43

Vajtswv yog tus uas txhiv

¹Yakhauj 'e, nimno Yawmsaub uas tsim koj,
Yixayee 'e, tus uas puab koj, hais li no tias,
“Tsis txhob ntshai,
rau qhov kuv twb txhiv koj lawm.
Kuv hu koj raws li koj lub npe.
Koj yog kuv tug.
²Thaum koj hla dej kuv yuav nrog nraim koj,
thaum koj hla tus niag dej,
dej yuav tsis nyab koj,
thaum koj hla hluavtaws,
koj yuav tsis kub hnyiab,
thiab nplaim taws yuav tsis kub koj.
³Vim kuv yog Yawmsaub, yog koj tus Vajtswv,
kuv yog tus Dawb Huv hauv cov Yixayee
thiab yog koj tus cawmseej.
Kuv muab Iyi ua cov nqe txhiv koj
thiab muab Khuj thiab Xenpa pauv koj.
⁴Vim kuv qhov muag saib koj tsim txiaj
thiab vim koj muaj koob meej
thiab kuv hlub koj,
kuv thiaj muab neeg pauv koj,
thiab muab tej haiv neeg pauv koj txojsia.
⁵Tsis txhob ntshai, vim kuv nrog nraim koj,
kuv yuav coj koj tej tub ki
tawm sab hnub tuaj los
thiab yuav qaws koj
tawm sab hnub poob los.
⁶Kuv yuav hais rau sab ped tias,
‘Cia li tso lawv,’
thiab hais rau sab nrad tias,
‘Tsis txhob tav lawv.’
Cia li coj kuv cov tub tawm deb deb li los,
thiab coj kuv cov ntxhais
tawm qab ntuj kawg los,
⁷yog txhua tus uas raug hu raws li kuv lub npe,
yog cov uas kuv tsim rau kuv tau koob meej,
yog cov uas kuv tau puab thiab tsim cia.”

⁸Cia li coj cov uas muaj qhov muag
los tsis pom kev,
cov uas muaj qhov ntsej
los tsis hnov lus tawm los.
⁹Cia ib tsoom tebchaws sawvdaws
sau zog tuaj ua ke,
thiab cia ib tsoom neeg tuaj txoos ua ke.
Hauv nruab nrab lawv muaj leejtwg tau qhia
tej no thiab piav tej uas dhau los lawd
rau peb mloog?
Cia lawv coj lawv tej timkhawv tuaj nres lawv,
thiab cia luag tau hnov thiab hais tias,
“Muaj tseeb tiag.”
¹⁰Yawmsaub hais tias, “Nej ua kuv li timkhawv,
thiab ua kuv tus tub qhe
uas kuv xaiv cia lawd,
kom nej thiaj li paub thiab ntseeg kuv,
thiab nkag siab tias,
kuv yog tus ntawd ntag.
Ua kuv ntej tsis muaj ib tug timtswv twg
uas yog muab txua tshwm los,
thiab ua kuv qab kuj yuav tsis muaj li.
¹¹Kuv mas kuv thiaj yog Yawmsaub,
dhau kuv lawm tsis muaj
dua ib tug cawmseej.
¹²Kuv yog tus qhia nej paub,
cawm nej dim, piav nej mloog,
tsis muaj dua ib tug vajtswv twg
nyob hauv nej.
Thiab nej yog kuv li timkhawv.”
Yawmsaub hais li no ntag.
¹³“Kuv yog Vajtswv, thiab txij no mus
kuv yeej yog tus Vajtswv ntawd,
tsis muaj ib tug twg tso dim tau
hauv kuv txhais tes.
Kuv ua yam haujlwm twg,
leejtwg yuav tav tau?”

¹⁴Yawmsaub, yog tus uas txhiv nej,
yog tus Dawb Huv hauv cov Yixayee
hais li no tias,
“Vim yog saib rau nej
kuv yuav xa tub rog mus rau Npanpiloo,
thiab coj cov Kheedia ntawd
caij lub nkoj uas lawv khav ntxhias
khiav tawm hauv lawv lub tebchaws.⚓
¹⁵Kuv yog Yawmsaub,
yog nej tus uas Dawb Huv,
yog tus uas tsim Yixayee,
thiab yog nej tus vajntxwv.”
¹⁶Yawmsaub uas tsim txojkev
rau hauv hiavtxwv,
thiab rhawv kev rau hauv
dej hiavtxwv uas tob kawg,
¹⁷yog tus uas coj cov tsheb ua rog
thiab tej nees, thiab pab tub rog
thiab cov tub rog siab loj siab tuab tawm los,
es lawv txawm pw tag sawv tsis taus los,
lawv ploj tag yam li tus teeb xeeb
uas muab tua kiag, nws hais li no tias,
¹⁸“Tsis txhob nco txog
tej uas dhau tag los lawd,
tsis txhob tshuaj saib tej qub thaum ub.
¹⁹Saib maj, kuv tabtom ua ib yam tshiab,
twb tshwm los lawm, nej tsis pom lov?
Kuv yuav rhawv ib txojkev
rau hauv tebchaws moj sab qhua,
thiab ua kom muaj tej hav dej
rau hauv ntuj nrag teb do.
²⁰Tej tsiaj qus yuav hwm kuv,
tsis hais hma thiab noog ntxhuav,
vim kuv pub dej rau hauv
tebchaws moj sab qhua,
ua hav dej rau hauv ntuj nrag teb do,
yog pub dej rau haiv neeg
uas kuv xaiv cia lawm haus,
²¹yog haiv neeg uas kuv tsim los rau kuv,
xwv thiaj li qhia tej uas tsim nyog qhuas kuv.

