85
Thov khuvleej cov Yixayee
Sau rua tug thawj coj hu nkauj. Yog zaaj nkauj kws Khaula caaj ceg sau.
1Au Yawmsaub, koj tub hlub koj lub tebchaws,
koj tub pub Yakhauj
rov tau vaam meej le qub.
2Koj tub zaam koj cov tuabneeg tej kev txhum,
hab daws puab lub txem huvsw.
3Koj tub thim koj tej kev
npau tawg huvsw rov qaab,
koj tub tig hlo ntawm koj txujkev chim
kws kub heev.
4Au Vaajtswv kws cawm peb dim,
thov paab peb rov zoo le qub,
thov koj tso qhov kws koj chim rua peb tseg.
5Koj yuav chim rua peb moog ib txhws lov?
Koj yuav ca koj txujkev chim
nyob moog rua txhua tam lov?
6Koj yuav tsw pub peb lub neej
rov zoo le qub lov,
sub koj cov tuabneeg
txhad tau kev xyiv faab rua huv koj?
7Au Yawmsaub, thov ua koj txujkev hlub
kws ruaj khov tshwm lug rua peb,
hab thov pub koj txujkev dim rua peb.
8Thov ca kuv tau nov tej lug
kws Vaajtswv Yawmsaub has,
tsua qhov nwg has txujkev kaaj sab lug
rua nwg haiv tuabneeg,
kws yog nwg cov tuabneeg dawb huv.
Tsw xob ca puab tig rov moog
rua txujkev ruag.
9Nwg txujkev cawm dim yeej lug ze
cov kws fwm hab paub ntshai nwg,
nwg tug fwjchim ci ntsaa ab
txhad nyob huv peb lub tebchaws.
10Txujkev hlub ruaj khov hab txujkev ncaaj
kws tso sab tau yuav sws ntswb,
txujkev ncaaj nceeg hab txujkev kaaj sab lug
yuav sws nwj.
11Txujkev ua ncaaj yuav tawm huv aav tuaj,
txujkev ncaaj nceeg yuav saib sau ntuj tuaj.
12Yawmsaub yeej yuav pub tej kws zoo,
mas peb lub tebchaws
yuav tau qoob loos nplua mag.
13Txujkev ncaaj nceeg yuav moog ua nwg ntej,
hab npaaj kev rua nwg kwtaw taug.