57

Singx Nzung 57

Daux Gaux Tov Tin-Hungh Njoux Biaux Ndutv Zuqc Zeix Nyei Mienh

(Beiv mangc Singx Nzung 108:1-5)

Jiu bun dorh nzung nyei mienh. Longc “Maiv Dungx Mietc” nyei pou. Ndaawitv zoc nyei mikv^taam nzung doix ninh biaux Saulo yaac yiem mbaengx-kuotv wuov zanc.
  1Tin-Hungh aah! Tov korv-lienh yie. Tov! korv-lienh yie maah!
   Weic zuqc yie ndaauh kaux meih.
  Yie ndaauh kaux meih, yiem meih nyei ndaatv-ndiev nyei dongh linh
   zuov domh zeqc naanc jiex nzengc.
  2Yie heuc Yiem Hlang Jiex nyei Tin-Hungh,
   se weic yie zoux ziangx nyungc-nyungc sic nyei Tin-Hungh.
  3Ninh oix yiem gu'nguaaic lungh dau yie, njoux yie.
   Ninh oix bun zeix yie wuov deix zuqc nyaiv. Selaa
   Tin-Hungh oix bun cing ninh ziepc zuoqv nyei hnamv yie yaac zoux hnyouv zingx.
  4Yie bueix jienv sienh mbu'ndongx,
   se naqv baamh mienh nyei sienh.
  Ninh mbuo nyei nyaah se hnangv cang caux forng nor.
   Ninh mbuo nyei mbietc yaac hnangv nzuqc ndaauv nor laic.
  5O Tin-Hungh aac, tov bun mienh taaih meih gauh hlang jiex lungh.
   Tov bun meih nyei njang-laangc yiem buangv lungh ndiev.
  6Ninh mbuo zaeng mungz yie nyei zaux caaiv nyei dorngx.
   Yie zuqc naanc zingh ngatv jienv yie nyei hnyouv.
  Ninh mbuo wetv kuotv yie yangh nyei jauv,
   mv baac ninh mbuo ganh ndortv njiec. Selaa
  7O Tin-Hungh aac, yie nyei hnyouv kaux wuonv.
   Yie nyei hnyouv kaux wuonv.
  Yie oix baaux nzung, oix baaux nzung ceng meih.
  8Yie nyei hnyouv aah! Nyie daaih maah!
   Domh daanh baah, fiuv-daanh baah aah! Nyie daaih maah!
   Yie oix bun mba'hnoi nyie daaih.
  9O Ziouv aac, yie oix yiem maanc fingx mbu'ndongx dor-ziec meih,
   yie oix yiem maanc guoqv mbu'ndongx baaux nzung ceng meih.
  10Meih ziepc zuoqv nyei hnamv mienh mbaengc lungh hlang.
   Meih ziepc zuoqv nyei hnyouv yaac mbaengc mbuonx hlang.
  11O Tin-Hungh aac, tov bun mienh taaih meih gauh hlang jiex lungh.
   Tov bun meih nyei njang-laangc yiem buangv lungh ndiev.