²²“Au Yakhauj 'e, txawm li ntawd
los koj tsis tau hu thov kuv,
au Yixayee 'e, koj tsis tau
txog siav rau kuv kiag li.⚓
²³Koj tsis tau coj koj tej yaj tuaj
hlawv xyeem rau kuv,
koj tsis tau tua tsiaj xyeem hwm kuv.
Kuv tsis tau cia koj ris lub nra hnyav
uas xyeem qhov txhia chaw rau kuv,
thiab tsis tau cia koj khwv
txog qhov uas hlawv roj ntoos tsw qab.
²⁴Koj tsis tau rho nyiaj
yuav tauj qaib qab zib rau kuv,
lossis muab tej roj hlawv xyeem
ua rau kuv txaus siab.
Tiamsis koj muab koj lub txim
ua lub nra hnyav rau kuv ris,
thiab koj ua rau kuv txog siav
txog koj tej kev txhaum.

²⁵“Kuv mas kuv yog tus uas rhuav
koj tej kev fav xeeb vim yog saib rau kuv,
thiab kuv yuav tsis cim ntsoov
koj lub txim cia.
²⁶Cia li hais koj tej keeb puam rau kuv mloog,
wb cia li sib cam.
Koj cia li hais tuaj xwv thiaj tshuaj tau tias
koj ua raug cai.
²⁷Koj thawj leej txiv thaum ub
yeejlos ua txhaum muaj txim,
thiab cov uas pab koj hais plaub
kuj fav xeeb rau kuv.
²⁸Yog li no kuv thiaj muab cov thawj
hauv lub chaw pe kuv rhuav ntsej muag,
kuv muab Yakhauj cais
kom raug kev puam tsuaj tag,
thiab muab Yixayee cob rau luag thuam.”

43

Vajtswv Coglus Pab Nws Haivneeg

¹Cov Yixalayees, tus TSWV uas tsim nej hais tias,
“Nej tsis txhob ntshai, kuv yuav cawm kom nej dim.
Kuv twb tuav nej npe hu nej lawm,
vim nej yog kuv haivneeg.
²Thaum nej hla tej dej tob,
kuv yuav nrog nraim nej lossis nej mus hauv dej,
dej yuav tsis tshoob nej.
Thaum nej mus hauv cov nplaim hluavtaws,
hluavtaws yuav tsis kub nej;
txojkev sim siab no yuav txov tsis
tau nej.
³Rau qhov kuv yog tus TSWV uas yog nej tus Vajtswv.
Kuv yog cov Yixalayees tus Vajtswv
dawbhuv uas cawm kom nej dim.
Kuv muab cov Iziv los ua nqi txhiv
nej, muab cov Sudas thiab cov Xenpas los pauv nej.
⁴Kuv muab tagnrho txhua haivneeg los txhiv nej txojsia,
rau qhov nej muaj nqis rau kuv heev,
kuv ua kom nej tau ntsejmuag,
thiab kuv hlub nej kawg nkaus li.
⁵Tsis txhob ntshai, kuv nrog nraim nej!

“Kuv yuav coj nej puag tim hnubtuaj thiab sau
nej puag tim hnubpoob rov qab los.
⁶Kuv yuav hais rau cov nyob sab
qaumteb kom tso lawv los
thiab cov nyob sab qabteb kom tsis
txhob cheem lawv nyob.
Cia li tso kuv cov tub uas nyob deb heev rov los
thiab cov uas nyob puag tim qab ntuj
kawg rov qab los.
⁷Lawv yog kuv haivneeg, kuv tsim lawv los
ua kom kuv tau koob meej, kuv yog
tus puab lawv thiab tsim lawv ntag.”

Yixalayees yog Vajtswv tus Timkhawv

⁸Vajtswv hais tias, “Coj haivneeg uas muaj qhovmuag,
tiamsis tsis pom kev; muaj pobntseg,
tiamsis tsis hnov lus tuaj!
⁹Cia txhua haivneeg tuaj sib sau
ua ke.
Leejtwg muaj cuabkav hais tau nws zaj thiab qhia rau peb
saib yuav muaj yam dabtsi tshwmsim yav tom ntej?
Cia lawv coj lawv tej vajtswv tuaj ua
timkhawv rau lawv,
cia lawv hnov thiab tau hais tej lus tseeb.

¹⁰Tus TSWV hais tias, “Cov Yixalayees,
nej yog kuv cov timkhawv,
kuv xaiv nej los ua kuv cov tubtxib
kom nej thiaj paub kuv thiab ntseeg kuv,
thiab paub hais tias kuv tib leeg xwb thiaj yog Vajtswv.
Yeej ibtxwm tsis muaj lwm tus vajtswv
uas nyob ua ntej kuv thiab yav tom ntej
los yuav tsis muaj li.

