83

Thov Vajtswv Kom Yeebncuab Swb

¹Vajtswv, thov koj tsis txhob
nyob ntsiag to;
tsis txhob ua tus tsis paub thiab tsis
txhob nyob twjywm.
²Cia li saib! Koj cov yeebncuab
twb ntxeev siab,
thiab cov neeg uas ntxub koj twb
sawv tawmtsam koj lawm.
³Lawv lub siab xav nraim nkoos ua
phem rau koj haivneeg;
lawv ntxeev siab rau haivneeg uas
koj niaj hnub tsomkwm.
⁴Lawv hais tias, “Cia li tuaj, peb mus
tua lawv lub tebchaws kom puastsuaj;
kom luag thiaj tsis nco txog haivneeg
Yixalayees mus ibtxhis li lawm.”

⁵Cov yeebncuab uas pom zoo ua raws li lawv hais
thiab koom siab ua ke tawmtsam koj yog:
⁶cov Edoos, cov Yisamayees;
cov Mau-am thiab cov Hakis;
⁷cov Nkenpas, cov Amoos thiab cov Amalej;
cov Filitees thiab cov Tiles.
⁸Cov Axilias los kuj koom tes nrog lawv,
thiab ua phoojywg nrog cov Amoos
thiab cov Mau-am uas yog Lauj cov xeebntxwv.

⁹Thov koj cia li ua rau lawv ib yam li
koj ua rau cov Midias,
cov Xixelas thiab cov Yanpees uas
nyob ntawm tus Dej Kisoos.
¹⁰Koj tau tua lawv swb nyob ntawm
Edaules, lawv tuag thiab lwj tas rau hauv av.
¹¹Thov koj tua lawv cov thawjcoj ib
yam li koj tua Aules thiab Xees;
thov koj tua kom lawv cov nomtswv
swb ib yam li koj tua Xenpas thiab Xamunas,
¹²vim lawv khav hais tias,
“Peb yuav mus txeeb lub tebchaws
uas yog Vajtswv tug los ua peb tug.”

¹³Vajtswv, thov koj muab lawv ntiab
khiav kom tas ib yam li tej hmoov av,
thiab ib yam li tej quavnyab uas cua
muab ntsawj ya tas,
¹⁴thiab ib yam li hluavtaws kub havzoov,
ib yam li tej nplaim taws uas cig laim
lias saum tej ncov roob,
¹⁵thov koj tso nag xob nag cua raws
lawv khiav tawm mus,
thiab tso cua daj cua dub los ntsawj
ua kom lawv ntshai heev.
¹⁶Tus TSWV, thov koj ua kom lawv raug kev txajmuag,
thiab ua kom lawv pom koj lub hwjchim!
¹⁷Thov kom lawv swb thiab ntshai mus tas ibtxhis li;
thov kom lawv tuag ua rhuav plhu ntsuav.
¹⁸Kom lawv paub hais tias koj tib leeg
thiaj yog tus TSWV,
thiab yog tus muaj hwjchim loj kawg
nkaus uas kav lub ntiajteb no.

83

Thov Vajtswv ua kom Yixayee cov yeeb ncuab puam tsuaj

Axas zaj nkauj. Yog zaj nkauj hu.

¹Au Vajtswv, thov tsis txhob nyob twjywm.
Au Vajtswv, tsis txhob nyob ntsiag to
es tsis quav ntsej.
²Saib maj, koj cov yeeb ncuab
twb ua zom zaws,
cov uas ntxub koj
los kuj tsa taubhau nplawg ntia.
³Lawv xav tswvyim ntse kawg li
yuav tawm tsam koj haiv neeg,
lawv ntaus tswvyim
yuav tiv cov uas koj tsom kwm.
⁴Lawv hais tias, “Cia li los,
peb muab haiv neeg ntawd
ntxuav kom tu noob nrho.
Tsis txhob tseg Yixayee lub npe cia
rau leejtwg nco tau kiag li.”
⁵Lawv koom ib lub siab ntaus tswvyim phem.
Lawv sib cog lus tawm tsam koj,
⁶yog cov neeg Edoo thiab cov neeg Isama‑ee
thiab cov Mau‑a, cov Haka,
⁷cov Kenpas, cov Asmoo thiab cov Amalej,
cov Filixatee thiab cov neeg uas nyob
hauv lub nroog Thailab.
⁸Axilia kuj tuaj nrog koom tes thiab,
lawv ua Lauj cov tub ki li tes taw
uas muaj zog.
⁹Thov koj ua rau lawv
yam nkaus li koj ua rau cov Midee,
thiab yam nkaus li ua rau Xixela
thiab Yanpi ntawm tus dej Khisoo.
¹⁰Lawv raug muab ua kom puam tsuaj tag
ntawm lub moos Eedau,
thiab ua luaj ua chiv tag rau hauv av lawm.
¹¹Thov koj ua rau lawv cov uas ua hlob
zoo yam nkaus li Aulej thiab Xe‑ev,
thiab ua rau lawv cov thawj sawvdaws
zoo yam nkaus li Xenpa thiab Xamuna,
¹²yog cov uas hais tias,
“Cia peb txeeb Vajtswv tej tshav zaub
ua peb tug.”
¹³Au kuv tus Vajtswv, thov ua rau lawv
zoo yam nkaus li cov hmoov av
uas cua ntsawj ya kaj niab,
zoo yam nkaus li tej npluag
uas cua ntsawj ya tag.
¹⁴Hluavtaws kub tej hav zoov li cas
thiab nplaim taws kub tej toj roob hauv pes
cig li cas,
¹⁵thov koj tso cua daj cua dub los raws lawv
ib yam nkaus li ntawd,
thiab tso koj tej khaub zeeg cua los
ua rau lawv ntshai kawg.
¹⁶Au Yawmsaub, thov ua rau lawv
poob ntsej muag
xwv lawv thiaj li los nrhiav koj lub npe.
¹⁷Thov kom lawv raug txaj muag
thiab poob siab mus ib txhis.
Thov ua kom lawv poob ntsej muag
puam tsuaj tag.
¹⁸Thov ua kom lawv paub tias
koj tib leeg xwb uas npe hu ua Yawmsaub
thiaj yog tus Vajtswv Loj Dua Ntais
uas kav tag nrho thoob ntiajteb.