawm huv kuv lub qhov ncauj moog,
yuav tsw thim tej lug hov hlo le, has tas,
‘Txhua lub hauv caug yuav pe kuv
txhua tug nplaig yuav cog lug rua kuv.’
²⁴Luas yuav has txug kuv tas,
‘Txujkev ncaaj nceeg hab tug zug
tsuas yog nyob huv Yawmsaub tuab leeg xwb.’ ”
Txhua tug kws npau tawg rua nwg yuav lug cuag nwg
hab yuav txaaj muag kawg.
²⁵Nyob huv Yawmsaub,
Yixayee caaj ceg suavdawg yuav kov yeej,
hab qhuas ntxhas nwg.