¹¹“Kuv tib leeg xwb thiaj yog tus TSWV,
tsuas yog kuv tib leeg xwb thiaj cawm tau nej dim.
¹²Kuv twb xub qhia tej xwm no rau
nej paub ua ntej lawm,
ces kuv mam los pab kom nej dim.
Cov neeg txawv tebchaws tsis muaj ib tug vajtswv
ua tau tej uas kuv ua no;
nej puavleej yog kuv cov timkhawv.
¹³Kuv yog Vajtswv thiab kuv yeej
yuav zoo li no mus ibtxhis li.
Tsis muaj ib tug twg yuav khiav
dhau kuv lub hwjchim;
tej uas kuv ua yeej tsis muaj leejtwg
hloov tau ib zaug li.”

Khiav Tawm Hauv Npanpiloos

¹⁴Cov Yixalayees tus Vajtswv uas dawbhuv, tus TSWV uas txhiv nej dim hais tias,
“Vim kuv xav cawm kom nej dim,
kuv thiaj txhij tubrog mus tua lub nroog Npanpiloos;
kuv yuav tsoo tej roojvag nroog kom tawg tas,
thiab tej neeg lub suab qw yuav ua suab quaj suab nyiav.
¹⁵Kuv yog tus TSWV, nej tus Vajtswv
uas dawbhuv.
Cov Yixalayees, kuv yog tus uas tsim
nej thiab yog tus vajntxwv uas kav nej ntag.”
¹⁶Tus TSWV hais tias leejtwg yog tus
rhawv txojkev phua plhawv
hiavtxwv rau sab tim ub,
yog txojkev uas tshab plaws hauv tus
dej uas ntsawj ceev heev.
¹⁷Tus TSWV thiaj coj lawv pab tubrog coob coob
uas muaj zog heev mus raug kev puastsuaj,
cov tubrog tsav tsheb nees thiab tej nees tog tas
rau hauv dej thiab lawv tsis sawv li lawm.
Lawv ploj ntshis mus ib yam li tus
nplaim teeb uas tuag lawm.

¹⁸Tiamsis tus TSWV hais tias,
“Tsis txhob nco txog tej xwmtxheej
uas twb dhau los lawm
lossis tsis txhob xav txog tej xwm
ntawd li.
¹⁹Kuv tabtom ua yam tshiab;
nimno yam ntawd twb tshwm tuaj lawm,
nej tsis pom yam ntawd li los?
Kuv yuav ua ib txojkev mus phua
plhawv hauv tej nras mojsab qhua,
thiab muaj dej txhawv ntws nto
hauv tej tiaj suabpuam.
²⁰Txawm yog tej tsiaj qus los yuav hwm kuv,
tej hma thiab noog ntxhuav puavleej
yuav qhuas kuv,
rau qhov kuv ua kom muaj dej nyob
hauv tej nras mojsab qhua,
thiab ua kom muaj dej txhawv ntws
nto hauv tej tiaj suabpuam
kom haivneeg uas kuv xaiv thiaj tau
dej haus.
²¹Lawv yog haivneeg uas kuv tsim tseg
ua kuv tug, lawv yuav hu nkauj qhuas kuv!”

Cov Yixalayees Lub Txim

²²Tus TSWV hais tias,
“Cov Yixalayees, txawm yog kuv pab
nej npaum li ntawd
los nej tseem dhuav kuv thiab tsis pehawm kuv li.
²³Nej twb tsis coj nej tej yaj tuaj tua hlawv fij rau kuv
lossis ua rau kuv tau ntsejmuag los
ntawm nej tej khoom fij li.
Kuv tsis tau ua kom nej nyuaj siab
vim tej khoom ntawd
lossis ua kom nej qaug zog vim tej
hmoov tshuaj tsw qab.
²⁴Nej twb tsis tau muab nyiaj muas hmoov tshuaj tsw qab
tuaj fij rau kuv lossis muab tej roj tsiaj uas nej tua
ua khoom fij coj tuaj fij rau kuv.
Tiamsis nej ua rau kuv nyuaj siab vim nej tej kev txhaum,
kuv dhuav nej tej kev txhaum kawg li.
²⁵Kuv yog Vajtswv tus uas zam txim
rau nej;
kuv ua li no, vim kuv yog tus zoo,
thiab kuv yuav tsis cim ntsoov nej tej kev txhaum cia.

²⁶“Cia li piav tej qub lus rau kuv;
peb los sib cav ua ke,
thiab peev nej zaj tuaj saib nej puas
yog tus uas tsis muaj txhaum!
²⁷Nej thawj tug yawgkoob tau ua
txhaum;
nej cov thawjcoj tau ntxeev siab
rau kuv,
²⁸thiab nej cov nomtswv saib tsis
taus kuv qhov chaw dawbhuv.
Kuv thiaj tso kev puastsuaj los raug
haivneeg Yixalayees;
kuv thiaj tso kuv haivneeg rau luag
txob thuam.”