94
Thov Vaajtswv pauj taub
1Au Yawmsaub, yog tug Vaajtswv
kws pauj taub,
au Vaajtswv tug kws pauj taub,
thov koj tshwm plawg lug.
2Au tug kws txav txem rua nplajteb,
thov koj sawv tseeg,
ua rua cov tuabneeg khaav theeb tau saws
lawv le tswm nyog saws.
3Au Yawmsaub, cov tuabneeg limham
yuav zoo sab moog ntev le caag,
cov tuabneeg phem
yuav xyiv faab ntev le caag?
4Puab has lug khaav theeb heev,
cov tuabneeg ua phem suavdawg khaav theeb.
5Au Yawmsaub, puab tsuj yuam
koj haiv tuabneeg
hab tswm txom koj qub txeeg qub teg.
6Puab tua tej puj ntsuag
hab lwm haiv tuabneeg kws nrug puab nyob,
hab puab tua tej mivnyuas ntsuag
kws tsw muaj txwv.
7Hab puab tseed has tas,
“Yawmsaub tsw pum le,
Yakhauj tug Vaajtswv tsw paub le.”
8Cov tuabneeg kws ruag dhau luas lwm tug 'e,
ca le to taub.
Cov tuabneeg tsw thoob tswb 'e,
thaus twg mej le ntse?
9Tug kws tswm qhov ntsej
nwg tseed tsw nov hab lov?
Tug kws tswm qhov muag
nwg tseed tsw pum hab lov?
10Tug kws nplawm txhua haiv tuabneeg
nwg yuav tsw txav txem lov?
Tug kws qha tuabneeg
nwg tseed tsw txawj tsw ntse lov?
11Yawmsaub yeej paub tej kws tuabneeg xaav,
tej hov tsuas yog ua paa xwb.
12Au Yawmsaub, tug kws koj nplawm
hab qhuab qha kuj tau nyob kaaj sab lug,
yog tug kws koj muab koj txuj kevcai qha rua,
13nwg txhad tau dim
qhov kws raug txom nyem ceblaaj
moog txug thaus khawb tau qhov taub
cuab cov tuabneeg limham.
14Tsua qhov Yawmsaub
yeej yuav tsw ncaim nwg haiv tuabneeg,
nwg yuav tsw tso nwg qub txeeg qub teg tseg.
15Qhov kws txav txem
yuav rov txav lawv le txujkev ncaaj nceeg,
mas cov tuabneeg sab ncaaj
yuav lawv txujkev txav txem ncaaj.
16Leejtwg sawv tseeg paab kuv
tawm tsaam cov tuabneeg limham?
Leejtwg yuav tuaj kuv tog
tiv cov tuabneeg ua phem?
17Yog Yawmsaub tsw paab kuv
tes kuv tug ntsuj plig tub moog nyob
huv qhov chaw ntsag quas tu lawm.
18Thaus kuv xaav tas,
“Kuv nplaam kwtaw lawm,”
au Yawmsaub, koj txujkev hlub kws ruaj khov
tuav kuv ca.
19Thaus kuv lub sab muaj kev txhawj xeeb ntau,
koj kuj nplig kuv lub sab kuas xyiv faab.
20Cov thawj kaav kws limham
yuav nrug koj ua kwvluag tau lov,
yog cov kws swv tej kaab ke moog ua phem?
21Puab sws koom teg
xaav txuv cov tuabneeg ncaaj nceeg txujsa,
hab muab cov tuabneeg tsw txhum
rau txem tuag.
22Yawmsaub yog kuv lub chaw ruaj khov,
kuv tug Vaajtswv
yog txhwb zeb kws kuv nraim cev.
23Nwg yuav coj puab tej kev txhum
rov lug rua sau puab,
hab yuav muab puab ntxuav pov tseg
vem yog tim puab tej kev limham.
Yawmsaub kws yog peb tug Vaajtswv
yuav muab puab ntxuav pov tseg.