101

Tơlơi Pơtao Dawid Ƀuăn Hăng Yahweh

Tơlơi adoh bơni hơơč Dawid čih kơčĕ.
  1Kâo či adoh kơ tơlơi Ih khăp hiam klă laih anŭn tơlơi Ih phat kơđi djơ̆ găl;
   kơ Ih yơh, Ơ Yahweh ăh, kâo či adoh bơni.
  2Kâo či răng pơñen yơh amăng tơlơi hơdip hơdơ̆ng kâo kiăng kơ ƀu hơmâo tơlơi arăng dưi jăm ƀuăh kâo ôh;
   kâo kiăng biă mă Ih rai djru kâo.

  Kâo či hơdip hơdơ̆ng amăng sang kâo
   hăng pran jua jơngeh agaih yơh.
  3Kâo či hơngah hĭ ƀu brơi ôh mơta kâo lăng kơ hơdôm tơlơi sat ƀai laih anŭn ngă tui.
   Kâo pơrơmut kơ tơlơi bruă ƀing mơnuih lui wir hĭ mơ̆ng Ơi Adai;
   tơlơi bruă anŭn ƀu či đo̱m amăng kâo ôh.
  4Kâo ƀu či brơi jua pơmĭn kâo pơmĭn kiăng kơ ngă tơlơi wĕ wŏ ôh,
   laih anŭn kâo ƀu či hơmâo tơhơnal tơlơi hơget ôh tĕk djơ̆ hăng tơlơi sat ƀai.
  5Ƀing hlơi pô pơhiăp rơkŭt sat ƀai kơ ƀing re̱ng gah gơñu,
   kơ ƀing gơñu anŭn yơh kâo či pơrơiăt hĭ.
  Ƀing hlơi pô hơmâo mơta pơgao laih anŭn pran jua pơang,
   kơ ƀing gơñu anŭn yơh kâo ƀu či ư̆ añ ôh.

  6Mơta kâo či lăng rơiêŭ mơak ƀơi ƀing hlơi pô dŏ tŏng ten hăng Ơi Adai amăng anih lŏn anai,
   laih anŭn kâo či brơi kơ ƀing gơñu dưi dŏ hrŏm hăng kâo yơh.
  Ƀing hlơi pô hơdip hơdơ̆ng ƀu hơmâo tơlơi arăng jăm ƀuăh ôh,
   kâo či brơi kơ ƀing gơñu dưi mă bruă kơ kâo yơh.
  7Ƀu hơmâo ôh hlơi pô ngă tơlơi pleč ƀlŏr
   či dưi dŏ amăng sang pơtao kâo.
  Laih anŭn ƀu hơmâo ôh hlơi pô pơhiăp plư pleč
   či dưi dŏ dơ̆ng mă bruă ƀơi anăp kâo.
  8Ơ Yahweh ăh, amăng rĭm hrơi yơh kâo či pơrơiăt hĭ
   abih bang ƀing mơnuih sat ƀai amăng lŏn čar anai,
  tui anŭn kâo či puh pơđuaĭ hĭ abih bang mơnuih sat ƀai anŭn
   mơ̆ng plei Ih anŭn yơh.