122
Thov paab Yeluxalee
Zaaj nkauj hu nce moog. Yog Tavi sau.
1Kuv zoo sab rua thaus puab has rua kuv tas,
“Ca peb moog rua huv
Yawmsaub lub tuam tsev.”
2Yeluxalee 'e, peb txhais kwtaw
tseed sawv ntsug huv koj tej rooj loog.
3Yeluxalee raug rhawv ua lub nroog
kws ruaj khov nyob ntum nti.
4Yog lub chaw kws txhua lub xeem
nce moog rua huv,
yog Yawmsaub txhua lub xeem,
lawv le kws tu ca rua cov Yixayee
kuas ua tsaug rua Yawmsaub lub npe.
5Tej zwm txwv kws tu plaub
kuj muab txawb rua huv,
yog Tavi caaj ceg tej zwm txwv.
6Ca le thov kev kaaj sab lug rua Yeluxalee tas,
“Thov ca cov kws nyam koj vaam meej.
7Thov kev kaaj sab lug
muaj nyob huv koj tej ntsaa loog,
hab kev tso sab plhuav
nyob huv koj tej chaw tsom faaj.”
8Vem saib rua kuv tej kwvtij kwvluag
kuv yuav has tas,
“Thov kev kaaj sab lug muaj nyob huv koj.”
9Vem saib rua
peb tug Vaajtswv Yawmsaub lub tuam tsev,
kuv yuav nrhav kev zoo rua koj.